އެފްއޭއެމުގެ ޖެނެރަލް ސެކްރެޓަރީގެ މަގާމުން ބައްސާމް އަދީލް ޖަލީލް ވަކިކުރި އެކްސްކޯ ބައްދަލުވުމުގެ ޔައުމިއްޔާ ފޮނުވަން ފީފާއިން އެދެފި އެވެ.
ދުނިޔޭގެ ފުޓްބޯޅަ ޖަމިއްޔާ އިން އެފްއޭއެމުގެ ރައީސްކަމުން ވަކިވެފައިވާ ކުރީގެ ގައުމީ ފޯވަޑް އަހުމަދު ތޯރިގް (ޓޮމް) އަށް އެޑްރެސްކޮށް ފޮނުވާފައިވާ ސިޓީގައި ބުނެފައިވަނީ އަސާސީ ގަވާއިދާ ހިލާފަށް ބައްސާމް ވަކިކޮށްފައިވާނަމަ އޭނާގެ މަގާމާއި މަސްއޫލިއްޔާތު އަލުން އިއާދަވާނެ ކަމަށެވެ.
އިއްޔެ ފޮނުވާފައިވާ މި ސިޓީ އަކީ ބައްސާމް ވަކިކުރިކަން ފީފާ އަށް އެންގުމުގެ ގޮތުން އެފްއޭއެމުން ފޮނުވާފައިވާ ސިޓީގެ ޖަވާބެވެ.
އެފްއޭއެމުގެ އެކްސްކޯއިން އިސްތިއުފާދިން ފަސް މެމްބަރުން ވެސް ވަނީ ބައްސާމް މަގާމުން ވަކިކޮށްފައިވަނީ އަސާސީ ގަވައިދާ ހިލާފަށް ކަމަށް ބުނެފަ އެވެ. އެގަވާއިދުގެ 35 ވަނަ މާއްދާގައިވާ ގޮތުން ޖެނެރަލް ސެކްރެޓަރީ އައްޔަންކުރަން ޖެހެނީ ވެސް އަދި ވަކިކުރަން ޖެހޭނީ ވެސް ރައީސް ނަން ހުށަހެޅުއްވުމުން އެކްސްކޯގެ މެމްބަރުންގެ މެދުގައި ވޯޓުލައިގެންނެވެ. ނަމަވެސް އެފްއޭއެމުގައި އެކްސްކޯ ބައްދަލުވުމެއް މިކަމަށް ނުބާއްވާ ކަމަށް އެކްސްކޯ މެމްބަރުން ވިދާޅުވެ އެވެ.
