ކޮލަމްބިއާގެ ވިންގާ ހުއާން ކުއަޑްރާޑޯގެ ލަނޑާއެކު އިޓާލިއަން ލީގުގައި ރޭ ސަމްޕްޑޯރިއާ އަތުން 1-0 އިން މޮޅުވެ، ތާވަލްގެ އެއްވަނައިގައި އޮތް ޔުވެންޓަސް އަށް ޕޮއިންޓްގެ ލީޑެއް ހޯދައިފި އެވެ.
ކްވަޑްވޯ އަސަމޮއާ ހުރަސްކޮށްދިން ބޯޅަ ބޮލުން ގޯލުގެ ތެރެއަށް ވައްދާލައި، ކުއަޑްރާޑޯ ޔުވެންޓަސްއަށް ލީޑު ހޯދައިދިނީ މެޗުގެ ހަތް ވަނަ މިނެޓުގަ އެވެ.
މި މެޗުން މޮޅުވެ ޔުވެންޓަސް ތާވަލްގެ އެއްވަނައިގައި އޮތީ 73 ޕޮއިންޓާއެކު އެވެ. ރޯމާ ތާވަލްގެ ދެވަނައިގައި އޮތީ 65 ޕޮއިންޓާއެކު އެވެ. ރޯމާ ވަނީ ރޭ ސަސޫލޯ އަތުން 3-1 އިން މޮޅުވެފަ އެވެ. ތިން ވަނައިގައި 63 ޕޮއިންޓާއެކު އޮތީ ނަޕޯލީ އެވެ. ނަޕޯލީ ވަނީ ރޭ އެމްޕޮލީ އަތުން 3-2 އިން މޮޅުވެފަ އެވެ.
ރޭގެ މެޗުން ޔުވެންޓަސް އަށް ދިމާވި ހިތްހަމަނުޖެހުމަކީ މުހިންމު ފޯވަޑް ޕައުލޯ ޑިބާލާ އަށް އަނިޔާވުމެވެ. މެޗުގެ 28 ވަނަ މިނިޓުގައި ޑިބާލާ އަށް ލިބުނު އަނިޔާއަކާ ގުޅިގެން އޭނާ ވަނީ ބާލައިފަ އެވެ.
ޔުވެންޓަސްގެ ކޯޗު މަސިމޯ އެލެގްރީ ބުނީ ޑިބާލާ އަށް ލިބުނު އަނިޔާ ސީރިއަސް ކަމަށް ގަބޫލެއް ނުކުރެވޭ ކަމަށެވެ. އަދި މި މެޗުގައި ޔުވެންޓަސް އިން ދެއްކި ކުޅުމާމެދު ވަރަށް ހިތްހަމަޖެހޭ ކަމަށެވެ.
