މި އަހަރުގެ އަންހެން ކުދިންގެ ދުވަސް ފާހަގަކުރުމުގެ ގޮތުން، އެކި ދާއިރާތަކުގައި މަސައްކަތް ކުރާ އަންހެނުންގެ މަސައްކަތް ގާތުން ތަޖުރިބާކޮށްލުމުގެ ފުރުސަތު 27 ކުއްޖަކަށް ޖެންޑާ މިނިސްޓްރީން ދީފި އެވެ.
އަންހެންކުދިން ބާރުވެރިކުރުވުމަށް "ގާލް އިނިޝިއޭޓިވް" ނަމުގައި ހިންގި އެ ހަރަކާތުގައި ބައިވެރިވެފައިވަނީ 16 އަހަރާއި 17 އަހަރާ ދެމެދުގެ އަންހެން ކުދިންނެވެ. މިއަދު ކުރިއަށްގެންދިޔަ އެ ހަރަކާތުގައި ތަފާތު އެކި ދާއިރާތަކުގެ އޮފީސްތަކުގައި މަސައްކަތް ކުރާ ފާހަގަކޮށްލެވޭ އަންހެން މުވައްޒަފުންނާއެކު އެ މީހުންގެ އޮފީސްތަކުގައި އެކުދިން ވަނީ މަސައްކަތްކޮށްފަ އެވެ. ޖެންޑަ މިނިސްޓްރީން މިއަދު ވަނީ އެ ޕްރޮގްރާމްގެ ބައިވެރިންނަށް ސެޓްފިކެޓް ދީފަ އެވެ.
އަންހެންކުދިން ބާރުވެރިކުރުވުމުގެ މަގްސަދުގައި ބޭއްވި އެ ހަރަކާތާ ބެހޭގޮތުން ޖެންޑަ މިނިސްޓަރު ޒެނީޝާ ޝަހީދު ޒަކީ ވިދާޅުވީ، އެ ޕްރޮގްރާމްގެ ސަބަބުން އަންހެން ކުދިންނަށް އެކުދިންގެ ހުވަފެންތަކާއި އުންމީދުތައް ހާސިލްކުރުމަށް ހިއްވަރެއް ލިބިގެންދާނެކަމަށް އުންމީދު ކުރައްވާ ކަމަށެވެ. އަދި ދެ ޖިންސްގެ ހަމަހަމަކަން ގާއިމްކުރުމާއި ހުރިހާ ފަންތިއެއްގައިވެސް އަންހެނުންނަށް މަސައްކަތް ކުރެވޭނެ ކަމުގެ ޔަގީންކަން އެކުދިންނަށް ލިބިގެންދާނެ ކަމަށެވެ.
މިއަދުގެ ޕްރޮގްރާމުން ލިބުނު ތަޖުރިބާ ބޭކާރުކޮށް ނުލުމަށް މިނިސްޓަރު ވަނީ ހުރިހާ ކުދިންނަށް އިލްތިމާސް ކުރައްވާފަ އެވެ. އަދި ޕްރޮގްރާމުން ދަސްވި ކަންކަން އެކުވެރިންނާއެކު ހިއްސާކޮށް، އަމިއްލަ ނަފްސަށް އިތުބާރު ކުރުމަށް ރާއްޖޭގެ ހުރިހާ އަންހެންކުދިންނަށް މިނިސްޓަރު ނަސޭހަތް ދެއްވި އެވެ.