ދަރިފުޅަށް ކާންދޭން ފަށާއިރު، ތައްޔާރު ކޮށްލެވިދާނެ ކާނާ

ދަރިފުޅަށް ކާންދޭން ފަށާ ދުވަސް ކައިރި ވާއިރު، ބައެއް މައިންބަފައިން އެންމެ ކަން ބޮޑުވާނީ ދަރިފުޅު ނުކައިފާނެތީ އެވެ. ނުވަތަ ނުގުޅޭ ކާ އެއްޗެއް ދެވިދާނެތީ އެވެ. މިހެންވެ ބައެއް ފަހަރު ފުޅީގައި ނުވަތަ ޕެކެޓްގައި ބަންދުކޮށްފައި ހުންނަ ކާނާ ދެވޭ ގޮތްވެ އެވެ. އަދި އެފަދަ އެއްޗެހި ދަރިފުޅު ނުކާން ބޮޑާ ހާކަންފަށާ ހިސާބުން އެއީ ނުކާ ކުއްޖެއްގެ ގޮތުގައި ލޭބަލްވެ ގަދަކަމުން ކާންދެވޭތަން އާދެ އެވެ.

އަބަދުވެސް ހަނދާން ކުރަންވީ މީރު އެއްޗެހި އަހަރެމެން ބޮޑެތި މީހުންނަށް ވެސް ކެވޭ ފަދައިން ކުޑަކުދިން ވެސް އެކުދިންނަށް މީރުވާ ގޮތަށް ކާ އެއްޗެހި ތައްޔާރު ކޮށްފައި ދިނުމުން ކާނެ ކަމެވެ. އަދި ނުބައި އެއްޗެހި ނުކާން ބޮޑާ ހާކާނެ އެވެ. ހުރިހާ ވައްތަރެއްގެ އެއްޗެހި ބައެއް ކުދިން ނުކައިފާނެ އެވެ. ބައެއް ކުދިންނަކީ ދޮންކެޔޮ ކާ ކުދިންނެވެ. އަނެއްބައި ކުދިންނަށް ދޮންކޮޔެ ނުބައި ވެދާނެ އެވެ. އެހެންވެއްޖެ ނަމަ އެކުދިންނަށް މީރު އެއްޗެއް ދޭށެވެ.

ތަރުކާރީ ޕިއުރީ

އަލުވި- އަލުވީގައި ވިޓަމިން އޭ އަދި ސީ ހިމެނެ އެވެ.
ކެރެޓް- ވިޓަމިން އޭ އަދި ކޭ ކެރެޓްގައި ހިމެނެ އެވެ.
ބްރޮކޮލި- ގިނަ އަދަދަކަށް ވިޓަމިން ބީ ބޮރޮކޮލީގައި ހިމެނެ އެވެ

ތައްޔާރު ކުރާނެ ގޮތް

ހުރިހާ އެއްޗެއް ބޭނުންވާ ވަރަށް ތުނިކޮށް ކޮށާލުމަށްފަހު ސްޓީމް ކޮށްލާށެވެ. އަދި ސްޓީމް ކޮށް ނިމޭއިރު، ކުޑަ ފެންފޮދެއް ބާކިވެފައި ހުރި ނަމަވެސް އުކާ ނުލާށެވެ. އެ ފެންފޮދު މިކްސް ކުރާއިރު ބޭނުން ކޮށްލާށެވެ.

މޭވާ ޕިއުރީ

އާފަލު - އާފަލުފައި ގިނަ އަދަދަކަށް އެންޓިއޮކްސިޑަންޓްސް އާއި ވިޓަމިން އޭ ހިމެނެ އެވެ.
ދޮންކެޔޮ - މިއީ މެގްނޭސިއަމް އާއި ޕްޓޭސިއަމް ހިމެނޭ މޭވާ އެކެވެ.
އެވަކާޑޯ - މިއީ ކުދިންގެ ސިކުނޑި އާއި ހިތަށް އެންމެ ރަނގަޅު މޭވާ އެވެ.

މި ތިން މޭވާ ބޭނުންވާ ވަރަށް ކޮށާލުމަށްފަހު މިކްސް ކޮށްލާށެވެ. ދޮންކެޔޮ މިކްސް ކުރުމުގެ ކުރިން ކަރުގަނޑު ނަގާފައި މިކްސް ކުރާށެވެ. ސަބަބަކީ ދޮންކޭލަކީ ބައެއް ކުދިން ބަނޑުހަރުވާ މޭވާއަކަށް ވާތީ އެވެ.

ރައިސް ބްރެކްފާސްޓް ޕުޑިން

- 2/1 ޖޯޑު ބްރައުން ރައިސް
- 4/1 ހިކިމޭބިސްކަދުރު (އޮޕްޝަނަލް)
- 2 ސަމްސާ ފޮނިތޮށި
- 2/1 ސަމްސާ އިނގުރު
- 2 ސަމްސާ ފޯމިއުލާ މިލްކް

މި ތަކެތި ކުޑަ ތެއްޔެއްގައި ހަނޑޫކޮޅު މަޑުވަންދެން ކައްކާލާށެވެ. ކައްކަން ވާނީ ކުޑަކޮށް ދިޔާކޮށް ހުންނަ ވަރަށެވެ. ކައްކާ ނިމުމުން ފޯމިއުލާ މިލްްކް ބަތުގެ ތެރެއަށް އަޅާ މިކްސް ކޮށްލާށެވެ. އަދި ފޮނިތޮއްޓާއި އިނގުރު ވެސް އެއްކޮށްލާށެވެ. މާބޮޑަށް ބަތްގަނޑު ހިކި ނަމަ ކުޑަ ފެންފޮދެއް އަޅާ ދިޔައި ކޮށްލެވިދާނެ އެވެ.

ފުރުޓް ކޮމްބޯ ޕިއުރީ

މޭވާތައް އެއްކުރާއިރު، ސީރިއަލް ނުވަތަ ޔޯގަޓްގެ ތެރެއަށް މޭވާ އެއްކުރެވިދާނެ އެވެ.

- ޕީޗް އާއި ކައްޓަލަ.
- އާފަލާއި ކެރެޓް.
- ބްލޫބެރީ، އާފަލު އަދި ޕެއާސް.
- ދޮންކެޔޮ އަދި ބްލޫބެރީ.
- އާފަލު އަދި ޕްލަމް