ދުވަސްގަނޑަކަށް ފަހު މިދިޔަ މަހަކީ ރާއްޖޭގެ ސިޔާސީ ކަނޑުގައި ރާޅު ހުރިވަރު ފެނިގެން ދިޔަ މަހެކެވެ. އިދިކޮޅު ހަތަރު ލީޑަރުން ގުޅުމާއި އިދިކޮޅު ޕާޓީތައް އެއް ވަލެއްގައި ހިފައި ސަރުކާރާ ދެކޮޅަށް ނުކުތުމަކީ ސިޔާސީ ބޮޑު ހަލަބޮލި ކަމެއް ކުރިމަތި ކުރުވި ސަބަބެވެ. އެ ފަރާތްތަކުން މަޖިލީހުގެ ރައީސާއި ނައިބު ރައީސް ވަކިކުރަން ފެށި މަސައްކަތަކީ ސިޔާސީ ހަރަކާތުގައި ވައްޓާލި ބޮމެކެވެ. "ހަމަލާ" ފުރަތަމަ އަމާޒުވި މަޖިލީހުގެ ރައީސް އަބްދުﷲ މަސީހުގެ މައްސަލަ ސަރުކާރު ކޯލިޝަނުން ތެދުވެ ފުލުން ދުއްވާލި ގޮތް މިދިއަ މަހުގެ 27 ވަނަ ދުވަހު މަޖިލިސް ތަޅުމުން ވަރަށް ސާފުކޮށް ފެނިގެން ދިޔަ އެވެ. މަސީހުގެ އިތުބާރު ނެތް ކަމަށް ފާސް ކުރަން އިދިކޮޅުން ދެއްކި ވާހަކަތަކާއި ކުރަހައި ދިން ޕްލޭންތަކުގައި ހިމެނޭ ބައެއް ކަންކަން ބޭރަށް ނެރެ، ވޯޓްގައި ވާނެގޮތެއް ލަފާ ކުރަން އޮޅޭވަރަށް ވާންދެއްކިއެވެ. ސިޔާސީ ފޮނި ވާހަކައިގެ ބަދަލުގައި ފެނިގެން ދިޔައީ އަސާސެއް ނެތް ޝަކުވާތަކެއް ތަޅުމަށް ބަންޑުން ޖަހާލުމަށް ފަހު އިދިކޮޅު ފަރާތްތައް ތަޅުން ދޫކޮށް ދިޔަތަނެވެ.
ހަތާވީހުގެ ބައްޔަށް ފަހު އިދިކޮޅުން މިހާރު ވަނީ މަޖިލީހުގެ ނައިބު ރައީސް، ހުޅު ހެންވޭރު ދާއިރާގެ މެންބަރު ރީކޯ މޫސާ މަނިކު "ދުއްވާލާން" މައްސަލަ ވައްދާފަ އެވެ. މޫސަގެ މައްސަލަ މި މަހު 11 ވަނަ ދުވަހަށް ތާވަލުކޮށްފައިވާއިރު ސިޔާސީ މަޝްރަހުގެ ލޮޅުން ކުރިއެކޭވެސް އެއްވަރަށް އެބަހުއްޓެވެ. އެހެން ނަމަވެސް އިދިކޮޅު ފަރާތްތައް ގުޅިގެން ފޮނުވާލި ސިޔާސީ ހަމަލަ، މަސީހުގެ ވޯޓް ސުމެއްގައި ޖެހުމުން މިވަގުތަށް އިދިކޮޅުން އުފައްދާ ލޮޅުން ހުރީ ފުނުގަ އެވެ. މީގެ ކުރިން އިދިކޮޅު ފަރާތްތަކުގެ އަތުގައި އޮތް ކަމަށް ބުނާ "އަގުލަބިއްޔަތު" އަދި އުންމީދާއި ޖޯޝެއް މިހާރު ބޭރަކަށް ނުފެނެ އެވެ. ހަމައެކަނި ފެންނަނީ ބަލި ގަބޫލު ނުކޮށް މަންޒަރު ބަދަލު ކުރަން މަސައްކަތް ކުރާ ތަނެވެ.
