އެމެރިކާގެ މަޝްހޫރު އޭރިއެލް ޑާންސާ ޖެނިފާ ބްރިކާއަކީ އުފެދުމުގައި ވެސް ނުކުޅެދޭ މީހެކެވެ. އޭނާ ވިހޭއިރު ދެ ފައެއް ނެތެވެ. ނަމަވެސް އެއީ އޭނާއަށް ލިބިފައިވާ ބޮޑު މަޝްހޫރުކަމާއި ކާމިޔާބީއާ ދެމެދަށް އެއް އިރެއްގައިވެސް ވަން ހުރަހެއް ނޫނެވެ. އޭނާ ވަނީ އުމުރުން އެންމެ 11 އަހަރުގައި، އޭނާ ދިރިއުޅޭ އެމެރިކާގެ ސްޓޭޓެއް ކަމަށްވާ އިލިނޯއީގެ ޖިމްނާސްޓިކް ޗެމްޕިއަންކަން ހޯދާފަ އެވެ. އެހާ ޅަ އުމުރުގައި ލިބިފައިވާ ނުކުޅެދުންތެރިކަމާއެކު ވެސް ކާމިޔާބު މީހަކަށްވާން އޭނާ ބޭނުންވީ 1996 ވަނަ އަހަރު، އޭރު އެންމެ 14 އަހަރުގެ މަޝްހޫރު ޖިމްނާސްޓް، ޑޮމިނިކް މޮކޭނު އެމެރިކާއަށް އޮލީމްޕިކް ގޯލްޑް މެޑަލެއް ހާސިލްކޮށްދިން ހިސާބުންނެވެ. އެހިސާބުން އޭނާ ބެލީ ޑޮމިނިކް އަކީ އޭނާގެ ރޯލް މޮޑެލްގެ ގޮތުގަ އެވެ.
އެމެރިކާގައި ވަޒަންވެރިވެގެން އުޅުނު ރަޝިއާ އަށް ނިސްބަތްވާ ޖެނިފާގެ މައިން ބަފައިން އޭނާ ވިހޭ ގޮތަށް ހޮސްޕިޓަލަށް ދޫކޮށްލާފައި ވަނިކޮށް އެމެރިކާގެ ދެމަފިރިއަކު ޖެނިފާ އެޑޮޕްޓް ކުރީ އޭނާއަށް ތިން ހަތަރު މަހުގެ ތެރޭގަ އެވެ. ދެފައި ނެތުމާއެކުވެސް ދެތިން އަހަރުގައި އޭނާ އަމިއްލަޔަށް ފިރުކި ހިނގަން ދަސް ކުރި އެވެ. ޖެނިފާ އޭނާގެ ދިިރިއުޅުމުގެ މައްޗަށް ލިޔެފައިވާ ފޮތުގައި ބުނެފައިވާ ގޮތުން ކުޑަ އިރުއްސުރެ އޭނާ އަކީ އެހެން ކުޑަކުދިން ފަދައިން ގަސް ގަހަށް އަރައި، ތަންތަނުން ފުމެ ހަދައި އުޅުނު މީހެކެވެ. ޑޮމިނިކް މޮކޭނު ފެނި، ޖިމްނާސްޓަކަށް ވާން އޭނާ ބޭނުންވީ ވެސް އެހެންވެ ކަމަށް އޭނާ ބުނެފައިވެ އެވެ.
ޑޮމިނިކް "އައިޑޮލް" އެއްގެ ގޮތުގައި ބަލައިގެން ކުރި މަސައްކަތުން އުމުރުން އެންމެ 10 އަހަރުގައި ޖޫނިއާ އޮލިމްޕިކްސްގައި ޖެނިފާ ވާދަކުރި އެވެ. އެހެން އާންމު ކުދިންވެސް ވާދަކުރާ އުސޫލުންނެވެ. ނުކުޅެދޭ މީހަކަށް ވާތީ ވަކި އުސޫލުތަކެއް ޖެނިފާ ބޭނުން ނުވީ އެވެ. ޖެހިގެން އައި އަހަރުވެސް ހަމަ އެ މުބާރާތުގައި ބައިވެރިވެ އޭނާ ދިރިއުޅޭ ސްޓޭޓުން ޓަމްބްލިން އިން ޗެމްޕިއަންކަން ހޯދި އެވެ. ކާމިޔާބުވާ ކޮންމެ ފަހަރަކު އެ ހުރިހާ ކަމެއްގެ "ކްރެޑިޓް" ހައްގުވާ ފަރާތަކީ އޭނާގެ އައިޑޮލް ޑޮމިނިކް ކަމަށް ޖެނިފާ އައީ ބުނަމުންނެވެ. ޖެނިފާއަށް އޭނާއާ ޑޮމިނިކް އާ ވައްތަރު ގޮތެއްވެސް ހުންނަނީ އެވެ.
އާދައިގެ މަތިން ގޭތެރޭގައި ދެކެވުނު ވާހަކައެއްގެ ތެރޭން ޖެނިފާއަށް އޭނާގެ އަސްލު މައިންބަފައިންގެ ނަން އެނގުމުން ހައިރާންކަން ލިބުނެވެ. އޭނާގެ އާއިލީ ނަމަކީ މޮކޭނު ކަން އެނގުމުން އިންތިހާއަށް އުފާވެފައި ހުރި ޖެނިފާއަށް އޭނާގެ މުޅި އުމުރު "ނަމޫނާ" އެއްގެ ގޮތުގައި ދެކުނު މީހަކީ އަމިއްލަ ދައްތަކަން އެނގުނެވެ. ނަމަވެސް ޑޮމިނިކް ގާތު އޭނާއަކީ ޑޮމިނިކްގެ ކޮއްކޮ ކަމަށް ބުނުމަކީ މޮޔަ ކަމެއް ކަމަށް ގަބޫލުކޮށް، އެކަން ސާބިތު ވާވަރަށް ހެކި ހޯދައިގެން އޭގެ ހަތަރު އަހަރު ފަހުން ޑޮމިނިކް އަށް ސިޓީއެއް ލިޔުނެވެ. އެ ސިޓީ ފެނި ޑޮމިނިކް އޭނާގެ އާއިލާއަށް ގުޅައި އޭނާގެ ކޮއްކޮއަކު އަހަރުތަކެއް ކުރިން އެއްލާލިތޯ ސުވާލުކުރި އެވެ. އަދި ޖެނިފާއަކީ ހަގީގަތުގައި ވެސް ކޮއްކޮކަން އެނގުމުން ފުރަތަމަ ފަހަރަށް ޖެނިފާއާ ބައްދަލުކޮށްލަން ދިޔައެވެ. އަދި ޖެނިފާގެ ވާހަކަ އެނގުމުން އޭނާވަނީ ކޮއްކޮގެ ކާމިޔާބީއަށް އުފާކޮށް އެއީ ދެބެއިން ކަން ދުނިޔެއަށް އިއުލާން ކޮށްފަ އެވެ.
ޑޮމިނިކް ވަނީ އޭނާއާ ކޮއްކޮ ޖެނިފާ ދިމާވި ގޮތުގެ އާދަޔާ ހިލާފު ވާހަކައަށް ފޮތެއް ވެސް ލިޔެފަ އެވެ.
