އަންނަ ޖެނުއަރީ މަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބު ފަސްކުރުމާމެދު އިދިކޮޅު ޕާޓީތަކުން ކަންބޮޑުވުން ފާޅުކޮށްފި އެވެ.
ލޯކަލް ކައުންސިލް އިންތިހާބު މިހާރު ބޭއްވުމަށް ތާވަލްކޮށްފައިވަނީ އަންނަ ޖެނުއަރީ މަހުގެ 14 ވަނަ ދުވަހު އެވެ. ނަމަވެސް ޕީޕީއެމްއިން ވަނީ އެ އިންތިހާބު ދެ މަހަށް ފަސް ކޮށްދިނުމަށް އެދި ސިވިލް ކޯޓަށް މައްސަލައެއް ވައްދާފަ އެވެ. މައްސަލާގައި ދެ ފަރާތުން ބަޔާން ވެސް ވަނީ ބަދަލުކޮށްފަ އެވެ.
އިންތިހާބު ފަސްކުރުމާމެދު ކަންބޮޑުވުން ފާޅުކޮށް އެމްޑީޕީގެ ސެކްރެޓްރީ ޖެނަރަލް އަނަސް އަބްދުލް ސައްތާރު ވިދާޅުވީ، ކައުންސިލް އިންތިހާބަށް އެމްޑީޕީއިން ގިނަ ތައްޔާރީތަކެއްވެ މިހާރު ވެސް ތައްޔާރުވަމުންދާއިރު އެ އިންތިހާބު ފަސްކޮށްފިނަމަ އެ ޕާޓީއަށް ބޮޑެތި ގެއްލުންތަކެއްވާނެ ކަމަށެވެ. އެ ޕާޓީން މިހާރު ވަނީ ޕްރައިމަރީތައް ބާއްވައި ކެނޑިޑޭޓުން ކަނޑައަޅާފަ އެވެ. އަނަސް ވިދާޅުވީ، އޭގެ ސަބަބުން ކެނޑިޑޭޓުންނަށާއި ވޯޓުލާ މީހުންނަށް ވެސް ދަތިވާނެ ކަމަށެވެ.
"އިންތިހާބު ލަސްކޮށްފިނަމަ ރީ ރަޖިސްޓްރޭޝަނަށް ވެސް ކުރި މިހާތަނަށް ކުރި މަސައްކަތްތައް އަލުން ބަލުން ކުރަން ޖެހޭނެ، ކެނޑިޑޭޓުންނަށް ވެސް އިތުރު ބުރަތަކެއް އަންނާނެ ކެމްޕެއިން ކުރުމުގައި ވެސް،" އަނަސް ވިދާޅުވި އެވެ. "ސްކޫލް ބަންދު ދުވަސްކޮޅެއް މިއީ، އެހެން އޮއްވާ ލަސްވެގެން މިދަނީ އަހަރުގެ މެދު ތެރެއަށް، އެހެންވެ ފަސްވެއްޖެނަމަ ކެނޑިޑޭޓުންނަށް ވެސް ވޯޓުލާ މީހުންނަށް ވެސް ދަތިވާނެ،"
އަދާލަތު ޕާޓީގެ ނައިބު ރައީސް އަލީ ޒާހިރު ވެސް ވަނީ މިކަމާ މިއަދު ކަންބޮޑުވުން ފާޅުކުރައްވާފަ އެވެ. އަލީ ޒާހިރު ވިދާޅުވީ، އިންތިހާބު ފަސްކުރުމަކީ އެ ޕާޓީން ގަބޫލުކުރާ އުސޫލެއް ނޫން ކަމަށެވެ. އަދި، ވަކި ޕާޓީއަކު ބޭނުންވުމުން އެހެން ޕާޓީތަކުގެ ހިޔާލު ނުހޯދާ އެފަދަ ގޮތަކަށް ކޯޓުން އިންތިހާބު ފަސްކުރުމަކީ ކަންބޮޑުވާ ކަމެއް ވެސް ކަމަށެވެ.
މިކަމާ ގުޅިގެން އިލެކްޝަން ކޮމިޝަންގެ މެންބަރު މުހައްމަދު ޝަކީލް ވިދާޅުވީ، އިންތިހާބާ ގުޅޭ ގޮތުން އަދި ކޯޓުން ހުކުމެއް ކޮށްފައި ނެތުމުން އިންތިހާބަށްވާން ޖެހޭ ތައްޔާރީތައް އެ ކޮމިޝަނުންވަމުންދާ ކަމަށެވެ. އަދި ކޯޓުގައި ހިނގަމުންދާ މައްސަލައަކާ ގުޅޭ ގޮތުން އެއްޗެއް ވިދާޅުވެވެން ނެތް ކަމަށެވެ.
ޕީޕީއެމްއިން ސިވިލް ކޯޓަށް މައްސަލަ ވައްދާފައިވަނީ، ޕާޓީ ހިންގުމުގައި ދިމާވި އުނދަގޫތަކެއްގެ ސަބަބުން ކަނޑައެޅިފައިވާ ތާރީހުގައި އިންތިހާބު ބޭއްވުމަށް ވާން ޖެހޭ ތައްޔާރީތައް އެ ޕާޓީއަށް ވެވިފައިނުވާތީ އެވެ.