ބަނދަރުގެ ރަހަ މީރުކޮށްލި ނޯތު ޕޯޓް ކެފޭ!

ފުރަތަމަ އަހާލަން ބޭނުން ވަނީ ހޮޓަލަށް ނޫނީ ކެފޭ އާއި ރެސްޓޯރަންޓަށް ވަންނަ އިރު އެންމެ އުންމީދު ކުރަނީ ކޮން ކަމަކަށް ހެއްޔެވެ؟ ކުޅުދިޔާކޮށްލާ ވަރު މީރު ކެއުމެއް ލިބުމަށް ހެއްޔެވެ؟ ނޫނީ ހަމަޖެހިލައިގެން އިންދެވޭނެ ހިތްގައިމު މާހައުލެއް ހެއްޔެވެ؟ ހަމަގައިމުވެސް ފެންވަރު ރަނގަޅު ހިދުމަތެއް ކޮންމެ މީހަކުވެސް ބޭނުންވާނެ އެވެ. މާލޭގައި މިހާރު ހުރި އެތައް ސަތޭކަ ކެފޭ އަދި ހޮޓާތަކުގެ ތެރެއިންވެސް މި ހުރިހާ ކަމެއް ޔަގީނުންވެސް ލިބޭނެ ކެފޭއެއް އެބަހުއްޓެވެ. އެއީ މީރު ބަހުރު ބަނދަރުގައި މޯލްޑިވްސް ޕޯޓްސް ލިމިޓަޑް (އެމްޕީއެލް) އިން އަލަށް ހަދާފައިވާ "ނޯތު ޕޯޓް ކެފޭ" އެވެ.

ނޯތު ޕޯޓް ކެފޭގެ ވާހަކަ ފެށޭ ހިސާބަކީ އެމްޕީއެލްގެ އާ ސީއީއޯ މުހައްމަދު ޖުނައިދު އިސް ނަންގަވައިގެން ކޯޕަރޭޓް ސޮސައިޓީ މެދުވެރިކޮށް އެ ކުންފުނީގެ މުއައްޒިފުންގެ ޖީބަށް ލުއިވާ ގޮތަށް ކޮފީއަށް އެރުމާއި އާއިލާ ގޮވައިގެން ކާން ދެވޭނެމަގު ފަހިކޮށްދެއްވުމަށް ފެށި މަސައްކަތެކެވެ. އެގޮތުން މީގެ މަހެއްހާ ދުވަސް ކުރިން އެކުންފުނީގެ މުއައްޒިފުންގެ އުންމީދުތައް ވަނީ ހަގީގަތަކަށް ހަދައިދީފަ އެވެ.

ނޯތު ޕޯޓް ކެފޭއިން އެމްޕީއެލްގެ މުއައްޒިފުންނަށް ގިނަ އިނާޔަތްތަކެއް ދޭއިރު ކޮންމެ މުވައްޒަފަކަށް 20 ޕަސަންޓުގެ ޑިސްކައުންޓެއް ލިބެއެވެ. އޭގެ އިތުރުން މިދިޔަ މަހު 25 އިން މާދަމާގެ ނިޔަލަށް އެ ކެފޭއިން 100 އަށްވުރެ ގިނައިން ހަރަދުކޮށްގެން ހޮވޭ ނަސީބުވެރި ތިން މުވައްޒަފަކަށް ތިން ރެއަށް ލަންކާއަށް ދިޔުމުގެ ޕްރޮމޯޝަނެއްވެސް ވަނީ ފަށާފައެވެ.

"އަޅުގަނޑުމެންގެ ބޮޑު އެއް އަމާޒަކީ މުއައްޒިފުން ހިތްހަމަ ޖެއްސުން. އެގޮތުން ޕޯޓް ކެފޭއިން ޑިސްކައުންޓް މި ލިބެނީ ހަމައެކަނި މުވައްޒިފުންނަށޭ ބުނެވޭކަށް ނެތް. އެއީ މުވައްޒިފެއްގެ އާއިލާ ނުވަތަ ރައްޓެހިން ގޮވައިގެން އަޔަސް މުވައްޒިފަކު ބިލް ކަނޑާކަމަށް ވާނަމަ 20 ޕަސަންޓު ޑިސްކައުންޓު ލިބޭނެ. އެއްވެސް ތަނަކު މިހާ ބޮޑު ޕަސަންޓެއް މުވައްޒިފުންނަށްޓަކައި ދުލެއް ނުކުރޭ. އަދި އަޅުގަނޑުމެން މިހާރު ފަށައިގެން މި އުޅޭ ޕްރޮމޯޝަންގެ އިތުރުން ވެސް ދޭތެރެ ދޭތެރެއިން ޕްރޮމޯޝަންތައް ބާއްވާނެކަން ޔަގީން،" ޕޯޓް ކެފޭގެ މެނޭޖާ އަބްދުﷲ އަލީ ވިދާޅުވި އެވެ.

