ފެތުރެމުންދާ ރޯގާ އާއި ގުޅިގެން ކޮލެޖްތަކުގެ ކިޔެވުން ވެސް މެދު ކަނޑާލައިފި އެވެ. ރޯގާގެ ސަބަބުން ސްކޫލްތަކާއި ޔުނިވާސިޓީ ތަކުގެ ކިޔެވުން ވެސް ވަނީ މިއަދުން ފެށިގެން ބުރާސްފަތި ދުވަހުގެ ނިޔަލަށް މެދުކަނޑާލާފައެވެ.
ކޮލެޖްތަކުގެ ކިޔެވުން ވެސް މެދުކަނޑާލާފައި ވަނީ މިއަދުން ފެށިގެން މި ހަފްތާގެ ބުރާސްފަތި ދުވަހާ ހަމައަށެވެ. މި ގޮތުން ކިޔެވުން މެދު ކަނޑާލައިފައިވާ ކޮލްޖްތަކަކީ، ސައިރިކްސް ކޮލެޖް، މެޕްސް ކޮލެޖް، ކްލިކް ކޮލެޖް، ވިލާ ކޮލެޖް، އެވިޑް ކޮލެޖް އަދި މައި ކޮލެޖް އެވެ.
ރޯގާގެ ހާލަތު އިތުރަށް ގޯސްވާ ކަމުގައި ނުވާނަމަ އަންނަ ހޮނިހިރު ދުވަހުން ފެށިގެން އަލުން ވެސް ކިޔެވުން ކުރިޔަށް ދާނެ ކަމަށް ވެސް މައުލޫމާތު ލިބިފައި ވެއެވެ. މީގެ އިތުރުން މިއަދުން ފެށިގެން މިޑްޓާމް ޗުއްޓީ ނިމެންދެން ރާއްޖޭގެ ހުރިހާ ސްކޫލްތަކެއްގެ ކިޔެވުން ވަނީ ބަންދުކޮށްފަ އެވެ. މީގެ އިތުރަށް ގައުމީ ޔުނިވަސިޓީ އާއި އިސްލާމިކް ޔުނިވަސިޓީގެ ކިޔެވުން ވެސް ވަނީ މެދުކަނޑާލައިފަ އެވެ.
އަދި މިހާތަނަށް މިބަލީގައި އެކަކު މަރުވެ މާބަނޑު އަންހެނެއް ވަނީ ސީރިއަސް ހާލަތުގަ އެވެ. ރެއާ ހަމައަށް 251 މީހެއްގެ ސާންޕަލް އެޗް1އެން1 އަށް ޓެސްޓްކުރެވިފައިވާއިރު 51 މީހުން ވަނީ އެ ބައްޔަށް ޕޮޒިޓިވް ވެފަ އެވެ.
ސްވައިން ފްލޫގެ އަލާމާތްތަކަކީ ވެސް ކެއްސުން، ހުން އައުން، ކަރުގައި ރިއްސުން، ނޭފަތުން ފެން އައުން ނޭފަތް ބެދުން، ގައިގައި ރިއްސުން، ބޮލުގައި ރިއްސުން، ހީކެރުވުން އަދި ވަރުދެރަވުމެވެ. މި ރޯގާ ކޮންޓްރޯލް ކުރުމުގެ ގޮތުން، ރޯގާ ޖެހިފައިވާ އިރު ކެއްސާ ކިބިހި އަޅާ އިރު އަގަމަތި ރަނގަޅަށް ނިވާ ކުރުމާއި ރޯގާ އަދި ހުން ޖެހިފައި ވާ ނަމަ، އާންމު ތަންތަނަށް ނުނިކުތުމާއި ރޯގާ އަދި ހުން އައިސް ގިނަ ދުވަސް ވާނަމަ ވީހާ ވެސް އަވަހަށް ޑޮކްޓަރަކަށް ދައްކައި ގިނައިން ދިޔާ އެއްޗިހި ބޭނުން ކުރުމަށް ވެސް އެޗްޕީއޭއިން ވަނީ އިލްތިމާސްކޮށްފަ އެވެ.