އެހެން ނަމަވެސް އޭޕްރީލް 11 ކުރިޔަށް އޮތުމުން މިއީ ސިޔާސީ މަސްރަހުގައި ކޮންމެ ފަދަ ކަމެއްވެސް ހިނގާފާނެ ހަފުތާއެކެވެ. އަނެއްކޮޅުން މަސީހުގެ މައްސަލަގައި ލިބުނު ކާމިޔާބާއެކު ވެސް މޫސަގެ މައްސަލަ އެޖެންޑާވެފައި އޮތުމުން ސަރުކާރު ކޯލިޝަން "އަތް އުރާލައިގެން" ތިބޭނެ ކަމަކަށް ވެސް ނުބެލެވެ އެވެ. މޫސައަކީ ސަރުކާރު ކޯލިޝަނަށް ކިހާ މުހިންމު ފަރާތެއްކަން އެމީހުނަށް އެނގެ އެވެ. އަނެއް ކޮޅުން ބުނަނީ އަތް އުފުލިޔަސް ފައި އުފުލިޔަސް 11 ވަނަ ދުވަހު މޫސަ މަޖިލީހުގެ ނައިބު ރައީސް ކަމުން ބޭރުކޮށްލާނެ ކަމަށެވެ. މޫސަ ބޭރުކޮށްލެވޭ ވަރަށް އިދިކޮޅަށް ވޯޓު ހަމަ ކުރެވިދާނެ ހެއްޔެވެ؟ މޫސަގެ އިތުބާރު ނެތް ކަމަށް ފާސްކޮށްގެން ހާސިލް ވާނީ ވަކިކޮން ކަމެއްތޯ ވެސް ސުވާލު އުފެދެ އެވެ.
"27 ގައި ނެގި ވޯޓަކީ ސައްހަ ވޯޓެއް ނޫން. އެހެންވެ މަސީހުގެ މައްސަލަ ވަރަށް އަވަހަށް އަލުން ހުށަހަޅާނަން. އަދި އޭގެ ކުރިން މޫސަގެ މައްސަލަ ވެސް ފާސްކޮށް މަގާމުން ދުރުކުރުވާނަން. އަޅުގަނޑުމެން މިތިބީ އިދިކޮޅު ފަރާތްތަކުން ގުޅިގެން އެކައްޗެއް ކިޔައިގެން. އަދި ސަރުކާރު ފަރާތުން ވެސް ފަހަތަށް ޖެހިވަޑައިގެން ތިއްބެވި މެންބަރުން މިފަހަރަކު ދުލެއް ނުކުރާނެ،" އަވަސް އިން ކުރި ސުވާލަކަށް ޖަވާބު ދެއްވަމުން އިދިކޮޅު ކޯލިޝަންގެ އިސް މެންބަރަކު ވިދާޅުވި އެވެ.
މަސީހުގެ މައްސަލާގައި ނެގި ވޯޓުން އިދިކޮޅު ފަރާތްތައް ޖެއްސި އެންމެ ބޮޑު ޝަކުވާއަކީ ރޯލް ކޯލް ވޯޓަށް ދިޔުމަށް ނެގި އިލެކްޓްރޯނިކް ވޯޓުގައި ގަލޮޅު ދެކުނު ދާއިރާގެ މެންބަރާއި ރީކޯ މޫސަ ވޯޓުލާފައިވާ މައްސަލަ އެވެ. އަދި ހަލާކުވެފައި ހުރި މެޝިނަކުން ނަގާ ވޯޓު ސައްހަ ވާނެ ގޮތެއް ނުފެންނަ ކަމަށް ވިދާޅުވަމުން ދިޔަ އެވެ. ނަމަވެސް ދާދި ފަހުން ވަނީ އެދުވަހު ކަން ހިނގައި ދިޔަ ގޮތް ވެސް ފަޅާ އަރައިގަ އެވެ. އަދި މަހުލޫފްއާއި މޫސަގެ ވޯޓިން ސިސްޓަމްއާ މެންބަރަކު ކުޅުއްވި ވީޑިއޯއިން އެ ޝަކުވާތައް ކުރައްވާ ފަރާތްތަކުގެ އަނގަ ބަންދުވާ ވަރުވެ އެވެ. ޖެއްސޭނެ އިތުރު މައްސަލައެއް ނެތެވެ.
ސަރުކާރު ކޯލިޝަނުން ވަނީ މޫސަގެ އިތުބާރު ނެތް މައްސަލަ ވެސް ސުމަކުން ދުއްވާލާނެ ކަމަށް ބުނެފަ އެވެ. ޕީޕީއެމާއި އެމްޑީއޭގެ ކޯލިޝަން ގުޅިގެން 27 ގައި މަސީހުގެ ދިފާއަށް ނުކުތް ގޮތަށް މޫސަގެ ހިމާޔަތުގައި ވެސް ނުކުންނާނެ ކަމަށް ވެސް މިހާތަނަށް ބުނެފައިވާއިރު މޫސަ ވަނީ އޭނާގެ ލޯޔަލްޓީ ސަރުކަރަށް މިހާތަނަށް ދައްކުވައިދީފަ އެވެ.
