ސަރުކާރު ހިއްސާވާ ކުންފުނިތަކާއި ފުރަތަމަ ޑިވިޝަންގެ ކްލަބުތައް ގުޅާލުމަކީިި ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ސަރުކާރާ ގުޅިގެން އެޅި ވަރަށް ރަނގަޅު ފިޔަވަޅެވެ. ކްލަބުތަކުން އެކަން ބަލައިގަނެވެ. އަދި މިއީ ފުޓްބޯޅައިގެ ތަރައްގީ އަށް ސަރުކާރުން އެޅި ވަރަށް ރަނގަޅު ފިޔަވަޅެކެވެ. މީގެ ކުރީގެ ސަރުކާރުން ފުޓްބޯޅަ އަށް އިސްކަންދޭކަން އޮތީ ހަމައެކަނި އަގަ ބަހުންނެވެ. އެކަމަކު އަދުގެ ސަރުކާރުން އެކަން އަމަލީގޮތުން ދައްކައިފި އެވެ.
ކްލަބުތަކަށް އެހީދޭނެ ކުންފުނިތައް މިހާރު ވަނީ ކަނޑައަޅައިފަ އެވެ. މާލޭ ލީގުގައި ވާދަކުރާ ކޮންމެެ ޓީމަކަށް، އެ ޓީމަކާ ޕާޓްނަޝިޕް ހަދާ ކުންފުންޏަކުން 2 މިލިއަން ރުފިޔާ ދޭނެ އެވެ. އަދި ޕްރިމިއާ ލީގަށް ކޮލިފައިވެއްޖެ ނަމަ، އިތުރު ދެ މިލިއަން ރުފިޔާދޭ ގޮތަށް ވަނީ ހަމަޖައްސައިފަ އެވެ. އެކަމަކު އަދި ކްލަބުތަކާއި ކުންފުނިތަކާމެދު އެއްބަސްވުމުގައި ސޮއެއްނުކުރެ އެވެ.
އެކަމަކު މި އަހަރުގެ ފުޓްބޯޅަ ސީޒަން ފެށި، އަހަރުގެ ހަތަރު ވަނަ މަހަށް އެޅިއިރު ވެސް، އެފްއޭއެމް މެދުވެރިވެގެން ކްލަބުތަކަށް ލިބެންޖެހޭ ފައިސާ ނުލިބި އޮތުމަކީ ކްލަބުތަކަށް ގިނަ ދަތިތަކެއް ކުރިމަތިވެފައިވާ ކަމެކެވެ. ކޮންމެ ކްލަބަކުން ވެސް އަހަރުގެ ބަޖެޓް ހަދަނީ ސަރުކާރުން ލިބޭ ފައިސާ ވެސް ހިމަނައިގެނެވެ. ދެން ކްލަބުތަކުން ފައިސާ ހޯދަނީ ސްޕޮންސަރުންނާއި ހެޔޮ އެދޭ ފަރާތްތަކުންނެވެ.
އެކަމަކު ފައިސާ ލިބުން ލަސްވުމާ ގުޅިގެން، ބައެއް ފުރަތަމަ ޑިިވިޝަންގެ ގިނަ ކްލަބުތަކަށް މިހާރު ވަނީ ކުޅުންތެރިންނަށް މުސާރަ ދިނުމަށް ދަތިވެފަ އެވެ. ބައެއް ކްލަބުތަކުން ދެ މަސް ދުވަހުގެ މުސާރަ ނުލިބޭ ކަމަށް ބައެއް ކުޅުންތެރިން ބުނެ އެވެ.
"މިހާރު މާޗް މަސް މި ނިމުނީ. އެކަމަކު އަދި ކްލަބުތަަކަށް މި އޮތީ ފައިސާ ނުލިބި،" ފުރަތަމަ ޑިވިޝަންގައި ވާދަކުރާ ކްލަބެއްގެ އޮފިޝަލެއް ބުންޏެވެ. "މިއީ ރަނގަޅު ކަމެއް ކްލަބުތަކަށް. އެކަމަކު ފައިސާ ނުލިބި ގިނަ ދުވަސްވަންޏާ ކްލަބުތަކަށް ދަތިވާނެ."
ބައެއް ކްލަބުތަކުން ބުނާގޮތުގައި ތިން މިލިއަން ރުފިޔާ ސަރުކާރުން ކުންފުނިތަކުން ކޮންމެ ކްލަބަކަށް ދޭތީ، ކްލަބުތަކަށް ސްޕޮންސާ ދިނުމަށް ބައެއް އަމިއްލަ ކުންފުނިތަކުން ފަސްޖެހެ އެވެ.
