ސްރީލަންކާައި ގެއްލުނު ދިވެހި ފިރިހެން ކުއްޖާގެ ހަބަރެއް ނުވެގެން އާއިލާ ފުން ހިތާމައެއްގައި ތިއްބާ ކޮލަމްބޯ ދެހިވަލައިގެ ފުލުހުން އެއާއިލާއަށް ހައިރާން ކުރުވި ހަބަރެއް ގެނެސް ދިނެވެ؛ އުމުރުން 19 އަހަރުގެ މުުހައްމަދު ޝައްމާހު (ފޮޓޯގައި) ގެއްލިފައި ވަނިކޮށް ފުުލުުން ގެނެސްދިން ހަބަރަކީ އޭނާ މަރުވެއްޖެ ކަމުގެ ހަބަރެއް ނޫނެވެ. އޭނާގެ ފަރާތުން އާއިލާއަށް އަންގައި ދިނުމަށް ދިން ހަަބަރަކީ "އޭނާގެ އެއްވެސް މީހަކު ސްރީލަންކާގައި މިހާރު ނޫޅޭނެ" ކަމުގެ ހައިރާން ކުރުވި ހަބަރެވެ. -- ޝައްމާހު ނުގެއްލެ އެވެ. އޭނާ ސަލާމަތުން ދިރި ދުނިޔޭގައި އެބަހުއްޓެވެ!
އެ އާއިލާގެ މެންބަރުންގެ ތެރެއިން އެކަކު ޝައްމާހާބެހޭ ގޮތުން ދިން ފަހުގެ ހަބަރަކީ މިއީ އެވެ: އެމެރިކަން ކޮލެޖްގައި ކިޔަވަމުން އައި އާއިލާގެ ހަމައެކަނި ފިރިހެން މެންބަރު، ޝައްމާހު ގެއްލުނީ އެއް ނޫނެވެ. ފިލައިގެން ދިޔައީ އެވެ. އަދި އާއިލާއިން ހޯދަން ފެށުމުން އޭނާ ދުނިޔޭގައި ހުރިކަން އަންގާލުމުގެ ގޮތުން ފުލުސް މެދުވެރިކޮށް މެސެޖެއް ރައްދުކުރީ އެވެ.
ނަން ހާމަ ނުކުރުމަށް ޝަރުތުކޮށް އަވަސް އަށް މައުލޫމާތު ހިއްސާކުރި އެ މެންބަރު ބުނި ގޮތުގައި ޝައްމާހު ފިލައިގެން ދިޔައީ އޭނާގެ ރައްޓެއްސެއް ކަމަށް ބުނާ ފިރިހެނަކާއެކު އެވެ. ސާދަ ދުވަސް ފަހުން ދެހިވެލަ ފުލުހަށް ޝައްމާހު ދިޔައީ ސްރީލަންކާގެ ދެ ލޯޔަރުންނާއެކު އެވެ. ޝައްމާހުގެ ފަރާތުން އާއިލާއަށް ފޯރުކޮށްދޭން އެދުނު ކުރު މެސެޖަކީ "މިހާރު އޭނާގެ އެއްވެސް މީހަކު ދުނިޔޭގައި ނުހުންނާނެ" ކަމުގެ މެސެޖެވެ.
"ޝައްމާހު ވަނީ ފުލުހަށް ހާޒިރުވެފައި، އޭނާ އައީ ދެ ލޯޔަރުންނާއެކު! ފުލުހަށް އަންގާފައި ވަނީ މަންމައާ ބައްޕަ އަދި އާއިލާގެ އެއްވެސް މެންބަރަކު ދުނިޔޭގައި މިހާރު ނޫޅޭނެ ކަމަށް. އެ މެސެޖް ދިނުމަށް ފަހު ފިރިހެން 'ރަހުމަތްތެރިޔާ' އާއި ލޯޔަރުންނާއެކު އޭނާ ވަނީ އެނބުރި ގޮސްފައި،" އެ މެންބަރު ބުންޏެވެ. "ލަންކާ ފުލުހުން ވަނީ އާއިލާއަށް އެކަން އަންގާފައި."
"ފިރިހެން ރަހުމަތްތެރިޔާކާ" އެކު ޝައްމާހު ފިލައިގެން އުޅުމަށް ފަހު ހައިރާން ކުރުވި ގޮތަކަށް "ފެނިލި" ނަމަވެސް އޭނާގެ އާއިލާގެ ފަރާތުން މި ހާދިސާއާ ގުޅޭ މައުލޫމާތު ކިޔައެއް ނުދެ އެވެ. ޝައްމާހުގެ ބައްޕައަށް ގުޅަން މަސައްކަތްކޮށް ފޯނަށް ޖަވާބެއް ނުދެ އެވެ. -- މީގެ ކުރިން ޝައްމާހު ގެއްލިފައިވާ ކަމުގެ މައުލޫމާތު އަވަސްއާ ހިއްސާ ކުރީ ޝައްމާހުގެ ބައްޕަ އެވެ.
ޝާއްމާހު ލަންކާގައި ދިރިއުޅޭތާ ތިން އަހަރުވެއްޖެ އެވެ. އަވަސް އަށް އެނގިފައިވާ ގޮތުގައި ކޮންމެ ދުވަހަކު އޭނާ ކޮލެޖަށްދާން ގެއިން ނުކުތް ނަމަވެސް ކޮލެޖަށް ދިއުމުގެ ބަދަލުގައި ދަނީ "ރަހުމަތެރިޔާ" ގެ އަށެވެ. ޝައްމާހު ފިލާފައި ވަނީ އޭނާ މާލެ ގެނައުމަށް އާއިލާއިން މަސައްކަތް ކުރަނިކޮށް ކުއްލި ގޮތަށެވެ.
އިތުބާރުހުރި ގޮތެއްގައި އަވަސް އަށް ކަށަވަރުވެފައިވާ ގޮތުގައި ޝައްމާހު ފެނުނު އިރު އޭނާގެ ވިސާ އޮތީ ކެންސަލްކޮށްފަ އެވެ. ނަމަވެސް އޭނާގެ "ފިރިހެން ރަހުމަތްތެރިޔާ" ގެ އެހީގައި އޭނާއަށް ވަނީ އެސައިލަމް ހޯދައީދީފައެވެ.
"ޝައްމާހު ގޯސް މަގެއް ހިޔާރު ކުރީ، އޭނާ އަށް ފުރުސަތު ލިބުމުން އޭނާ ވަނީ ނުބައިމަގަކުން ގޮސް ގެއްލިފައި،" އާއިލާގެ މެންބަރު ބުންޏެވެ.