ސައިންސް ފިކްޝަން ފިލްމު "ގޯސްޓް އިން ދަ ޝެލް" ގެ ފުރަތަމަ ޓްރެއިލާ މިއަދު އާންމުކޮށްފި އެވެ.
ހޮލީވުޑްގެ މަޝްހޫރު ބަތަލާ ސްކާލެޓް ޖޯހޭންސަން ލީޑް ރޯލުކުޅެފައިވާ މި ފިލްމަކީ ޖަޕާނުގެ މަގްބޫލު މަންގާ ފްރެންޗައިޒެއް ކަމުގައިވާ "ދަ ގޯސްޓް އިން ދަ ޝެލް" ގެ އަސްލަށް އުފައްދާފައިވާ ފިލްމެކެވެ. ފިލްމުގެ މެއިން ޕްލޮޓުގައި ދައްކުވައި ދެނީ، 21 ވަނަ ގަރުނުގެ ޖަޕާނުގައި ސައިބާ ކްރައިމް އާއި ސައިބާ ޓެރަރިސްޓުންނާ ދެކޮޅަށް ހަރަކާތްތެރިވާ ޕަބްލިކް ސެކިއުރިޓީ ސެކްޝަން 9 ގެ ނަން ދީފައިވާ ސަލާމަތީ ގްރޫޕަކުން ހިންގާ ވަރުގަދަ ހަރަކާތްތަކެކެވެ.
މިއީ 1989 ވަނަ އަހަރުން ފެށިގެން 1990 ވަނަ އަހަރުގެ ނިޔަލަށް ޖަޕާނުގައި ގަވާއިދުން ޝައިއުކުރި މަންގާ "ގޯސްޓް އިން ދަ ޝެލް" ގެ އަސްލަށް އުފައްދާ ފުރަތަމަ ލައިވް އެކްޝަން ފިލްމެވެ. ސްކާލެޓް ޖޯހޭންސަން ފިލްމުގައި ކުޅެފައި ވަނީ ސައިބާ ޓެރަރިސްޓުންނާ ދެކޮޅު ސަލާމަތީ ގްރޫޕްގެ ކޮމާންޑަރު، ދަ މޭޖާ އެވެ. މި ކެރެކްޓާ އަކީ، އާދަޔާހިލާފު ހުނަރުތަކެއް ލިބިފައިވާ ފުލް ބޮޑީ ޕްރޮސްތެޓިކް ރޮބަޓެކެވެ.
"ގޯސްޓް އިން ދަ ޝެލް" އުފައްދާފައި ވަނީ މަޝްހޫރު ޑައިރެކްޓަރު ސްޓީވަން ސްޕީލްބާގްގެ ޑްރީމް ވޯކްސް އިންނެވެ. އޭނާގެ ކުންފުނިން މި ފިލްމަށް މަންގާގެ ރައިޓްސް ގަނެފައި ވަނީ 2008 ވަނަ އަހަރު އެވެ.
ފިލްމު ޑައިރެކްޓްކޮށްފައި ވަނީ ބެލުންތެރިންގެ މެދުގައި 2012 ވަނަ އަހަރު ވަރަށް ބޮޑު މަގްބޫލުކަމެއް ހޯދި ފެންޓަސީ ފިލްމެއް ކަމުގައިވާ "ސްނޯ ވައިޓް އެންޑަ ދަ ހަންޓްސްމަން" ގެ ޑައިރެކްޓަރު ރުޕަޓް ސޭންޑާސް އެވެ. އެހެންކަމުން މި ފިލްމު ވެގެންދާނީ އޭނާގެ ދެ ވަނަ ފީޗާ ފިލްމަށެވެ.
"ގޯސްޓް އިން ދަ ޝެލް" ޓޫޑީކޮށް، ތްރީޑީކޮށް އަދި އައިމެކްސް ތްރީޑީގައި ނެރުމަށް ހަމަޖެހިފައި ވަނީ އަންނަ އަހަރުގެ މާޗް މަހުގެ 31ގަ އެވެ.