ރާއްޖޭގެ ހުރިހާ ރަށެއްގައި ސައިކަލު ޓެކްސީގެ ހިދުމަތް ދެވޭ ގޮތަށް ހަމަޖައްސައިފި އެވެ. މުޅި ރާއްޖެއަށް މި ހިދުމަތް ހުޅުވާލާއިރު މާލޭގައި އަލަށް ސައިކަލު ޓެކްސީ ހިދުމަތް ފެށީ މިދިޔަ އާދީއްތަ ދުވަހުގަ އެވެ.
ޓްރާންސްޕޯޓް އޮތޯރިޓީގެ ޗެއާމަން އަބްދުއް ރަޝީދު ނާފިޒް ވިދާޅުވީ ގިނަ ރަށްތަކުގައި ޓެކްސީގެ ހިދުމަތް އަދިވެސް އެކަށީގެންވާ ފެންވަރެއްގައި ނުދެވޭ ކަމަށާއި އޭގެ ސަބަބުން ރައްޔިތުންނަށް އުނދަގޫތަކެއް ކުރިމަތިވެފައިވާ ކަމަށެވެ. އެހެންކަމުން ލުއި ފަސޭހަ ގޮތެއްގައި ދަތުރުފަތުރުގެ ނިޒާމް ހަމަޖައްސައިދިނުމަށް ސައިކަލް ޓެކްސީގެ ހިދުމަތް ވެސް ދެވޭ ގޮތަށް ހަމަޖައްސާފައި މިހާރު ވާނެ ކަމަށް ނާފިޒް ވިދާޅުވި އެވެ.
"ސައިކަލު ޓެކްސީގެ ހިދުމަތް އާންމުން ބަލައިގަނެ ވަރަށް ތަރުހީބު ލިބޭ. އެ ހިދުމަތް މާލޭގައި ތައާރަފް ކުރުމާ އެކީގައި މިހާރު އަތޮޅުތަކުގެ ރައްޔިތުންވެސް މި ހިދުމަތް ފޯރުކޮށްދޭން ޝައުގުވެރިކަން ފާޅުކުރަމުންދޭ. އެހެންވެ ރާއްޖޭގެ ކޮންމެ ރަށަކުންވެސް އެ ހިދުމަތަށް އެދުމުން އެ ގޮތަށް ހިދުމަތް ފޯރުކޮށްދޭން އެދުމުން އެ ހިދުމަތް ފޯރުކޮށްދިނުމަށް ހުއްދަ ދޭ ގޮތަށް މިވަނީ ހަމަޖެހިފައި،" ނާފިޒް ވިދާޅުވި އެވެ.
އަބްދުﷲ އިމްތިޔާޒް ވިދާޅުވީ ސައިކަލު ޓެކްސީގެ ހިދުމަތް ފަށަން ސަރުކާރުން ނިންމާފައި ވަނީ ހަރަދު ކުޑަގޮތަކަށް ފަސޭހަކަމާއެކު ވީހާވެސް ގިނަ ބަޔަކަށް އެ ހިދުމަތް ދެވޭ ގޮތަށް ކަމަށެވެ. އެގޮތުން ސައިކަލު ޓެކްސީ ހިދުމަތް ދިނުމަށް ބޭނުންވާ މައިގަނޑު އެއްޗަކީ 20 ސައިކަލު ކަމަށާއި ދެން ހުރި ކުދި ކުދި ކަންކަން ފުރިހަމަ ކުރުމަށް ފަހު ކޮންމެ ފަރާތަކަށް ވެސް ހިދުމަތް ދެވޭނެ ކަމަށެވެ.
މުޅި ރާއްޖޭގައި ސައިކަލު ޓެކްސީ ހިދުމަތް ފަށަން ނިންމާފައިވާ އިރު މާލޭގައި ވެސް ސައިކަލު ޓެކްސީއަށް ދަނީ ބޮޑު ތަރުހީބެއް ލިބެމުންނެވެ. ސައިކަލު ޓެކްސީގައި ކޮންމެ ދަތުރެއް ކުރަނީ 10 ރުފިޔާއަށެވެ.