ފްލޫ ކްލިނިކް "ތޮއްޖެހިފައި"، ހިދުމަތްތައް ފުޅާ ކުރަނީ

ރާއްޖޭގައި ބާރު މިނެއްގައި ނުރައްކާތެރި ވައިރަލް ހުމާއި އަރިދަފުސް ރޯގާ ފެތުރެމުން ދާތާ ހަފްތާއެއްހާ ދުވަސް ވެއްޖެ އެވެ. އެކަމަށް ރައްކާތެރި ފިޔަވަޅު އެޅުމަށް އައިޖީއެމްއެޗްއިން ތައްޔާރުވެ، މިދިޔަ ހޮނިހިރު ދުވަހު ވަނީ ހާއްސަ ފްލޫ ކްލިނެކެއް ވެސް ހުޅުވައިފަ އެވެ. ނަމަވެސް ހުން ޖެހުނު ބައެއް މީހުންގެ ގައިން އެޗް1އެން1 ނުވަތަ ސްވައިން ފްލޫ ފެނުން އިތުރުވަމުން ދާތީ، ފްލޫ ކްލިނިކްގެ ހިދުމަތަށް އަންނަ މީހުން މި ވަނީ ރެކޯޑް އަދަދަކަށް އިތުރުވެ، އެ ކްލިނިކް ވެސް ތޮއްޖެހިފަ އެވެ. އެތަނުން ހިދުމަތް ހޯދުމަށް ދިގު ކިޔޫއެއް ވަނީ ހަދައިފަ އެވެ.

ސްވައިން ފްލޫގެ ކޭސްތައް އިންތިހާއަށް އިތުރުވަމުންދާ ކަމަށާ އެކަމަށް އެޅޭނެ ހުރިހާ ރައްކާތެރި ފިޔަވަޅުތަކެއް އެޅުމަށް ހެލްތު ޕްރޮޓެކްޝަން އެޖަންސީން ވަނީ ރޭ އިލްތިމާސްކޮށްފަ އެވެ. ރާއްޖޭގެ މިހާރުގެ ހާލަތަށް ބަލާއިރު ރެއާ ހަމަޔަށް 51 މީހަކު އެ ބައްޔަށް ޕޮސިޓިވްވެފައިވާ އިރު ސްވައިން ފްލޫ ޖެހިފައި ހުރި މީހަކު މަރުވި ކަމަށް ވެސް ޑޮކްޓަރުންނަށް މިހާރު ކަށަވަރުކޮށްދީފަ އެވެ. އޭގެ އިތުރުން މާބަނޑު މީހެއްވެސް ޕޮސިޓިވްވެ ހާލު ވަނީ ވަރަށް ސީރިއަސް ވެފައެވެ. އަދި ބަލި ކޮންޓްރޯލް ކުރުމަށް އަޅާ ފިޔަވަޅެއްގެ ދަށުން، މުޅި ރާއްޖޭގެ ސްކޫލުތަކާއި ކޮލެޖުތައް ވެސް ވަނީ ބަންދުކޮށްފަ އެވެ.

މުޅި ގައުމު ވަނީ ސްވައިން ފްލޫގެ ބިރަށް ސީރިއަސް ހާލަތަށް އައިސްފަ އެވެ. އެގޮތުން އެ ބަލި ޖެހުނުތޯ ޓެސްޓު ކުރުމަށް ވެސް މިދިޔަ ދެ ދުވަސް ތެރޭގައި ފްލޫ ކްލިނިކަށް ވަނީ 564 މީހުން އައިސް ޓެސްޓުތައް ހަދާފަ އެވެ. އެގޮތުން ކުރިން މަދު ވަގުތުކޮޅަކަށް ހިދުމަތް ދެމުން އައި އައިޖީއެމްއެޗްގެ ފްލޫ ކްލިނިކަށް ބޮޑެތި ބަދަލުތަކެއް ގެނެސް ހިދުމަތް ފުޅާ ކުރުމަށް މަސައްކަތް ފަށާފައިވާ ކަމަށް އެ ހޮސްޕިޓަލުން ބުންޏެވެ. އެގޮތުން ފްލޫ ކްލިނިކުން 24 ގަޑިއިރު ހިދުމަތް ދިނުމާއި ޑޮކްޓަރުންނާއި ނަރުހުން އިތުރު ކުރުމާއި ފްލޫ ކްލިނިކް ބޮޑު ކުރުމަށް އައިޖީއެމްއެޗުން ވަނީ އަމާޒުހިފައިފަ އެވެ.

"ސްވައިން ފްލޫ ފެތުރެން ފެށުމާ ގުޅިގެން ފްލޫ ކްލިނިކްގެ ހިދުމަތްތައް ފުޅާ ކުރުމުގެ މަސައްކަތް ފަށައިގެން މި އުޅެނީ. އެގޮތުން ގެންނަ ބައެއް ބަދަލު ތެރޭގައި 24 ގަޑިއިރަށް ބަދަލުކޮށް ތަނުގެ ޖާގަ އިތުރުކޮށް ޑޮކްޓަރުންނާއި ނަރުހުން އިތުރު ކުރުމުގެ މަސައްކަތް ކުރަން ރާވަމުން މިދަނީ. އެލާޓް ލެވަލް މަތިވީމަ އެކަމަށް މަސައްކަތް ކުރާ ވަސީލަތްތައް ވެސް މަތި ކުރަން ޖެހޭ،" އައިޖީއެމްއެޗްގެ އޮފިޝަލް ވިދާޅުވި އެވެ. އެޗްޕީއޭއިން ރޭ ބުނެފައިވާ ގޮތުގައި ސްވައިން ފްލޫގެ ހާލަތު ރާއްޖޭގައި މިހާރު ވަނީ ލެވަލް ތިނަކަށް މައްޗަށް ޖައްސައިފަ އެވެ. އޭގެ މާނައަކީ އެ ބަލި ފެތުރޭ ނިސްބަތް އިތުރުވެ ގިނަ ބަޔަކަށް އެ ބަލި ޖެހުމެވެ.

އައިޖީއެމްއެޗްގެ އިތުރުން މިހާރު ހުޅުމާލޭގައި ވެސް ވަނީ ފްލޫ ކްލިނިކެއް ހުޅުވާ ހިދުމަތް ދޭން ފަށައިފަ އެވެ. ނަމަވެސް ހެލްތު ޕްރޮޓެކްޝަން އެޖަންސީއިން އިލްތިމާސް ކުރަނީ ހުން އައިސް ރޯގާ ޖެހޭ ކޮންމެ މީހަކު މާ ސީރިއަސް ނުވާ ނަމަ، ހޮސްޕިޓަލްތަކަށް ދިޔުމުގެ ބަދަލުގައި ގޭގައި ތިބެގެން ވެސް ފަރުވާ ކުރުމަށެވެ. ނަމަވެސް ހުން އައިސް ރޯގާ ޖެހި ތިން ދުވަސް ތެރޭގައި ކުރިއެރުމެއް ނުލިބޭ ނަމަ، ނަމަ ޑޮކްޓަރަށް ދެއްކުމަށް އެ އެޖަންސީއިން އިލްތިމާސް ކުރެ އެވެ.

ހުމަށް ގޭގައި ދެވޭނެ ފަރުވާތައް: