ރާއްޖޭގެ އެކި ސަރަހައްދުތަކުގައި އަރިދަފުސް ރޯގާ އާއި ވައިރަލް ހުމެއް ހަލުވިކަމާއެކު ފެތުރެމުންދާ ކަމަށާއި އެކަމަށް ސަމާލުވުމަށް ހެލްތު ޕްރޮޓެކްޝަން އެޖަންސީ (އެޗްޕީއޭ)އިން އަންގައިފި އެވެ.
އެޗްޕީއޭއިން ނެރުނު ބަޔާނެއްގައި ބުނެފައި ވަނީ އަރިދަފުސް ރޯގާ އަދި ވައިރަލް ހުމުގެ ސަބަބުން މީހާގެ ސިއްހީ ހާލަތު ވަރަށް ދެރަވާ ކަމަށާއި އޭގެ އަލާމާތެއް ހުރި ނަމަ ވީހާ ވެސް އަވަހަށް ޑޮކްޓަރަކަށް ދެއްކުމަށް އެދޭ ކަމަށެވެ.
އެ ދެ ބަލީގެ އަލާމާތުގެ ގޮތުގައި އެޗްޕީއޭއިން ފާހަގަކޮށްފައި ވަނީ ހުން އައުމާއި ކަރާއި ބޮލުގައި ރިއްސުމުގެ އިތުރުން ގައިގައި ރިއްސުމާއި ހީކަރުވާފައި ވަރު ދެރަވުން އަދި ބޭރަށް ހިންގާ ހޮޑުލެވުމެވެ. އެޗްޕީއޭއިން ބުނީ ކުޑަ ކުއްޖަކަށް އެ ބަލި ޖެހިއްޖެ ނަމަ ކެއުންބުއިން މަދުވުމާއި މާ ގިނައިން ނިދުމުގެ އިތިރުން އާދަޔާ ހިލާފަށް ރުއިން ފަދަ އަލާމަތްތައް ފެންނާނެ ކަމަށެވެ.
އެޗްޕީއޭއިން އިތުރަށް ބުނެފައި ވަނީ މާލޭގައި ޑޮކްޓަރަށް ދެއްކުން ފަސޭހަ ކުރުމުގެ ގޮތުން އައިޖީއެމްއެޗްގައި ފްލޫ ކްލިނިކެއް ގާއިމްކޮށްފައިވާނެ ކަމަށާއި މިއަދުން ފެށިގެން އެތަނުން ފަރުވާ ދޭނެ ކަމަށެވެ. އޭގެ އިތުރުން ސިއްހީ މަރުކަޒުތަކާއި ޕްރައިވެޓް ކްލިނިކްތަކުގައި ހާއްސަ މަސައްކަތްތައް ކުރަމުން ގެންދާ ކަމަށް އެ އެޖަންސީއިން ބުނެފައި ވެއެވެ.
ހުން އަދި އަރިދަފުސް ރޯގާ ޖެހިއްޖެ ނަމަ ގޭގައި ދެވޭނެ ފަރުވާ:
- ގިނަގިނައިން ދިޔާ އެއްޗެހި ބޭނުން ކުރުން
- އަރާމުކުރުން
- ކަޅުސައި، ލުނބޯ އިނގުރު އަދި މާމުއި އަޅައިގެން ބުއިންތައް ބޭނުން ކުރުން
- ހުން ގަދަ ނަމަ ފެން ހޭކުން