މަޝްހޫރު އެނިމޭޓެޑް ފިލްމު "ބިއުޓީ އެންޑް ދަ ބީސްޓް" ގެ ލައިވް އެކްޝަން ފިލްމުގެ ފުރަތަމަ ޓްރެއިލާ މިހާރު މިވަނީ އާންމުކޮށްފަ އެވެ. ޑިޒްނީއިން އުފެއްދި މި ފިލްމްގެ ޓްރެއިލާ އިއްޔެ ރިލީޒް ކޮށްފައިވާއިރު، ފިލްމުގެ މުހިންމު ކެރެކްޓާތައް ވަނީ ދައްކާލާފަ އެވެ.
ކާޓޫންގައި ވެސް ފެނިގެންދާ ކާސަލް އަށް ނިސްބަތްވާ، ވާހަކަ ދައްކާ ކެރެކްޓާސްތައް ވެސް ފެނިގެންދެ އެވެ. އޭގެ ތެރޭގައި މިސިޒް ޕޮޓްސް އާއި ކޮގްސްވޯތާއި ލުމެއިރީގެ އިތުރުން މެންޝަންގައި ހިމެނޭ މުހިންމު ކެރެކްޓާތައް ފެނެ އެވެ.
1991 ވަނަ އަހަރު ރިލީޒް ކުރި "ބިއުޓީ އެންޑް ދަ ބީސްޓް" އަކީ އޮސްކާގެ ތާރީޚުގައި އެންމެ މޮޅު ފިލްމުގެ އެވޯޑަށް ނޮމިނޭޓްވި ހަމައެކަނި އެނިމޭޓެޑް ފިލްމެވެ. ޑީޒްނީގެ މި ކްލެސިކް ލައިވް އެކްޝަން ފިލްމެއްގެ ގޮތުގައި އެނބުރި އަންނައިރު ބެއްލާގެ ރޯލުން ފެނިގެންދާނީ "ހެރީ ޕޮޓާ" ފިލްމު ސިލްސިލާ އިން މަޝްހޫރުވި އެމާ ވޮޓްސަން އެވެ.
ޑިޒްނީ އިން ލައިވް އެކްޝަން ފިލްމު ގެނެސްދެނީ އޭގެ އޮރިޖިނަލްގެ އަސްލު ނުގެއްލޭގޮތަށް، އެނިމޭޓެޑް ފިލްމާ ވަރަށް އެއްގޮތް ސިފަތަކެއް ޖައްސައިގެންނެވެ. އެގޮތުން ޓްރެއިލާގައި އާންމުކޮށްފައިވާ ގިނަ މަންޒަރުތަކަކީ ސީދާ އެނިމޭޓް ފިލްމުން ވެސް ފެންނަ ގިނަ މަންޒަރުތަކެވެ.
މި ފިލްމު ރިލީޒް ކުރުމަށް ހަމަޖެހިފައިވަނީ އަންނަ އަހަރުގެ މާޗު މަހުގެ 17 ވަނަ ދުވަހު އެވެ.