ހަމައެކަނި މުއައްޒިފުންނަށް ލިބޭ ފައިދާތަކުގެ ވާހަކައިން ނިންމާލެވޭކަށް ނެތެވެ. ޕޯޓް ކެފޭގެ އެންމެ ތަފާތު އަދި އާންމުން އެންމެ ބަލައިގަންނަ އެއް ކަމަކީ އެ ކެފޭގައި 100 ޕަސަންޓު ދިވެހި ސްޓާފުން މަސައްކަތް ކުރާތީ އެވެ. ވެއިޓަރުންނާ ހަމައިން ފެށިގެން ޝެފުންނަށް ދަންދެން ހުސް ދިވެހިންނެވެ. އޭގެ އިތުރުން 90 ޕަސަންޓު ސްޓާފުންނަކީ ކުރިން ރިސޯޓުތަކުގައި މަސައްކަތްކޮށްފައި ތިބި މީހުންނެވެ. އެހެންކަމުން ހިދުމަތުގެ ކޮލިޓީ ހުންނަނީ މަތީގަ އެވެ.

"އަޅުގަނޑުމެން ބޭނުމެއް ނުވޭ ބޭރު މީހުން ގެންގުޅޭކަށް. ބޭނުންވަނީ ދިވެހިންނަށް ބޮޑެތި މުސާރަ ދީގެން ވަޒީފާގައި ގެންގުޅެން. މާލޭގައި މިއީ ނުވާ ކަމެއް. އެއީ ދިވެހިން ނުގެންގުޅެވޭނޭ ނުވަތަ ނުބެލެހެއްޓޭނެ ކަމުގެ ޝަކުވާތަކެއް މުޅިން ވެސް އަންނަނީ. ނަމަވެސް އަޅުގަނޑު ގަބޫލު ކުރާ ގޮތުގައި ރަނގަޅު މުސާރައާ އިނާޔަތް ދީގެން ދިވެހިން ގެންގުޅެވޭނެ. އޭރުން ހިދުމަތުގެ ފެންވަރު ވެސް ދެގުނަ އިތުރު ވާނެ. އެކަމަށްވެސް ވަރަށް ގިނަ ކަސްޓަމަރުން ހުންނަނީ ހިތްހަމަ ޖެހިފައި،" އަލީ ވިދާޅުވި އެވެ.

ބަނދަރުގައި މި ކެފޭ ހުޅުވާފައި ހުރުމުން ވަރަށް ގިނަ ފާޑުކިޔުން ވެސް ރަށުތެރޭގައި އޮވެ އެވެ. ނަމަވެސް ގިނަ ބަޔަކު އަޖުމަ ބަލައިލަން ވަދެފައި ދަނީ ފާޑު ކިޔުމުގެ ބަދަލުގައި ތައުރީފުކޮށްފައެވެ.

އަލީ ވިދާޅުވި ގޮތުގައި ސަބަބަކީ ހިތްގައިމު މާހައުލެއްގައި ފުރިހަމަ ހިދުމަތް ލިބުމުގެ އިތުރުން އަޅާނުކިޔޭ ފަދަ މީރު ކެއުންތައް ނޯތު ޕޯޓް ކެފޭއިން ތައްޔާރުކޮށް ސުފުރާއަށް އަރުވާފައި ހުރުމެވެ.

ފާހަގަކޮށްލަން ޖެހޭ އެއް ކަމަކީ ރިސޯޓެއްގެ ދިވެހި ޝެފުން ކައްކާ އިރު ހެދިކާ ހަދަނީ ދިވެހި މަންމައެކެވެ. ހަމަ ގެއިން ލިބޭފަދަ މީރު ހެދިކާއާއި ރިސޯޓު ފެންވަރުގެ ކެއުންތައް ތައްޔާރުކޮށްފައި ހުރެއެވެ.

"މިއީ ވަރަށް ތަފާތުތަނެއް. ފުރަތަމަ ކަމަކީ ފުރިހަމަ ވިއުއެއް އޮތީ. މޫދު ފެނުމާއި ބޯޓު ފަހަރުތައް ދުއްވާތަން ފެންނަ ގޮތަކަށް ވަރަށް ހިތްގައިމުކޮށް އޮންނަނީ. އޭގެ އިތުރުން ޕޯޓް ކެފޭގެ އަގުތަކާއި ރަހަތަކުގެ އިތުރުން ދިވެހިން ހިދުމަތް ދޭން ތިބޭތީ ވަރަށް ހިތް ހަމަޖެހޭ ކަސްޓަމަރުން. އަދި މަހެއްވީ އިރު މިހާރުވެސް ދުވާލަކު 5000 އެއްހާ މީހުން ވަދޭ. އަދި ދިވެހި ރަހަތައް ހުންނާތީ މިތަނަކީ މިހާރު މާލޭގެ ނަމްބާ ވަންއޭ ބުންޏަސް ދޮގަކަށް ނުވާނެ،"

ޕޯޓް ކެފޭގައި ތނިް އިރަށްވެސް ބުފޭ އާއި ހަވީރަށް ހެދިކާ ތައްޔާރުކޮށްފައި ހުރެއެވެ. އެގޮތުން ބްރެކްފަސްޓް ބުފޭއަށް 65ރ. އަށް ލިބޭއިރު ލަންޗު ބުފޭ އަށް އަރާނީ 75ރ. އެވެ. އަލީ ވިދާޅުވި ގޮތުގައި މިހާތަނަށް ގިނަ ކަސްޓަމަރުން ކެއުމުގެ ރަހަތަކަށް ތައުރީފުކޮށްފައިވެ އެވެ. އަދި ގިނަ ކެފޭތަކަށް ވުރެ އަގުހެޔޮ ކަމަށް ދަނީ ބުނަމުންނެވެ.