"ސްޕޮންސަރެއް ހޯދަން ދާއިރަށް މި ބުނަނީ ކްލަބުތަކަށް ސަރުކާރު ކުންފުނިތަކުން ދޭ ނޫންހޭ ތިން މިލިއަން. ދެން އިތުރަށް ކޮން ސްޕޮންސާއެއްހޭ ބޭނުންވާނީ،" ކްލަބެއްގެ އިސް ފަރާތެއް ބުންޏެވެ.
އެފްއޭއެމް އިން ބުނާގޮތުގައި ކްލަބުތަކާ ސަރުކާރު ކުންފުނިތަކާ މި ހަފުތާގެ ތެރޭގައި އެއްބަސްވުމުގައި ސޮއިކުރާނެ ކަމަށް ބެލެވެ އެވެ. އެއްބަސްވުމުގައި ސޮއިކުރި ނަމަވެސް، ފައިސާ ލިބޭނެ ދުވަހެއް ކްލަބުތަަކަށް ނޭނގެ އެވެ.
ބައެއް ތަޖުރިބާކާރުން ބުނާގޮތުގައި ކްލަބުތަކާއި ކުންފުނިތަކަށް ވެސް ވަގުތު ދިނުމަށް ފަހު، އަންނަ އަހަރު ކްލަބުތަކާ ކުންފުނިތައް ޕާޓްނަޝިޕް ހެދުމަށް މަޑުކޮށްލި ނަމަ، ކްލަބުތަކާއި ކުންފުނިތަކަށް ވެސް ފައިދާކުރާނެ އެވެ. ކުންފުނިތަކާއި ކްލަބުތަކާ ދެމެދު ހެދޭ އެއްބަސްވުމުގެ ދަށުން، ކްލަބުތަކުން ވެސް ފުރިހަމަކުރަންޖެހޭ ގިނަ ކަންތައްތައް އެބަހުއްޓެވެ. އަންނަ އަހަރަށް ޕާޓްނަޝިޕް ހެދުން ފަސްކުރި ނަމަ، ކްލަބުތަކަށް ވެސް އެކަންތައްތަކަށް ތައްޔާރުވުމަށް ވަގުތު ލިބޭނެ އެވެ. އަދި ދުރާލާ ބަޖެޓް ރާވައިގެން، ކްލަބުތަކަށް ފައިސާ ދިނުމަށް ކުންފުނިތަކަށް ވެސް ފަސޭހަވާނެ އެވެ.
ކްލަބުތަކާއި ކުންފުނިތަކުގެ މެދުގައި ހަދާ އެއްބަސްވުމުގެ ދަށުން ކްލަބުތަކުން ފުރިހަމަކުރަންޖެހޭ ބައެއް ކަންތައްތަކަށް އަމަލުކުރުން ފަސްކުރުމަށް ގިނަ ކްލަބުތަކުން މިހާރު ވެސް ވަނީ ހުށަހަޅައިފަ އެވެ.
ސަރުކާރު ކުންފުނިތަކުން ލިބޭނެ ފައިސާ އަށް ބަލާފައި، ހުރިހާ ކްލަބަކުން ވެސް މި ސީޒަނަށް ބިދޭސީ ކުޅުންތެރިން ގެނެސްފަ އެވެ. އެކަމަކު ގިނަ ކްލަބުތަކުގެ މާލީ ހާލަތު މި ވަގުތު ދަށްވެ، ބައެއް ކްލަބުތަކުގެ ބިދޭސީ ކުޅުންތެރިން މި ވަގުތު ތިބީ މުސާރަ ނުލިބިގެން ކުޅޭ ހިތް ކެނޑިފަ އެވެ.
ކްލަބުތަކުން ޝަކުވާކުރަނީކީ ނޫނެެވެ. ސަރުކާރުގެ ނިންމުމަށް ކްލަބުތަކުން ތާއީދު ވެސް ކުރެ އެވެ. އެކަމަކު ފައިސާ ލިބުން ލަސްވުމުގެ ސަބަބުން، މުސާރަ ނުދެވި، ޓީމަށް އަސަރުކުރަން ފަށާ ހިސާބުން ކްލަބުތަކުން ކަންބޮޑުވުން ފާޅުކުރާނެ އެވެ. ކްލަބުތަކުގެ އުންމީދަކީ ކުންފުނިތަކާއެކު އެއްބަސްވުމުގައި ސޮއިކުރެވި، ވީ އެންމެ އަވަހަކަށް ކްލަބުތަކަށް ފައިސާ ލިބުމެވެ. ކްލަބުތަކާއި ކުންފުނިތަކުގެ ޕާޓްނަޝިޕްގެ ފޮނިކަން ކްލަބުތަކަށް ފެންނާނީ އެ ހިސާބުންނެވެ.