ވޯލްޑް ކަޕް ކޮލިފައިންގައި ލެޓްވިއާއާ ދެކޮޅަށް ހެޓްރިކް ހަދަން ލިބުނު ފުރުސަތު ޕޯޗްގަލްގެ ކްރިސްޓިއާނޯ ރޮނާލްޑޯ ނަގާލިއިރު އެސްޓޯނީއާ ކޮޅަށް ބެލްޖިއަމުން ލަނޑު ގޯންޏެއް އޮއްސާލައިފި އެވެ.
ޔޫރަޕްގެ ޗެމްޕިއަން ޕޯޗްގަލް އެސްޓޯނިއާއާ ދެކޮޅަށް ކުޅުނު މެޗް ކާމިޔާބު ކުރީ 4-1 ގެ ނަތީޖާއަކުންނެވެ. އަދި ބެލްޖިއަމް މެޗް ކާމިޔާބު ކުރީ 8-1 ގެ ތަފާތު ބޮޑު ނަތީޖާއަކުންނެވެ.
އަމިއްލަ ދަނޑުގައި ކުޅުނު ޕޯޗްގަލްގެ ފުރަތަމަ ލަނޑު މެޗްގެ 28 ވަނަ މިނެޓްގައި ރޮނާލްޑޯ ކާމިޔާބު ކުރީ ލިބުނު ޕެނަލްޓީ އަކުންނެވެ. ޕޯޗްގަލްގެ ލީޑް ޑަބަލް ކުރުމަށް ޓަކައި ރޮނާލްޑޯ އަށް ވަނީ އިތުރު ޕެނަލްޓީ އެއް ލިބިފަ އެވެ. ނަމަވެސް އޭނާ ފޮނުވާލި ބޯޅަ އަމާޒުވީ ގޯލް ދަނޑިއަށެވެ.
ބަދަލު ކުޅުންތެރިޔެއްގެ ގޮތުގައި ކުޅެން އެރި އާޓޫސް ޒީޒަން ވަނީ މެޗްގެ 67 ވަނަ މިނެޓްގައި ލެޓްވިއާއަށް ނަތީޖާ ހަމަހަމަ ކޮށްދީފަ އެވެ. އޭގެ ދެ މިނެޓް ފަހުން ރިކާޑޯ ކަރެސްމާ ހުރަސް ކޮށްދިން ބޯޅައަކުން ބޮލުން ކާމިޔާބު ކުރި ލަނޑުން ވިލިއަމް ކަވާލިއޯ ވަނީ އޭނާގެ ފުރަތަމަ އިންޓަނޭޝަނަލް ގޯލް ކާމިޔާބު ކޮށްފައެވެ.
މެޗްގެ 85 ވަނަ މިނެޓްގައި ކަރެސްމާ ތަނަވަސްކޮށްދިން ފުރުސަތަކުން ރޮނާލްޑޯ ވަނީ ޕޯޗްގަލްގެ ލީޑް ފުޅާ ކޮށްދީފަ އެވެ. ރޮނާލްޑޯ އަށް ވަނީ އޭނާގެ ހެޓްރިކް ހަދަން ދެވަނަ ފުރުސަތެއްވެސް ލިބިގެންގޮސްފަ އެވެ. ރެނާޓޯ ސަންޗޭސް ތަނަވަސް ކޮށްދިން ފަހި ފުރުސަތު ރޮނާލްޑޯ ފޮނުވާލުމުން ބޯޅަ އަމާޒުވީ ގޯލްގެ މަތީ ދަނޑިއަށެވެ. އޭގެ ފަހުން ޕޯޗްގަލްގެ ހަތަރު ވަނަ ލަނޑު ރަފޭލް ގުއެރޭރޯ ތަނަވަސްކޮށްދިން ފުރުސަތަކުން ބުރުނޯ އަލްވޭސް ކާމިޔާބު ކުރީ 92 ވަނަ މިނެޓްގައެވެ.
ރޭ ގެ މެޗުން މޮޅުވެ ހޯދިން ތިން ޕޮއިންޓާއެކު ޕޯޗްގަލް އޮތީ ގުރޫޕް ބީ ގައި އެއް ވަނައިގައި އޮތް ސްވިޒަލެންޑަށް ވުރެ ތިން ޕޮއިންޓް ފަހަތުން ދެ ވަނައިގައެވެ. ސްވިޒަލޭންޑަށް ލިބިފައިވަނީ 12 ޕޮއިންޓެވެ.
ވެރިރަށް ބްރެސަލްގެ ކިންގް ބޯޑިއަން ސްޓޭޑިއަމްގައި އެސްޓޯނިއާ ދެކޮޅަށް ކުޅުނު މެޗްގައި ބެލްޖިއަމުން ޖެހި އަށް ލަނޑުގެ ތެރެއިން ޑްރައިސް މާޓެންސް އާއި ރޮމެލޫ ލުކާކޫ ވަނީ ކޮންމެ ކުޅުންތެރިޔަކު ދެ ލަނޑު ކާމިޔާބު ކޮށްފަ އެވެ.
އަނެއް ހަތަރު ލަނޑުގެ ތެރެއިން އެއް ލަނޑަކީ އެސްޓޯނިއާގެ ރެގްނާ ކްލެވަން އަތުން ބައިކޮޅަށް ވަން ލަނޑެކެވެ. އަނެއް ތިން ލަނޑު ކާމިޔާބު ކުރީ ތޯމަސް މަނިއޭ އާއި އެޑެން ހަޒާޑްގެ އިތުރުން ޔެނިކް ފެރޭރާ ކެރެސްކޯއެވެ. އެސްޓޯނިއާގެ ހަމަ އެކަނި ލަނޑު ކާމިޔާބު ކުރީ ހެންރީ އަނިއާއެވެ.
ރޭ، ލަގްޒަންބާކްއާ ދެކޮޅަށް ކުޅުނު މެޗް 3-1 ން ކާމިޔާބު ކުރީ ނެދަލޭންޑްސްއެވެ. އެޓީމުގެ ފުރަތަމަ ލަނޑު ކާމިޔާބު ކުރީ އާޔެން ރޮބެން އެވެ. އަނެއް ދެ ލަނޑު ކާމިޔާބު ކުރީ މެންފިސް ޑިޕޭ އެވެ. ލަގްޒަންބާގްގެ ލަނޑު ލިބުނު ޕެނަލްޓީ އަކުން ކާމިޔާބު ކުރީ ޗެނޮޓްއެވެ.