ރޯމާ މޮޅުވެ، ޔުވެންޓަސްގެ ލީޑު ކުޑަކޮށްފި

އިޓާލިއަން ސީރިއާގައި ރޭ އެމްޕޮލީ އަތުން 2-0 އިން މޮޅުވެ، ރޯމާ އިން ތާވަލްގެ އެއްވަނައިގައި އޮތް ޔުވެންޓަސްގެ ލީޑު ކުޑަކޮށްފި އެވެ.

ރޯމާގެ ދަނޑުގައި ރޭ ކުޅުނު މެޗުގައި ރޯމާގެ ދެ ލަނޑު ވެސް ކާމިޔާބުކުރި ބޮސްނިއާގެ ފޯވަޑް އެޑިން ޖެކޯ އެވެ. މި މެޗުގައި ޖެހި ދެ ލަނޑާއެކު، ޖެކޯ ވަނީ 23 ލަނޑު ހަމަކޮށް، އިޓާލިއަން ސީރިއާގެ ލަނޑު ލިސްޓުގެ ކުރިއަށް ޖެހިލައިފަ އެވެ.

މި މެޗުން ރޯމާ މޮޅުވުމުން ތާވަލްގެ އެއްވަނައިގައި އޮތް ޔުވެންޓަސްގެ ލީޑު ވަނީ ފަސް ޕޮއިންޓަށް ކުޑަވެފަ އެވެ. ލީގުގައި މިރޭ ޔުވެންޓަސް ނުކުންނާނީ ނަޕޯލީއާ ދެކޮޅަށެވެ. މި މެޗުން ޔުވެންޓަސް މޮޅުވެއްޖެ ނަމަ، އެ ޓީމަށް ރޯމާގެ މައްޗަށް އޮތް ލީޑު އަނެއްކާ ވެސް ފުޅާކުރެވޭނެ އެވެ.

ޔުވެންޓަސް އެއްވަނައިގައި އޮތީ 73 ޕޮއިންޓާއެކު އެވެ. ދެވަނައިގައި 68 ޕޮއިންޓާއެކު ރޯމާ އޮތްއިރު، ތިން ވަނައިގައި އޮތީ ނަޕޯލީ އެވެ. ހަތަރު ވަނައިގައި ލާޒިއޯ އޮތްއިރު، އިންޓަ މިލާން އޮތީ ފަސް ވަނައިގަ އެވެ.