ޑިޒްނީގެ އެންމެފަހުގެ ޓްރެންޑަކީ މިއީ އެވެ. އެމީހުންގެ އެނިމޭޓެޑް ކްލެސިކް ފިލްމުތައް ލައިވް އެކްޝަން ފިލްމުތަކެއްގެ ގޮތުގައި ބޮޑު ސްކްރީނަށް ގެނެސްދިނުމެވެ. އެގޮތުން އެންމެފަހުން އެމީހުން ގެނެސްދިން "ދަ ޖަންގަލް ބުކް" ގެ މަގްބޫލުކަމާ އެކު މި ޓްރެންޑެއްގެ ފޯރި މި ވަނީ އިހުނަށްވުރެން ގަދަވެފަ އެވެ.
ޑިޒްނީ އިން މިހާރު ތައްޔާރުވަމުން ދަނީ މީގެ 22 އަހަރު ކުރިން އެމީހުން ނެރުނު އެނިމޭޓެޑް ކްލެސިކް، "ލަޔަން ކިންގް" ގެ ލައިވް އެކްޝަން ފިލްމެއް އުފެއްދުމަށެވެ. މި ފިލްމުގެ ޑައިރެކްޓަރަކަށް ހަމަޖައްސާފައި ވަނީ "ދަ ޖަންގަލް ބުކް" ވެސް ޑައިރެކްޓްކުރި ޖޯން ފެވްރޯ އެވެ.
ވަރަށް ގިނަ ބަޔަކު ގަބޫލުކުރާ ގޮތުން ނަމަ، 22 އަހަރަށް ފަހު ޑިޒްނީގެ ހިޔާލު ބަދަލުވެ، ލަޔަން ކިންގްގެ ލައިވް އެކްޝަން ފިލްމެއް އުފެއްދުމަށް ފެވްރޯއާ ހަވާލުކޮށްފައި ވަނީ ޑިޒްނީގެ ކްލެސިކް "ޖަންގަލް ބުކް" ލައިވް އެކްޝަން ފިލްމެއްގެ ގޮތުގައި އޭނާ ބަދަލުކޮށްލި މޮޅުކަމުންނެވެ.
"ޖަންގަލް ބުކް" އަކީ ފާޑުކިޔުންތެރިންނާއި ބެލުންތެރިންގެ މެދުގައި ވެސް ބޮޑު މަގްބޫލުކަމެއް ހޯދި ފިލްމެކެވެ. ބޮކްސް އޮފީހުގައި އެ ފިލްމަށް 961 މިލިއަން ޑޮލަރު ލިބިފައިވެ އެވެ.
"ލަޔަން ކިންގް" ގެ ލައިވް އެކްޝަން ފިލްމެއް ޑިޒްނީ އިން އިއުލާނުކޮށްފައިވިޔަސް ޖުމްލަކޮށް ބަލަނީ ނަމަ، ލައިވް އެކްޝަން ފިލްމަކަށް އެ ފިލްމެއް ނުވާނެ އެވެ. ސަބަބަކީ، ލަޔަން ކިންގް އަކީ، އޭގެ ޕްލޮޓް ނުވަތަ ވާހަކައިގައި އެއްވެސް އިންސާނަކު ފެނިގެންދާ ވާހަކައަކަށް ނުވުމެވެ.
ލައިވް އެކްޝަން އަކީ އޭގައި އަސްލު އެކްޓަރުންނާއި އެނިމޭޓެޑް ކެރެކްޓާސްތައް ބޭނުންކޮށްފައި ހުންނަ ފިލްމެވެ.
އެހެންވީމަ، "ލަޔަން ކިންގް" ވާނީ "ލައިވް އެކްޝަން ކަހަލަ" ފިލްމަކަށެވެ. ނުވަތަ ފަހަރެއްގައި ޑިޒްނީ އިން ލަޔަން ކިންގްގެ ވާހަކަ އަށް އިތުރު ކެރެކްޓާތަކެއް ވައްދަނީ ކަމަށް ވެސް ވެދާނެ އެވެ.
ޑިޒްނީގެ ކުރިއަށް ހުރި ލައިވް އެކްޝަން ފިލްމުތަކަށް ބަލާއިރު އެންމެ ގިނަ ބަޔަކު އިންތިޒާރުކުރަމުން ދަނީ "ބިއުޓީ އެންޑް ދަ ބީސްޓް" ގެ ލައިވް އެކްޝަން ފިލްމަށެވެ. މި ފިލްމުގައި ލީޑް ރޯލުކުޅެފައި ވަނީ އެމާ ވޮޓްސަން އެވެ.