ފުވައްމުލަކު ގެއެއްގެ ބަދިގޭގައި ބަތްކާން ގެންގުޅުނު ތަށްޓެއް ތަޅާލި މީހަކު ޖަލަށްލުމަށް ކޯޓުން ހުކުމްކޮށްފި އެވެ.
ޏ. ފުވައްމަލު ގެއެއްގައި މިއަހަރުގެ ކުރީކޮޅު ހިނގި ކަމަކާ ގުޅިގެން ދައުލަތުން ދިވެހި ފިރިހެނެއްގެ މައްޗަށް އުފުލާފައިވަނީ މުދަލަށް ގެއްލުން ދިނުމުގެ ކުށުގެ ދައުވާ އެވެ.
މި އަހަރުގެ ފެބްރުއަރީ މަހުގެ 23 ވަނަ ދުވަހު ހެނދުނު، ހިނގި މި ކަމެއްގެ ޝަރީއަތް ފުރަތަމަ ފުވައްމުލަކުގައި ކުރިއަށް ގެންދިޔަ ނަމަވެސް ފަހުން އެ މައްސަލަ އަވަސް ނިޔާގެ މައްސަލައެއްގެ ގޮތުގައި ކުރިއަށް ގެންދިޔައީ މާފުށީ ގައެވެ.
މައްސަލައިގެ ޝަރީއަތުގައި ކުށްކުރި މީހާ ވަނީ ބަތްކާ ތަށްޓެއް ތަޅާލި ކަމަށް އިއުތިރާފުވެފަ އެވެ.
ކުށް ސާބިތުވާ ކަމަށް ކަނޑައަޅައި މާފުށީ ކޯޓުން މި މައްސަލައިގައި ކުރި ހުކުމަކީ 27 ދުވަހުގެ ޖަލު ހުކުމެވެ.
މި ކުށުގެ އަސާސީ އަދަބަކީ އެއް މަހާއި ހަ ދުވަހުގެ ޖަލު ހުކުމެކެވެ. ނަމަވަސް އެ ހުކުމުން 10 ވަރަކަށް ދުވަސް އުނިވީ ދައުވާ ލިބުނު ފަރާތުން ކުށަށް އިއުތިރާފުވެފައިވާތީ އެވެ.