ހަލުވި ކަމާއެކު އިންފްލުއެންޒާ އެޗް1އެން އަދި ވައިރަލް ހުން ފެތުރެމުންދާތީ ޔުނިވާސިޓީތަކުގެ ކިޔެވުން މެދު ކަނޑާލައިފި އެވެ. މިއަދުން ފެށިގެން ރާއްޖޭގެ ގައުމީ ޔުނިވާސިޓީ އަދި އިސްލާމީ ޔުނިވާސިޓީގެ ކިޔެވުންވެސް ވަނީ މެދުކަނޑާލާފަ އެވެ.
ގައުމީ ޔުނިވާސިޓީން ބުނީ ރޯގާ ފެތުރެމުންދާތީ ކިޔެވުން މެދުކަނޑާލާފައިވާ ކަމަށާއި ކިޔެވުން ދެން ފަށާނީ މިޑްޓާމް ބްރޭކަށްފަހު މި މަހު 26 ގައި ކަމަށެވެ. އަދި މިމަހު 23 ވަނަ ދުވަހު ބާއްވަން ހަމަޖެހިފައިވާ ގްރެޖުއޭޝަންވެސް ފަސްކޮށްފައިވާ ކަމަށެވެ.
އިސްލާމީ ޔުނިވާސިޓީ ޗާންސެލާ ޑރ. މުހައްމަދު ޝަހީމް އަލީ ސައީދު މިއަދު ވިދާޅުވީ އެ ޔުނިވާސިޓީގެ ކިޔެވުންވެސް ދެން ފެށޭނީ މިޑްޓާމް ބްރޭކަށް ފަހު ނުވަތަ ރޯގާ ފެތުރޭ މިންވަރު ހަމައަކަށް އެޅުމުން ކަމަށް އެ ޔުނިވާސިޓީން މައުލޫމާތުދެ އެވެ. ކިޔެވުން ފެށޭނެ ތާރީހެއް ފަހުން އިއުލާނު ކުރާނެ ކަމަށެވެ.
މި ސެމިސްޓާގެ މިޑްޓާމް ބްރޭކް އަންނަ ހަފްތާގައި ފެށޭނެ އެވެ.
އެޗް1އެން1 ފެތުރޭ މިންވަރު އިންތިހާއަށް އިތުރުވުމުގެ ސަބަބުން މިއަދުން ފެށިގެން ވަނީ ސްކޫލްތަކުގެ ކިޔެވުން މެދުކަނޑާލާފަ އެވެ. އަދި މިހާތަނަށް މިބަލީގައި އެކަކު މަރުވެ މާބަނޑު އަންހެނެއް ވަނީ ސީރިއަސް ހާލަތުގަ އެވެ. ރެއާ ހަމައަށް 251 މީހެއްގެ ސާންޕަލް އެޗް1އެން1 އަށް ޓެސްޓްކުރެވިފައިވާއިރު 51 މީހުން ވަނީ އެ ބައްޔަށް ޕޮޒިޓިވް ވެފަ އެވެ.
ސްވައިން ފްލޫގެ އަލާމާތްތަކަކީ ވެސް ކެއްސުން، ހުން އައުން، ކަރުގައި ރިއްސުން، ނޭފަތުން ފެން އައުން ނޭފަތް ބެދުން، ގައިގައި ރިއްސުން، ބޮލުގައި ރިއްސުން، ހީކެރުވުން އަދި ވަރުދެރަވުމެވެ. މި ރޯގާ ކޮންޓްރޯލް ކުރުމުގެ ގޮތުން، ރޯގާ ޖެހިފައިވާ އިރު ކެއްސާ ކިބިހި އަޅާ އިރު އަގަމަތި ރަނގަޅަށް ނިވާ ކުރުމާއި ރޯގާ އަދި ހުން ޖެހިފައި ވާ ނަމަ، އާންމު ތަންތަނަށް ނުނިކުތުމާއި ރޯގާ އަދި ހުން އައިސް ގިނަ ދުވަސް ވާނަމަ ވީހާ ވެސް އަވަހަށް ޑޮކްޓަރަކަށް ދައްކައި ގިނައިން ދިޔާ އެއްޗިހި ބޭނުން ކުރުމަށް ވެސް އެޗްޕީއޭއިން ވަނީ އިލްތިމާސްކޮށްފަ އެވެ.