"އަޅުގަނޑުމެން މި ތިބީ މަޖިލިހުގެ ނައިބު ރައީސް މޫސާ މަނިކާއެކު. އަޅުގަނޑުމެން ޕީޕީއެމް/އެމްޑީއޭ ކޯލިޝަންގެ އެއްބައިވަންތަކަން މޫސަގެ ވޯޓު ނަގާ ދުވަހު ވެސް އިރާދަކުރެއްވިއްޔާ ފެންނާނެ،" ޕީޕީއެމްގެ ޕީޖީ ގްރޫޕް ލީޑަރު އަހުމަދު ނިހާން ހުސެން މަނިކު ވިދާޅުވި އެވެ.
އަދި އެހެން މެންބަރަކު ވިދާޅުވި ގޮތުގައި ހުރިހާ ފޯމިއުލާތަކެއް ހަދާ ނިމުމަށް ފަހު އިދިކޮޅަށް ލިބުނީ ސުމެކެވެ. ދެންވެސް ނުކުންނާނީ ސުމެއްގެ ނަތީޖާއެކެވެ.
"މޫސަގެ އިތުބާރު ނެތް މައްސަލާގައި އިދިކޮޅު މީހުން ތިއްބަސް ބޮޑު އަދި ސާފު އަގުލަބިއްޔަތެއް އަޅުގަނޑުމެންގެ އޮންނާނެ. އެކަން މިހާރު ވެސް އޮންނާނީ ޔަގީންވެފަ. އަޅުގަނޑުމެން އެކަން ސާބިތުކޮށްދީފިން... ކިތަންމެ ގިނައިން މޫސަގެ ވެސް މަސީހުގެ ވެސް މައްސަލަ ހުށަހެޅިޔަސް ބޭރުކޮށްލާނަން،"
މަސީހުގެ މައްސަލަ މަޖިލީހަށް ވެއްދުމަށް 26 މެންބަރުންގެ ސޮއި ލިބުން ނަމަވެސް މޫސަގެ މައްސަލަ ވެއްދުމަށް އިދިކޮޅު އެމްޑީޕީއަށް އެއްކުރެވުނީ 15 މެންބަރުންނެވެ. އެއީ އިތުބާރު ނެތް މައްސަލައެއް މަޖިލީހަށް ވެއްދުމަށް ބޭނުންވާ ސީދާ އަދަދެވެ. އަނެއްކޮޅުން މޫސައަކީ މަޖިލީހުގެ ރައީސަށް އެހީތެރިވެ ދެއްވުމުގެ ދައުރެއް އޮތް ބޭފުޅަކަށް ވެފައި މޫސައަކީ އިދިކޮޅު ފަރާތްތަކުގެ ތެރޭގައި "ނަމެއް ހޯއްދަވާފައި އޮތް" ބޭފުޅަކަށް ވުމުން މަސީހަށް ވުރެ ބޮޑަށް މޫސަގެ މައްޗަށް އިދިކޮޅުގައި ސޮފްޓް ގޮތެއް އޮތުމަކީ ވަރަށް ގާތް ކަމެކެވެ.
އެހެންކަމުން 11 ވަނަ ދުވަހު ވޯޓުވެސް ނިމޭނެ ގޮތް ލަފާވެ އެވެ. މިހާތަނަށް ކަން ވެފައި ހުރި ގޮތަށް ބަލާ އިރު މޫސަގެ އިތުބާރު ނެތް ކަމަށް ފާސް ވާނެ އެންމެ ކޮޅެއްވެސް ނުފެނެ އެވެ.
"އަޅުގަނޑަކީ މަޖިލީހުގެ ރައީސް ހަވާލު ކުރާ މަސައްކަތްތައް ކުރަން ހަވާލުވެ ހުންނަ މީހެއް. މެންބަރުންނާއި ރައީސްގެ ނިންމުންތަކަށް އެއްވެސް ބާރެއް ފޯރުވާ ނަތީޖާ ބަދަލު ކުރުމުގެ އެއްވެސް ބާރެއް އަޅުގަނޑުގެ ނޯންނާނެ. ނަމަވެސް އިދިކޮޅު ފަރާތްތައް އެ ދޭތެރެއިން ވެސް އަޅުގަނޑުގެ އިތުބާރު ނެތް މައްސަލަ ހުށަހަޅާފައި މިއޮތީ މުޅިން އަމިއްލަ ސިޔާސީ ބޭނުމެއްގައި. އެއްގޮތަކަށް ވެސް އަޅުގަނޑުގެ މައްސަލައެއް އޮވެގެން ކަމަށް އަޅުގަނޑަކަށް ގަބޫލެއް ނުކުރެވޭ،" ރީކޯ މޫސަ ވިދާޅުވި އެވެ.