ބަޑިން ބިރު ދެއްކުމަށް ފަހު ކިމް ކާޑޭޝިއަންގެ އަތުން މިލިއަން ޑޮލަރުގެ ގަހަނާ ފޭރިގެންފި

ރިއާލިޓީ ޓީވީ ތަރި، ކިމް ކާޑޭޝިއަން އަށް ބަޑިން ބިރު ދެއްކުމަށް ފަހު، އެތައް މިލިއަން ޑޮލަރުގެ އަގުހުރި ގަހަނާ އޭނާގެ އަތުން ފޭރިގަނެފައިވާ ކަމަށް ފްރާންސްގެ ޕޮލިހުން ބުނެފި އެވެ.

އެމެރިކާގެ މަޝްހޫރު ރެޕާ، ކަންޔޭ ވެސްޓްގެ އަންހެނުން އަތުން ފޭރިގަނެފައި ވަނީ ޕެރިސް ފެޝަން ވީކުގައި ބައިވެރިވުމަށް ގޮސް ޕެރިހުގައި މަޑުކޮށްލައިގެން ހުރި ހޮޓަލުގެ ކޮޓަރިއެއްގައި ހުއްޓަ އެވެ. ފްރާންސް ފުލުހުން ބުނެފައި ވަނީ ކިމް އަތުން ގަހަނާތައް ފޭރިގަނެފައި ފުލުހުންގެ ހެދުން އަޅައިގެން އޮޅުވާލައިގެން ހޮޓަލަށް ވަން ދެ މީހަކު ކަމަށެވެ.

މިލިއަން ޑޮލަރުގެ ގަހަނާތަކެއް ކިމް އަތުން ފޭރިގަނެފައިވިޔަސް އެމީހުންގެ ފަރާތުން އެއްވެސް ކަހަލަ ޖިސްމާނީ އަނިޔާއެއް ކިމް އަށް ކޮށްފައިނުވާ ކަމަށް ފުލުހުން ބުނެފައިވެ އެވެ. ނަމަވެސް އޭގެ ނަފުސާނީ އަސަރު ކިމް އަށް ވަރަށް ބޮޑަށް ކޮށްފައިވާކަމުގެ ރިޕޯޓް ލިބެ އެވެ.

ކިމް އަތުން ފޭރިގަތް ގަހަނާގެ ތެރޭގައި ހަ މިލިއަން ޑޮލަރުގެ ފަށާއި ހަތަރު މިލިއަން ޑޮލަރުގެ އަނގޮޓިއެއް ހިމެނެ އެވެ.

މިކަމެއް ހިނގިއިރު ކަންޔޭ ހުރީ ނިއު ޔޯކްގަ އެވެ. ކޮންސެޓްގެ މެދުތެރޭގައި، ލަވައެއް ހުށަހަޅައިދޭށެވެ. ފޭރުނު ޚަބަރު ލިބުމާ އެކު، އާއިލީ އިމަޖެންސީއެއް ކަމަށް ބުނެ ޝޯ މެދުކަނޑާލުމަށް ފަހު ކަންޔޭ ވަނީ އޭނާގެ އަންހެނުންގެ ގާތަށް ފުރައިގެން ގޮސްފަ އެވެ.

ކިމް އަތުން ބަޔަކު މީހުން ފޭރިގަނެފައިވާއިރު މިދިޔަ ހަފުތާގައި ވެސް ފިރިހެނަކު އޭނާއާ ދިމާކޮށްލާފައިވެ އެވެ. ކިމްގެ ބުޑަށް ބޮސް ދޭން މަސައްކަތްކުރި 27 އަހަރުގެ އެ މީހާ ފަހުން ބުނެފައިވަނީ އޭނާ މަސައްކަތްކުރީ، ކިމް އާއި ކާޑޭޝިއަން އާއިލާއިން ޕްރޮމޯޓްކުރާ "ފޭކް ބިއުޓީ" އާ ދެކޮޅަށް ހަޅުތާލުކުރުމަށެވެ.