މަދުވެގެން ދުވާލަކު އަށް ތަށި ފެންބޯންޖެހޭ ވާހަކަ އެންމެންވެސް އަހަ އެވެ. އެހެންނަމަވެސް ހެނދުނު ތެދުވެ ބޯލާ ފެންތަށިންވާ ފައިދާ އެނގޭ ހެއްޔެވެ؟.
ފެންބޯން ޖެހެނީ ކީއްވެ؟
އަހަރެމެން ހަށިގަނޑުގެ 70 ޕަސެންޓަކީ ފެނެވެ. އަދި ހަށިގަނޑުގެ މަސައްކަތް ރަނގަޅަށް ފަންކްޝަން ކުރަން ފެން މުހިންމު ރޯލެއް އަދާކުރެ އެވެ. އަދި ހަށިގަނޑު ބަލިތަކުން ދުރުކޮށްދީ ސާފުކޮށްދިނުމަށް ވެސް އެހީވެދެ އެވެ.
ހަށިގަނޑުގެ ތެރޭ އުފެދޭ ވިހާ ސާފު ކޮށްދޭ:
ނިދާހޭލުމަށްފަހު ހުސްބަނޑާހުރެ ބޯލާ ފެންތަށިން ހަށިގަނޑުގެ ތެރޭ އުފެދިފައި ހުންނަ ވިހަތައް ބޭރުކޮށް، ހަށިގަނޑުގެ އެތެރެ އާއި ބޭރު ތާޒާކޮށްލަ އެވެ. އަދި ހަށިގަނޑުގައި އާ ސެލް އުފެއްދުމަށް އެހީތެރިވެދެ އެވެ.
މެޓަބޮލިޒަމް ރޭޓް އިތުރުކޮށްދޭ:
ހުސްބަނޑާ ހުރެ ފެން ބުއިމުން މެޓަބޮލިކް ރޭޓް އިތުރުކޮށްދޭއިރު، މިއީ ސްޓްރިކްޓް ޑައިޓް ތަކުގައި އުޅޭ މީހުންނަށް ވަރަށް ރަނގަޅު ކަމެކެވެ. މެޓަބޮލިކްރޭޓް އިތުރުވާ ވަރަކަށް ޑައިޖެސްޓިވް ސިސްޓަމްގެ މަސައްކަތް އިތުރުކޮށްދެ އެވެ. އަދި ގޮހޮރު ސާފުކޮށްދީ ކާއެއްޗެހީގެ ނިއުޓްރިއަންޓްސް އެބްސޯބް ކުރަން ފަސޭހަވެ އެވެ.
ހަޖަމު ކުރުމާއި މޭންދިލަ ނެގުން:
ރަނގަޅަށް ހަޖަމު ނުވެ ބަނޑުތެރޭ އެސިޑިޓީ އިތުރުުމުން މޭންދިލަނަގާ ގޮތްވެ އެވެ. މިއީ ރަނގަޅަށް ހަޖަމުނުވެ ގިނައިރުވުން ދިމާވާ މައްސަލައެކެވެ. ހުސްބަނޑާ ހުރެ ފެންބުއިމުން ހަޖަމު ކުރަން ފަސޭހަވެ، މޭންދިލަނަގާ މައްސަލައަށް ހައްލު ލިބެ އެވެ.
ކިޑްނީގައި ހިލަ ހެދުމާއި ބްލެޑާ އިންފެކްޝަން ވުމުން ދުރުކޮށްދޭ:
ކިޑްނީ މައްސަލަ އަކީ މިހާރު އެންމެ އާންމުކޮށް ރާއްޖޭގެ މީހުންނަށް ދިމާވާ މައްސަލަ އެވެ. ހެނދުނު ތެދުވެ ބޯލާ ފެންތަށިން ކިޑްނީގައި ހިލަ ހެދުމާއި ބްލެޑާ އިންފެކްޝަނާ ދުރުކޮށްދެ އެވެ. އެގޮތުން ބްލެޑާގެ ތެރޭ އުފެދޭ ވިހަ މާއްދާތައް ބޭރުކޮށްދެ އެވެ.
ހަމާއި އިސްތަށިގަނޑުގެ ދުޅަހެޔޮކަމަށް:
ހަށިގަނޑުން ފެން މަދުވުމުން ހަމުގެ އުޖާލާކަން ގެއްލި ރޫޖެހުމަށް މަގުފަހިވެ އެވެ. ހަށިގަނޑަށް ބޭނުންވާ ވަރަށް ފެން ބުއިމުން ރަނގަޅަށް ލޭ ދައުރުވެ ހަން އުޖާލާވެ އެވެ. އަދި ފެންމަދުވުމަކީ އިސްތަށިގަނޑަށް ވެސް އޭގެ އަސަރު ކުރާ ކަމަކެވެ. ހުސްބަނޑާހުރެ ގިނައިން ފެންބޯނަމަ އިސތަށިގަނޑަށް އެކަމުގެ ރަނގަޅު އަސަރު ކުރެ އެވެ.