ރޭއްބޭއްވި މުޒާހަރާގެ ތެރެއިން ހައްޔަރު ކުރި 34 މީހުންގެ ތެރެއިން 27 މީހުން ހައްޔަރުގައި ބޭތިއްބުމަށްފަހު ހަތް މީހަކު ދޫކޮށްލައފި އެވެ.
ފުލުހުން ބުނީ ހައްޔަރު ކުރި މީހުންގެ ތެރޭގައި އަންހެނަކު ނުހިމެނޭ ކަމަށާއި ހައްޔަރު ކުރުމަށްފަހު ދޫކޮށްލި މީހުންގެ ތެރޭގައި ކުޑަކުއްޖަކައި ދެ ބިދޭސީން ވެސް ހިމެނޭ ކަމަށެވެ. ހައްޔަރުގައި ތިބި މީހުންގެ ތެރޭގައި އެމްޑީޕީގެ ކުރީގެ ރައީސް ޑރ. އިބްރާހިމް ދީދީ ވެސް ހިމެނެ އެވެ.
ރޭ މާލޭގައި މުޒާހަރާކޮށްފައި ވަނީ އިއްޔެ އެމްޑީޕީ އާއި ޖޭޕީން މާލޭގައި ބޭއްވި ބޮޑު ހިނގާލުން 13 ޑިމާންޑަކާއެކު އިއްޔެ އިރުއޮއްސި 6:00 ޖެހި އިރު ރަސްމީކޮށް ނިންމާލައި އޭގެ ފަހުން ހިނގާ އެއްވެސް ކަމަކަށް އެ ދެޕާޓީން ޒިންމާ ނުވާނެ ކަމަށް ބުނެފައި ވަނިކޮށެވެ. ރޭގެ މުޒާހަރާގައި ބައިވެރިވެފައި ވަނީ ހިނގާލުމަށް ނުކުުތް ޖޭޕީ އެމްޑީޕީގެ މެންބަރުންނެވެ.
ރޭ އިރުއްސުނީއްސުރެ ރޭ ގާތްގަނޑަކަށް 1:00 ޖެހުމާހަމައަށް ކުރިޔަށް ގެންދިޔަ މުޒާހަރާގައި ގިނަ އަދަދެއްގެ މީހުން ހައްޔަރުކޮށްފައި ވަނީ ރައީސް އަބްދުﷲ ޔާމީން ދިރިއުޅުއްވާ ގެކޮޅު ހުންނަ އަލިކިލެގެފާނު މަގާއި މަޖީދީ މަގު ގުޅުން ކަންކަމަތިންނާއި ޗާންދަނީ މަގާއި މަޖީދީ މަގު ގުޅުނު ހިސާބުން އެކި ފަހަރު މަތިން ހިނގި ހަމަނުޖެހުންތަކުގެ ތެރޭގައެވެ.
ރޭގެ މުޒާހަރާގެ ތެރެއަށް ބަޔަކު ވަދެ ހަމަނުޖެހުން ހިންގައި ބައެއް ތަކެއްޗަށް ގެއްލުން ދިން ކަމަށްވެއެވެ. އަދި މުޒާހަރާގެ ތެރޭގައި ކަޅު ތެޔޮ ޖަހައި ތިމަރަ ބަރި އުކާފައިވެއެވެ.
ރޭ ހައްޔަރު ކުރި މީހުންގެ ބަންދާމެދު ގޮތެއް ނިންމަން ކޯޓަށް ހާޒިރު ކުރާނީ މިއަދު މެންދުރު ފަހު އެވެ. އެމްޑީޕީ ޖޭޕީން މުޒާހަރާ ކުރަނީ ގާނޫނު އަސާސީގެ ހިމާޔަތުގައި ކަމަށް ބުނެއެވެ. ނަމަވެސް މުޒާހަރާތަކުގައި ގޮވާލަނީ މިވަގުތު ހައްޔަރުކޮށްފައި ހުންނެވި ކުރީގެ ރައީސް މުހައްމަދު ނަޝީދު މިނިވަން ކުރުމަށެވެ.