ފުރިހަމަ ތަފާސްހިސާބު ނެތުމުގެ ސަބަބުން، އަންހެން ކުދިންގެ ހަގީގީ ހާލަތު ދެނެގަންނަން ހުރަސްއެޅި އެ ކުދިންގެ މައްސަލަތަކަށް އެދެވޭ ހައްލު ހޯދައި ނުދެވޭ ކަމަށް އެޗްއާރްސީއެމުން ބުނެފި އެވެ.
އެ ކޮމިޝަނުން މިހެން ބުނީ ބައިނަލްއަޤުވާމީ ގޮތުން ފާހަގަކުރާ އަންހެން ކުދިންގެ ދުވަހާ ގުޅުވައި ނެރުނު ބަޔާނެއްގަ އެވެ. ކޮންމެ އަހަރެއްގެ އޮކްޓޫބަރު މަހުގެ 11 ވަނަ ދުވަހަކީ ބައިނަލްއަގުވާމީ ގޮތުން ފާހަގަކުރާ އަންހެން ކުދިންގެ ދުވަހެވެ.
އެޗްއާރްސީއެމުން ބުނީ މި އަހަރު އެ ކޮމިޝަނަށް ހުށަހެޅި އަންހެން ކުދިންނާ ގުޅުން ހުރި މައްސަލަތަކަށް ބަލާއިރު، ތަފާތު ބާވަތްތަކުގެ އަނިޔާ އާއި އިހުމާލުގެ މައްސަލަތައް ފާހަގަކުރެވޭ އިރު ހަލާނަތާއި ތަޢްލީމާ ގުޅުންހުރި މައްސަލަތައްވެސް ހިމެނޭ ކަމަށެވެ. އަދި އެފަދަ ގިނަ މައްސަލަތަކަކީ ޢާއިލާގެ ތެރެއިން ނުވަތަ އާއިލީ ގޮތުން ގުޅުންހުރި މީހުންގެ ފަރާތުން ދިމާވާ ކަންކަން ކަމަށެވެ.
"... މިފަދަ ނޭދެވޭ އަމަލުތަކަކީ އާއިލީ މައްސަލަތައް ކަމުގައި ދެކި ބައެއް ކުދިންނާއި އެކުދިންގެ މައިންބަފައިން އަދި ޢާއިލާތަކުންވެސް މިކަންކަން ސިއްރުކޮށް، އެކަންކަން ރިޕޯޓު ކުރުމަށް ފަސްޖެހޭކަންވެސް ކަމާބެހޭ މުއައްސަސާތަކުން ފާހަގަކުރެއެވެ. އެހެންކަމުން އަންހެން ކުދިންނަށް ކުރާ އަނިޔާއާއި އިހުމާލުގެ މައްސަލަތަކުގެ އެންމެ ފުރިހަމަ ތަފާސްހިސާބު ނެތުމުގެ ސަބަބުން، އަންހެން ކުދިންގެ ޙަޤީޤީ ޙާލަތު ދެނެގަތުމަށް ހުރަސްއެޅި އެކުދިންނަށް ދިމާވާ މައްސަލަތަކަށް އެދެވޭ ހައްލެއް ހޯދައި ނުދެވެއެވެ." ކޮމިޝަނުގެ ބަޔާނުގައި ވެއެވެ.
މި ބަޔާނުގައި އަންހެން ކުދިންނަށް ކުރާ އަނިޔާއާއި އިހުމާލުގެ މައްސަލަތަކުގައި ފަސް ނުޖެހި އަދި ލަސްކުރުމެއް ނެތި އިލްތިމާސްކޮށްފައިވާއިރު އަންހެން ކުދިންގެ ހާލަތު މިހާރަށްވުރެ ރަނގަޅު ކުރުމަށް އެކުދިންނަށް ދިމާވާ އަނިޔާއާއި އިހުމާލުގެ މައްސަލަތައް ރިޕޯޓު ކުރުމަށް ބާރުއެޅުމުގެ ގޮތުން މުއައްސަސާތަކުން ކުރާ މަސައްކަތް އިތުރުކޮށް، އަނިޔާ ލިބޭ އަންހެން ކުދިންގެ ރައްކާތެރިކަން ކަށަވަރުކުރުމަށާއި، މި ކުދިންނަށް ދައުލަތުން ފޯރުކޮށްދޭންޖެހޭ ރައްކާތެރިކަން ކަށަވަރު ކުރުމަށް ވެސް އެދިފައި ވެއެވެ.
"... އަންހެން ކުދިންގެ ޙާލަތު ރަނގަޅުކޮށް، އެ ކުދިންނަށް ކުރިމަތިވާ އަނިޔާއާއި އެންމެހާ ތަފާތުކުރުންތައް ނައްތާލުމަށް އެކުލަވާލާ ސިޔާސަތުތައް ހަރުދަނާ ގޮތެއްގައި ފަރުމާކުރުމަށާއި، އަންހެން ކުދިންނާ ގުޅުން ހުރި ތަފާސްހިސާބު އެއްކުރުމުގެ ހަރުދަނާ ނިޒާމެއް ގާއިމް ކުރުމަށް މި ކޮމިޝަނުން އިލްތިމާސްކުރަމެވެ." ބަޔާނުގައި ވެއެވެ.
ބައިނަލްއަގުވާމީ ގޮތުން އަންހެން ކުދިންގެ ދުވަސް ފާހަގަ ކުރަނީ އަންހެން ކުދިންނަށް ކުރިމަތިވާ ގޮންޖެހުތައް ނައްތާލައި، އެކުދިންގެ ހައްގުތައް ކަށަވަރުކޮށް، ހަމަހަމަކަން ގާއިމު ކުތުމަށެވެ. މި އަހަރުގެ އަންހެން ކުދިންގެ ދުވަހުގެ ޝިޢާރަކީ "ގާލްސް ޕްރޮގްރެސް – ގޯލްސް ޕްރޮގްރެސް: އަ ގްލޯބަލް ޑޭޓާ މޫވްމަންޓް" އެވެ. މި ޝިޢާރުގެ އަމާޒަކީ ދެމެހެއްޓެނިވި ތަރައްގީގެ ލަނޑުދަނޑިތައް 2030 ވަނަ އަހަރާ ހަމައަށް ހާޞިލްކުރުމުގައި އަންހެން ކުދިންނަށް ހުރި ގޮންޖެހުންތައް ތަފްޞީލީގޮތަކަށް ދެނެގަނެ، މޮނިޓާ ކުރެވޭނެ ގޮތަކަށް އަންހެންކުދިންނާ ގުޅުން ހުރި ތަފާސްހިސާބު އެއްކުރުމެވެ.