ފަތާފައި ގޮސް މާފުށީ ޖަލަށް ވަންނަން އުޅުނު މީހެއްގެ މައްޗަށް ޖަލު ހުކުމެއް އިއްވައިފި އެވެ.
ފަތާފައި މީހަކު ޖަލަށް ވަންނަން އުޅުނު މައްސަލައަކީ 2020 ވަނަ އަހަރުގެ ސެޕްޓެމްބަރު މަހުގެ ރެއެއްގެ ދަންވަރު، ލޯންޗެއްގައި މާފުށީ ހުޅަނގު ފަރާތުން ޖަލާ ދިމާއަށް ލޯންޗެއްގައި ގޮސް މޫދަށް ފުންމާލައިގެން ޖަލުގެ ސަރަހައްދަށް ވަންނަން އުޅުނު މައްސަލަ އެކެވެ.
މި މައްސަލައިގައި ޖަލަށް ވަންނަން މަސައްކަތް ކުރި މީހާގެ މައްޗަށް ދައުލަތުން ކޮށްފައިވަނީ އެނގިހުރެ ހުއްދަ ނޫން ތަނަކަށް ވަންނަން އުޅުނުކަމުގެ ކުށުގެ ދައުވާއަކާއި މަނާކުރެވިފައިވާ އެއްޗެއް މީހުން ބަންދު ކުރާ މަރުކަޒެއްގައި ތިބޭ މީހުންނަށް ފަސޭހައިން ހޯދިދާނެ ހިސާބެއްގައި ބެހެއްޓުމުގެ ދައުވާ އެވެ.
މި ދެ ދައުވާ އުފުލާފައިވަނީ މާފުށީ މެޖިސްޓްރޭޓް ކޯޓު ގައެވެ. ދައުވާ ލިބޭ މީހާގެ މައްޗަށް ދެ ދައުވާވެސް ވަނީ ސާބިތުވެފަ އެވެ.
މި މައްސަލައިގެ ޝަރީއަތުގައި އެ މީހާ ވަނީ ފަތާފައި އެތަނަށް ވަންނަން މަސައްކަތް ކުރި ކަމަށް އިއުތިރާފް ވެފަ އެވެ. އެކަމަކު އޭނާ ބުނީ އެކަން ކުރަން އުޅުނުއިރު އެއީ މަނާކަމެއް ކަމެއް ނޭނގޭ ކަމަށެވެ. އަދި އޭނާ މަސައްކަތް ކުރީ ރަށްޓެއްސަކު ހަވާލުކުރި އެއްޗެއް ހަވާލުކުރަން ކަމަށްވެސް ޝަރީއަތުގައި ބުންޏެވެ.
މަނާކުރެވިފައިވާ އެއްޗެއް މީހުން ބަންދު ކުރާ މަރުކަޒެއްގައި ތިބޭ މީހުންނަށް ފަސޭހައިން ހޯދިދާނެ ހިސާބެއްގައި ބެހެއްޓުމުގެ ކުށުގެ ދައުވާ ސާބިތުވުމާ ގުޅިގެން ކުށްކުރި މީހާގެ މައްޗަށް އިއްވާފައިވަނީ ހަ މަސް ދުވަހުގެ ޖަލު ހުކުމެވެ. އަދި އެނގިހުރެ ހުއްދަ ނޫން ތަނަކަށް ވަންނަން އުޅުނުކަމުގެ ކުށުގެ ދައުވާއާ ގުޅިގެން އެ މީހާގެ މައްޗަށް އިއްވާފައިވަނީ ދޮޅު މަސް ދުވަހުގެ ޖަލު ހުކުމެވެ.