- މިވަގުތު އެ ޓެކްސް ނެގުމުގެ ވިސްނުން ރައީސް ނުގެންގުޅުއްވާ
- ގިނަ އެމްޕީންގެ ވިސްނުމަކީ ވެސް އިންކަމް ޓެކްސް ނެގުން
- އިންކަމް ޓެކްސް ނަގަނީ ހަމައެކަނި ފައިސާ ހޯދާކަށް ނޫން
ގައުމު ހަރުދަނާ ގޮތެއްގައި ކުރިޔަށް ގެންދަން އިންކަމް ޓެކްސް ނަގަން ޖެހޭ ކަމަށާއި އޭގެ ސަބަބުން އިގްތިސާދުގެ ހާލަތު ދެނެގަނެވި އިތުރަށް ރަނގަޅު ކުރެވޭނެ ކަމަށް އިކޮނޮމިކް ޔޫތު ކައުންސިލްގެ ޗެއާ އަހުމަދު ޒުހޫރު ވިދާޅުވެއްޖެ އެވެ.
"އަވަސް" އަށް އިއްޔެ ދެއްވި ހާއްސަ އިންޓަވިއުއްގައި ޒުހޫރު ވިދާޅުވީ ދުނިޔޭގެ ތަރައްގީވެފައިވާ ގައުމުތަކުގައި އެ ގައުމެއްގެ ހަރަދުތައް ބަލަހައްޓަނީ ރައްޔިތުންނަށް ލިބޭ އާމްދަނީއަށް ހުރިހާ ރައްޔިތުން ހިއްސާވެގެން ކަމަށެވެ. ރާއްޖޭގައި ވެސް ހުރިހާ ހަރަދެއް ބަލަހައްޓަން އާމްދަނީ ހޯދަން އެންމެ ސިނާއަތަކަށް ބަރޯސާ ވެގެން ނޯވެވޭނެ ކަމަށާއި އެގޮތުން އިންކަމް ޓެކްސްއަކީ ނަގަން ޖެހޭ އެއްޗެއް ކަމަށް ގަބޫލު ކުރައްވާ ކަމަށެވެ.
ނަމަވެސް އޭނާ ވިދާޅުވި މި ވަގުތަށް ރާއްޖޭގައި އިންކަމް ޓެކްސް ނެގުމުގެ ވިސްނުން ރައީސުލް ޖުމްހޫރިޔާ އަބްދުﷲ ޔާމީން ނުގެންގުޅުއްވާ ކަމަށާއި އެކަމަކު މުސްތަގުބަލުގައި ބަޖެޓަށް ފައިސާ އިތުރު ކުރަން އެ ވިސްނުންފުޅު ބަދަލުވެދާނެ ކަމަށެވެ.
"އިކޮނޮމިކް ޔޫތު ކައުންސިލްގެ ޗެއާގެ ހައިސިއްޔަތުން ދަންނަވާ ކަމަށް ވަނީ ނަމަ އަޅުގަނޑަށް ބުނެވޭނީ އިންކަމް ޓެކްސްއަކީ ތައާރަފް ކުރަންޖެހޭ އެއްޗެއް ކަމަށް. ގައުމެއް އޭގެ އެންމެ ހަރުދަނާ ގޮތެއްގައި ކުރިޔަށް ގެންދެވޭނީ ވެސް އިންކަމް ޓެކްސް ނެގިގެން. އިންކަމް ޓެކްސް ތައާރަފް ކުރަން ޖެހެނީ ހަމައެކަނި ފައިސާ ހޯދާކަށް ނޫން ގައުމުގެ މުސްތަގުބަލް އުޖާލާ ކުރަން ބޭނުން ކަމަށް ވަނީނަމަ ކޮންމެވެސް އެއް ދުވަސް ހެއްގައި އެކަން ކުރަން ޖެހޭނެ،" ޒުހޫރު ވިދާޅުވި އެވެ.
ޒުހޫރު ވިދާޅުވީ އިންކަމް ޓެކްސްގެ ސަބަބުން ގައުމުގެ އިގްތިސާދު އޮތް ހިސާބު ދެނެގަތުމަށް ފަސޭހަތަކެއް ވެގެން ދާނެ ކަމަށެވެ. އެގޮތުން ރައްޔިތުންނަށް ލިބޭ އާމްދަނީއާ، އާމްދަނީ ނުލިބެނީ ކިހާ ބަޔަކަށް ކަމަށާއި ވަޒީފާގައި އުޅޭ މީހުންގެ ހިސާބުތަކުގެ އިތުރުން މަދު އާމްދަނީއެއް ލިބޭ ފަރާތްތަކުގެ ޑޭޓާތައް ލިބޭނެ ކަމަށެވެ. އަދި އޭގެ ސަބަބުން އިގްތިސާދަށް އިތުރަށް ހެޔޮ ބަދަލުތައް ގެންނަން އެނގޭނެ ކަމަށެވެ.
މިނިސްޓަރު މިހެން ވިދާޅުވި އިރު އަންނަ އަހަރަށް ލަފާ ކުރާ ބަޖެޓު ދިރާސާ ކޮމިޓީގައި، އިންކަމް ޓެކްސް ނެގުމަށް އިދިކޮޅު ފަރާތްތަކުން ހުށަހެޅި ރެކޮމެންޑޭޝަން ވަނީ ސަރުކާރު މެންބަރުންގެ ތާއީދާއެކު ފާސްކޮށްފަ އެވެ. އަދި ގިނަ މެންބަރުންގެ ވިސްނުން ވެސް ހުރީ އިންކަމް ޓެކްސް ތައާރަފް ކުރުމަށެވެ.