މިއަހަރުގެ އޯލެވެލް އިމްތިހާން ފެށިގެން މިހާރު ކުރިއަށް ދާތީ ކިޔަވާ ކުދިންނަށް ވީހާ ވެސް އުނދަގޫ ކުޑަވާނެ ގޮތަކަށް އިންތިޒާމްތައް ހަމަޖެއްސުމުގެ ގޮތުން، އިމާރާތް ކުރުމަށް މަގުތައް ބަންދު ކުރުން ވީހާ ވެސް މަދު ކުރުމަށް ހައުސިން މިނިސްޓްރީ އިން ނިންމައިފި އެވެ. އެގޮތުން މަގު ބަންދުކޮށްގެން މަސައްކަތް ކުރުމަށް ދޭ ހުއްދަތައް މަދު ކުރުމަށް ވަނީ ނިންމައިފަ އެވެ.
ހައުސިން އިން މިއަދު ނެރުނު ބަޔާނެއްގައި ބުނީ، އިމްތިހާން ހަދަމުންދާ ދުވަސްވަރު މަގުތަކާއި އެނޫންވެސް ތަންތަނުގައި އިމާރާތްކުރުމުގެ މަސައްކަތް ކުރަމުންދާތީ އޭގެ ސަބަބުން ކުދިންނަށް އުނދަގޫތަކެއް ކުރިމަތިވަމުންދާ ކަމަށެވެ. އެހެންކަމުން ކުދިން ޓެސްޓް ހަދާ ގަޑިތަކުގައި އެފަދަ މަސައްކަތް ނުކުރުމަކީ މުހިއްމު މަސައްކަތެއް ކަމަށް ދެކޭތީ، މަސައްކަތްކުރުމުގެ ހުއްދައިގެ އަދަދު މަދު ކުރުމާއި، މަސައްކަތް ކުރުމަށް ހުއްދަދޭ ގަޑިތަކަށް ބަދަލު ގެންނަން ނިންމާފައިވާ ކަމަށް މިނިސްޓްރީ އިން ބުންޏެވެ.
އެ މިނިސްޓްރީން ބުނީ، ކުދިން ޓެސްޓް ހަދާ ވަގުތުތަކާއި، ރޭގަނޑު ދަންވަރު ގަޑީގައާ ފިލާވަޅު ދަސްކުރުމަށް ފަތިހު ހޭލާ އުޅޭނެތީ އެގަޑިތަކުގައި އެފަދަ މަސައްކަތް ނުކުރުމަށް އިލްތިމާސްކުރާ ކަމަށެވެ. އަދި އެކަމަށް މަސައްކަތް ކުރާ ފަރާތްތަކުން އެ މިނިސްޓްރީ އަށް އެއްބާރުލުން ދިނުމަށް އެދޭ ކަމަށް ވެސް ހައުސިން އިން ބުންޏެވެ.