އިންޓަ ސްކޫލު ފުޓްބޯޅަ މުބާރާތް އަހަރު ކުރީ ކޮޅު ފަށައި ދޮޅު މަސް ދުވަސްތަރޭ ރާސް ލާފައި އެދާ ގޮތަށް ނިންމާ ލަނީ އެވެ. ސްކޫލު ތަކުން އެ މުބާރާތަށް ތައްޔާރުވާން، އެއް މަސް ދުވަހުގެ ކުރިން ފަށާ ޕްރެކްޓިސް، މުބާރާތް ނިމުމާ ހަމަޔަށް ދެ މަސް ދުވަހުގެ ތެރޭގައި ނިމިގެން ދެ އެވެ. ބާކީ ކުޅުންތެރިންނަށް ފުޓްބޯޅައިގެ ރަނގަޅު ޓްރެއިނިން ލިބިގެން، ޕްރެކްޓިސް ކޮށް ލެވޭނީ އެ ދެ މަހު އެކަންޏެވެ. ބާކީ އޮތް ނުވަ މަހު، ސްކޫލު ތަކުގެ ދަރިވަރުން ހަދަންވީ ގޮތެއް، ކުޅެންވީ ގޮތެއް ބުނެއް ނުދެވެ އެވެ.
އެކަމަށް، ކުލަބު އީގަލްސްއިން ހައްލެއް ހޯދައި ދީފި އެވެ. އީގަލްސް، މިހާރު މަޝްހޫރު ވެފައި އޮންނަނީ، އެންމެ ގިނައިން ޒުވާން ކުޅުންތެރިން އުފައްދާ، ދިވެހި ފުޓްބޯޅަ ކްލަބުގެ ގޮތުގަ އެވެ. ސޯޅަ އަހަރުން ދަށުގެ ޓީމެއް އެކުލަވައިލަން އީގަލްސްއިން، ގޮވާލުމުން 80 ކުދިން ބައިވެރިވި އެވެ. އީގަލްސްގެ އޮފިޝަލަކު ވިދާޅުވީ މި އަހަރުގެ އިންޓަ ސްކޫލް ފުޓްބޯޅަ މުބާރާތުގައި ވާދަ ކުރާ ހުރިހާ ސްކޫލަކުން ފާހަގަ ކުރެވޭ ކުޅުންތެރިން އީގަލްސްގެ ސްކައުޓް ކޭމްޕްގައި ބައިވެރިވި ކަމަށެވެ.
"އެ 80 ކުދިންގެ ތެރެއިން ފުރާނާ ލާފައި، 30 ނުވަތަ 40 ށް ކުދިން ނަގާނަން، ތިން ދުވަހުގެ ކޭމްޕަކަށް ފަހު ފާހަގަ ކުރެވޭ އެންމެ ރަނގަޅު ކުދިން ފައިނަލު ކުރާނީ." އޭނާ ވިދާޅުވި އެވެ.
ފައިނަލު ކުރާ 40 ކުދިންނާ އެކު، އިގަލްސްގެ މެނޭޖްމެންޓުން އޮތީ މުޅި އަހަރަށް ބަހާލައިގެން، އެ ކުދިން ޓްރޭން ކުރުމަށް، ޕްރޮގްރާމެއް އެކުލަވާލާފަ އެވެ. ރާވަފާއި އޮތީ ދަނޑު ލިބޭ ތާވަލަކަށް ބަލައި ކޮންމެ ހަފުތާއަކު ދެ ދުވަސް ނުވަތަ ތިން ދުވަހުގައި ޕްރެކްޓިސް ކުރާ ގޮތަށެވެ. އެ އުމުރު ފުރާ ތަކުގެ ޓީމުތައް ހޯދައި ކޮންމެ ހަފުތާއަކު މެޗު ކުޅޭ ގޮތަށެވެ.
" ނުވަ މަސް ދުވަސް ދޭ އެކުދިން ފުޓްބޯޅާގައި ކުރާނެ މާ ބޮޑު ކަމެއް ނޯވެ، ގިނަ ފަހަރަށް ކޮންމެވެސް ހުސް ބިމަކަށް ގޮސް، ކުޑަ ގޯލައެއް ޖަހާލައިގެން ކުޅަލަ ކުޅެލާ ތިބޭނީ، އެކަށީގެންވާ ޓްރެއިނިން އެއް ނުލިބޭ،"
"ނަމަވެސް މި ފުރުސަތު ތަނަވަސް ކޮށްދިފައި ހަފުތާއަކު ދެ ދުވަސް ގެންދެވުނަސް ރަނގަޅު ޓްރެއިނިން ފޯރު ކޮށް ދެވެންޏާ އެ ކުދިންގެ ހުނަރު ތަރައްގީވާނެ، އަދި ރަނގަޅު ޓްރެއިނިން ތަކަށް ފަހު މެޗުތައް ކުޅެން ލިބޭނަމަ ވަރަށް ބާރަށް އިމްޕްރޫވް ވެގެންދާނެ."
ވަސީލަތް މަދު ކަމާއި ފެސިލިޓޭޓަރުންގެ މަދުކަމުގެ ޝަކުވާ ކުރަން ނުތިބެ، ފުރާވަރުގެ އެންމެ ޕީކްގައި ތިބި ކުދިން ގޮވައިގެން އީގަލްސް ދަނޑަށް ނިކުތީ އެވެ. އެހެން ކުލަބު ތަކަށާއި އިންސްޓިޓިއުޓް ތަކަށް ނަމުނާ ދައްކަމުން ނެވެ. އީގަލްސްގެ އިސް ނެގުމަށް އެފްއޭއެމްގެ ރައީސް ބައްސާމް އަދީލް ޖަލީލް ވަނީ ތައުރީފް ކޮށްފަ އެވެ.
"ޒުވާން ކުޅުންތެރިން އުފެއްދުމަށް އީގަލްސްއިން ނެގި އިސްނެގުމަށް ވަރަށް ބޮޑަށް ފާހަގަ ކުރަން، މިކަމަށް އީގަލްސްގެ ކޯޗް އިހްސާން އަބްދުލް ގަނީ (ސާންތީ) އާއި އީގަލްސް ޓީމަށް ތައުރީފް ހައްގު،" ބައްސާމް ވިދާޅުވެފައި ވެއެވެ.