ފުލް ޓާމް ހަމަކޮށް ނުވަތަ ދުވަސް ފުރުމަށްފަހު ވިހާ މީހުނަށްވުރެ ދުވަސް ނުފުރާ ވިހާ މީހުނަށް ހާޓް އެޓޭކް ޖެހުމުގެ ފުރުސަތު ބޮޑު ކަމަށް ފަހުގެ ދިރާސާއަކުންވަނީ ދައްކާފަ އެވެ.
ދި ހާވާޑް ޓީއެޗް ޗެން ސްކޫލް އޮފް ޕަބްލިކް ހެލްތުން ކޮށްފައިވާ ދިރާސާގައި ބުނެފައިވަނީ ބަނޑަށް 37 ހަފްތާ ނުވަނީސް ވިހާ މީހުނަށް ހާޓްއެޓޭކް ޖެހުމުގެ ފުރުސަތު 40 ޕަސެންޓަށް ބޮޑު ކަމަށެވެ.
މީގެ އިތުރުން ވެސް ދުވަސް ނުފުރާ ވިހާ ކުދިންނަށް ގާތު ދިނުމަށް މައިންނަށް އުނދަގޫ ވުމުގެ އިތުރުން، އިތުރު ސިއްހީ މައްސަލަތައް ދިމާވާ ކަމަށް ވެސް އެ ދިރާސާގައި ވެއެވެ.
އެ ދިރާސާގައި އަދި ބުނެފައިވަނީ ބަނޑަށް 32 ހަފްތާ ވުމުގެ ކުރިން ވިހާމައިންނަށް ހިތުގެ މައްސަލަތައް ޖެހުމުގެ ފުރުސަތު ދެ ގުނައަށް ބޮޑުވާ ކަމަށެވެ.
ޖާނަލް ސާކިއުލޭޝަންގައި އާންމުކޮށްފައިވާ އެ ދިރާސާ ކުރިއަށްގެންދިޔަ ޓީމުން ވަނީ 70،182 އަންހެނުން ބައިވެރިކޮށް، ދުވަސްނުފުރާ ވިހެއުމާއި ހިތުގެ މައްސަލަތައް އެމީހުންގެ ހުރިގޮތް ބަލާފަ އެވެ.
އެ ދިރާސާގައި އަދި ބުނެފައިވަނީ އެއްފަހަރަށް ވުރެ ގިނައިން ދުވަސް ނުފުރާ ވިހާމައިންނަށް ހިތުގެ މައްސަލަތައް ޖެހުމުގެ ފުރުސަތު މާބޮޑުވާ ކަމަށެވެ.