ދީނީ ކަންކަމަށް މަސައްކަތް ކުރާ ޖަމްއިއްޔާއެއް ކަމަށްވާ، ޖަމްއިއްޔަތުއް ސަލަފުން ނޫސްވެރިކަމުގެ ކޯހެއް ހިންގުމަށް ނިންމައި، އެ ކޯހުގައި ބައިވެރިވާން ހުޅުވާލައިފި އެވެ.
މި ކޯސް އޮންނާނީ އަންނަ މަހުގެ އެއްވަނަ ދުވަހުން 16 ވަނަ ދުވަހުގެ ނިޔަލަށެވެ. ކޯހުގެ ކްލާސްތައް ބާއްވަން ހަމަޖައްސާފައިވަނީ ކޮންމެ ރެއެއްގެ 8:00 އިން 10:00 ށެވެ.
ސަލަފުން ބުނިގޮތުގައި މި ކޯހުގައި ކިޔަވައި ދެއްވާނީ ރާއްޖޭގެ ނޫސްވެރި ކަމުގެ ދާއިރާގައި ތިއްބެވި ތަޖުރިބާކާރު މަޝްހޫރު ނޫސްވެރިންނެވެ. އެގޮތުން ހަވީރު އޮންލައިން ނޫހުގެ ކުރީގެ އެޑިޓަރު މުހައްމަދު ޝަހީބާއި ހަވީރުގެ އެޑިޓަރު މޫސާ ލަތީފާއި ހަވީރުގެ ކުރީގެ މެނޭޖިން އެޑިޓަރު އަދި މިހާރު ސަންގެ ޗީފް އެޑިޓާ ހިރިގާ އަހުމަދު ޒާހިރާއި ހަވީރުގެ ކުރީގެ ނޫސްވެރިޔާ އަދި މިހާރު އަވަސްގެ ޗީފް އެޑިޓަރު މުންޑޫ އާދަމް ހަލީމާއި މިހާރުގެ އެޑިޓަރު އިސްމާއީލް ނަސީރާއި ހަވީރުގެ ކުރީގެ ނޫސްވެރިޔާ ހޯރަފުށީ މުހައްމަދު ސަލީމާއި ވީމީޑިއާގެ ޑިރެކްޓާ ޖެނަރަލް ނިއުސް އެންޑް ކަރަންޓް އެފެއާޒް އިމާދު ލަތީފު ހިމެނި ވަޑައިގަންނަވަ އެވެ.
މިހުރިހާ ބޭފުޅުންނަކީ ވެސް ނޫސްވެރި ކަމުގެ ގައުމީ އިނާމު ހާސިލް ކުރައްވާފައިވާ ބޭފުޅުންނެވެ.
ނޫސްވެރިކަމުގެ އަސާސީ ހުނަރު ދަސްކޮށްދޭ މި ކޯހުގެ ކޮންމެ ބައިވެރިއެއްގެ އަތުން 2،000 ރުފިޔާގެ ފީއެއް ނަގަ އެވެ.