- ގައިދީއަކު މަސައްކަތް ކުރީ އެހެން މީހުން ފިލުވަން
- އެއްވެސް ގައިދީއަކަށް ނުފިލުނު، އެންމެން ހަމަ
- ފުލުހުން ވަނީ ސެކިއުރިޓީ ވަރުގަދަކޮށްފައި
ފުލުހުންގެ ތަހުގީގު ޖަލު، ދޫނިދޫގައި ތިބި ގައިދީންތަކެއް ޖަލު ފަޅާލައި ނިކުމެ ފިލަން އުޅެނިކޮށް ފުލުހުން ހުއްޓުވައިފި އެވެ.
ފުލުހުން ބުނީ ރޭ ދަންވަރު 3:30 އެހާކަން ހާއިރު ގޮޅިއެއްގައި ބަންދުކޮށްފައި ހުރި ގައިދީއަކު ޖަލުގެ ގޮޅީގެ ތަޅު ހަލާކުކޮށްލައިގެން ނިކުމެ، އެހެން ގޮޅިތަކުގެ ތަޅު ވެސް ހަލާކުކޮށް، ގިނަ އަދަދެއްގެ ގައިދީން ފިލުވުމަށް މަސައްކަތް ކުރި ކަމަށެވެ. އެހެން ނަމަވެސް އެ ވަގުތު ސެކިއުރިޓީ ބަލަހައްޓަން ތިބި ފުލުހުންގެ ސަމާލުކަމަށް އެކަން އައިސް އެ މީހާ ވަގުތުން ހުއްޓިވިކަމަށް ފުލުހުން ބުންޏެވެ.
"ދޫނިދޫ ޖަލުގެ ސެކިއުރީޓީ ކަށަވަރު ކުރެވި އެ ކަން މިހާރު ވަނީ ކޮންޓްރޯލް ކުރެވިފައި،" ފުލުހުން ބުންޏެވެ.
ޖަލުގެ ސެކިއުރިޓީ ޔަގީންކޮށް ސަލާމަތީ ގޮތުން އަޅަން ޖެހޭ އިތުރު ފިޔަވަޅުތައް އެޅުމަށް ފަހު، ޖަލުގައި ތިބި ގައިދީންގެ އަދަދު ވެސް ބަލާފައިވާ ކަމަށާއި ހުރިހާ ގައިދީން ވެސް ހަމަޔަަށް ތިބި ކަމަށް ފުލުހުން ބުންޏެވެ. އެ ހާދިސާ ހިނގަން ދިމާވި ސަބަބުތައް ދެނެ ގަނެ، އަޅަން ޖެހޭ ފިޔަވަޅުތައް އެޅުމުގެ މަސައްކަތް މިހާރު ވަނީ ފަށައިފަ އެވެ.
"އެއްވެސް ގައިދީއަކަށް ފިލިފައެއް ނުވެ އެވެ. އަދި ހުރިހާ ގައިދީން ވެސް ހަމަޔަށް އެބަ ތިއްބެވެ،" ފުލުހުން ބުންޏެވެ.