މި އަހަރު ފެށިގެން ދިޔައީ ދުނިޔޭގެ އެކި ސަރަހައްދުތަކުގައި އަލިފާނުގެ ކުޅިވަރުތަކާއި މަޖަލުގެ ތެރެއިންނެވެ. ނަމަވެސް ފަލަސްތީނުގައި އާއަހަރު ފެށިގެން ދިޔައީ އިޒްރޭލުގެ އަނިޔާވެރި ބޮމުގެ ހަމަލާތަކުންނެވެ.
އާ އަހަރުގެ ފުރަތަމަ ދުވަހުގެ މެންދަމު އިޒްރޭލުން ވަނީ ޚާން ޔޫނިސްގައި ހުރި ރިހާބިލި ސަރަޙައްދުތަކަށް އެތައް ބޮމެއް އޮއްސާލާފަ އެވެ.
މި ހަމަލާތަކުގައި އަންހެނުންނާއި ކުޑަކުދިން ހިމެނޭ ގޮތަށް އެތައް ބަޔަކު ޝަހީދުވެފައިވާ ކަމަށް ރިޕޯޓްކޮށްފައިވެ އެވެ.
ފަލަސްތީނުގެ ޣައްޒާ ސިޓީގެ ރައްޔިތުން ވޭތުވެދިޔަ 451 ދުވަހު ވަނީ އިޒްރޭލުގެ އަނިޔާވެރި ޖަރީމާތަކާ ކުރިމަތިލާފަ އެވެ.
ދެހާސް ތޭވީސް އަދި 2024 ވަނަ އަހަރަކީ ފަލަސްތީނު ރައްޔިތުންނަށް އެމީހުންގެ ހަޔާތުގައި ކުރިމަތިލާން ޖެހުނު އެންމެ އަނިޔާވެރި ދުވަސްތަކެވެ. މި ހަނގުރާމައިގެ ސަބަބުން ޣައްޒާގެ 2.3 މިލިއަން މީހުންގެ ތެރެއިން 90 އިންސައްތަ މީހުން ވަނީ ގެދޮރު ދޫކޮށް ދާން މަޖުބޫރުވެފަ އެވެ.
ފިނިމޫސުމުގައި ސަތޭކަ ހާހަށް ވުރެ ގިނަ މީހުން ދަނީ ޓެންޓުތަކުގައި ދިރިއުޅެމުންނެވެ. ރޭގަނޑު ފިނިކަން 10 ޑިގްރީ ސެލްސިއަސްއަށް ދަށްވުމުގެ ސަބަބުން މަދުވެގެން ހަތަރު ކުޑަކުދިން ވަނީ މަރުވެފަ އެވެ.
އެމެރިކާ އާއި އަރަބި ގައުމުތަކުން ހަނގުރާމަ ހުއްޓުވުމަށް މަސައްކަތް ކުރަމުން ދިޔަ ނަމަވެސް ހަމާސްއިން ދެމެހެއްޓެނިވި ހުއްޓުމަކަށް ގޮވާލާ އަދި އިޒްރޭލުގެ ބަންޔަމިން ނެތަންޔާހޫ "ފުރިހަމަ ކާމިޔާބީ" އަކަށް ގޮވާލާތީ، މި މަސައްކަތްތައް ވަނީ ނާކާމިޔާބު ވެފަ އެވެ.
މި ހާލަތުގައި ފަލަސްތީނުގެ ރައްޔިތުންނަށް އާ އަހަރަކީ އުފާވެރި އަހަރަކަށް ނުވާނެ އެވެ. ކުޑަކުދިން މަރުވަމުންދާއިރު އާއިލާތައް ބަނޑުހައިހޫނުކަމުގައި ދަނީ ދުވަސް ހޭދަކުރަމުންނެވެ.
ގެދޮރު ގެއްލި، ދިރިއުޅުން ހަލާކުވެ، އާންމުންގެ އެތައް ބަޔަކު މަރުވަމުންދާއިރު ބޭސްފަރުވާގެ އެހީތެރިކަމުންވެސް ވަނީ މަރުހޫމުވެފަ އެވެ. ފަލަސްތީނުގެ ހަބަރުތައް ގެނެސްދޭ މީޑިއާތަކުގެ އަޑުވެސް ވަނީ ކަނޑުވާލާފަ އެވެ.