ރާއްޖޭގައި ފެތުރެމުންދާ އެޗްވަންއެންވަން ސްވައިން ފުލުއާ ގުޅިގެން ފަސް ކުރި، އަތޮޅު ފުޓްބޯޅަ މުބާރާތް، ނުވަތަ މިނިވަން ޗެމްޕިއަންޝިޕް ހދ. ކުޅުދުއްފުށީގައި މިއަދު ރަސްމީކޮށް ފަށާނެ އެވެ.
މިއަދު ފެށި ނަމަވެސް، އަދި ކުޅޭނީ ހަމައެކަނި، ހދ. އަތޮޅު މެޗުތަކެވެ. ތިން ގުރޫޕަކަށް ބަހައިލާފައިވާ، ހދ. އަތޮޅުގެ މެޗުތަކުގެ ތެރެއިން މިއަދު ކުޅޭނީ، ރަސްމީކޮށް ހުޅުވާ މެޗު އެކަންޏެވެ.
މިނިވަން ޗެމްޕިއަންޝިޕް ވެސް ކުރިން ފަށަން އޮތީ މީގެ ހަފުތާއެއް ކުރިން ނެވެ. ނަމަވެސް ސްވައިން ފުލޫއާ ގުޅިގެން، އެފްއޭއެމުން، ވަނީ، އެ އިދާރާއިން އިންތިޒާމު ކުރާ ހުރިހާ މުބާރާތެއްގެ މެޗުތައް މެދުކަނޑާލާފަ އެވެ. މިނިވަން ޗެމްޕިއަންޝިޕް ހުޅުވައި ދޭނީ ހދ. އަތޮޅުގެ ގުރޫޕް އެކެއްގައި ކުޅުދުއްފުއްޓާއި ކުރިނބީ މެޗުން ނެވެ. ގުރޫޕް އެކެއްގައި ދެން ހިމެނޭ އަނެއް ޓީމަކީ ކުމުންދޫ އެވެ.
ގުރޫޕް ދޭއް ގައި ހިމެނެނީ ނޮޅިވަރަމްފަރާއި ނޮޅިވަރަމާއި ފިނޭ އެވެ. ގުރޫޕް ތިނެއްގައި ހިމެނެނީ، ހަނިމާދޫ އާއި ނޭކުރަންދޫ އާއި ހިރިމަރަދޫ އެވެ.
މިއަހަރުގެ މިނިވަން ޗެމްޕިއަންޝިޕުގެ ގަދަ ހަތަރު ޓީމަށް، ދިވެހި ޕްރިމިއާ ލީގުން ޖާގަ ލިބޭނެ އެވެ. މިނިވަން ޗެމްޕިއަންޝިޕް މިއަދު ފެށި ނަމަވެސް، މާލޭ ލީގާއި، އިންޓަ ސްކޫލް ފުޓްބޯޅަ މުބާރާތް ފަށާނެ ތާރީހެއް އަދި އިއުލާން ނުކުރެއެވެ.