ސުޕްރީމް ކޯޓުގެ ފަނޑިޔާރުކަމުން، އެ ކޯޓުގެ ދެ އަންހެން ފަނޑިޔާރުން ވަކިކުރަން ވެރިކަން ކުރާ ޕީއެންސީން މަސައްކަތް ކުރަމުންދާ ކަމަށް އަޑު އަރާފައިވަނިކޮށް، ރައީސް އަބްދުﷲ ޔާމީންގެ މައްސަލައިގެ ބެންޗުގައި އެ ދެ ފަނޑިޔާރުން ހިމެނިއްޖެ އެވެ.
ސުޕްރީމް ކޯޓުގައި ތިއްބަވާ ހަމައެކަނި ދެ އަންހެން ފަނޑިޔާރުން ކަމަށް ޑރ. އަޒްމިރާލްދާ ޒާހިރު އަދި އައިޝާ ޝުޖޫން މުހައްމަދު، މި ސަރުކާރުން ވަކިކުރަން އުޅޭ ކަމަށް އަޑުތައް ވަނީ އަރާފަ އެވެ.
ރަސްމީ ސިފައެއްގައި މި ވާހަކަ ދެކެވިފައި ނެތް ނަމަވެސް އަޑުތައް އަރާފައިވަނީ ސުޕްރީމް ކޯޓުގައި އަންހެން ފަނޑިޔާރުންނަށް ނުތިބެވޭ ގޮތަށް ގާނޫނަށް ބަދަލު ގެންނަން ސަރުކާރުން މަސައްކަތް ކުރަމުން އަންނަ ކަމަށެވެ.
ފަނޑިޔާރުން މަގާމުން ވަކިކުރެވޭނީ ރައްޔިތުންގެ މަޖިލީހަށެވެ. މަޖިލީހަށް ފަނޑިޔާރުން ވަކިކުރެވޭނީ ފަނޑިޔާރުންގެ މަގާމާ އެކަށީގެންނުވާ ކަމެއް ކުރުމުން ފަނޑިޔާރުން މަގާމުން ވަކިކުރުމަށް ޖޭއެސްސީން މަޖިލީހަށް ހުށަހެޅުމުންނެވެ.
އަޒްމިރާލްދާ އަދި ޝުޖޫންއާ ގުޅޭ އެއްވެސް މައްސަލައެއް މިހާތަނަށް ޖޭއެސްސީން ބެލިކަމެއް އެނގިފައެއް ނުވެ އއެވެ. އެހެންކަމުން މި ދެ ފަނޑިޔާރުން ވަކިކުރުމަކީ އުސޫލީ ގޮތުން ބަލާއިރު މަޖިލީހަށް އުނދަގޫ މަގެކެވެ. އެކަމަކު ގާނޫނު ބަދަލުކޮށްގެން ފަނޑިޔާރުން ވަކިކުރުމަކީ މަޖިލީހަށް އުނދަގޫ ކަމެއް ނޫނެވެ. 2014 ވަނަ އަހަރު ރައީސް ޔާމީންގެ ވެރިކަމުގައިވެސް ގާނޫނަށް ގެނައި ބަދަލަކާއެކު އޭރުގެ އުއްތަމަ ފަނޑިޔާރާއި ސުޕްރީމް ކޯޓުގެ އެހެން ފަނޑިޔާރަކު މަގާމުން ކުއްލި ގޮތަކަށް ވަކިކުރި އެވެ.
ސުޕްރީމް ކޯޓުގެ ދެ އަންހެން ފަނޑިޔާރުން މަގާމުން ވަކިކުރާނެ ކަމަށް އަޑުތައް އަރާފައިވަނިކޮށް، އަންނަ ހަފްތާގައި ފަށާ ރައީސް ޔާމީންގެ މައްސަލައިގެ ބެންޗުގައި މި ދެ ފަނޑިޔާރުން ވަނީ ހިމެނިފަ އެވެ. މި ދެ ފަނޑިޔާރުންނާއެކު ދެން އެ މައްސަލައިގެ ބެންޗުގައި ހިމެނެނީ ޑރ. މުހައްމަދު އިބްރާހީމް އެވެ. ޔާމީންގެ މައްސަލަ ސުޕްރީމް ކޯޓުގައި ފަށާނީ އަންނަ ހަފްތާ ގައެވެ.
ސުޕްރީމް ކޯޓުގެ ދެ އަންހެން ފަނޑިޔާރުން ވަކިކުރާނެ ކަމުގެ އަޑުތައް އަރާފައިވާއިރު، މި ދެ ފަނޑިޔާރުންގެ ތެރެއިން އައިޝާ ޝުޖޫން މުހައްމަދަކީ ރާއްޖޭގައި އެންމެ ފުރަތަމަ އައްޔަން ކުރެވުނު ދެ އަންހެން ފަނޑިޔާރުންގެ ތެރެއިން އެކަކެވެ. ޝުޖޫން އެންމެ ފުރަތަމަ ފަނޑިޔާރު ކަމަށް އައްޔަން ކުރައްވާފައިވަނީ ރައީސް މައުމޫންގެ ވެރިކަމުގައި 2007 ވަނަ އަހަރު އެވެ.
ފަނޑިޔާރު ޑރ. އަޒްމިރާލްދާ ޒާހިރަކީ، ހައިކޯޓަށް އެންމެ ފުރަތަމަ އައްޔަން ކުރެވުނު އަންހެން ފަނޑިޔާރެވެ. ޑރ. އަޒްމިރާލްދާ ޒާހިރު އެންމެ ފުރަތަމަ ފަނޑިޔާރު ކަމަށް އައްޔަންކުރައްވާފައިވަނީ 2011 ވަނަ އަހަރުގެ ކުރީކޮޅުއެވެ.