މިދިޔަ އަހަރު މިނިވަން ޗެމްޕިއަންޝިޕްގެ ހދ އަތޮޅު މުބާރާތުގެ ފައިނަލު މެޗުގައި ހަނިމާދޫ އަތުން ބަލިވި ކުޅުއްދުއްފުށިން، އޭރުގެ ފައިނަލުގެ ހިތި ނަތީޖާ އަށް ބަދަލުހިފައި، މިއަހަރުގެ ފައިނަލުގައި ހަނިމާދޫގެ މައްޗަށް 3-1 ގެ ނަތީޖާއަކުން ކާމިޔާބު ހޯދައި، މިނިވަން ޗެމްޕިއަންޝިޕް ހދ އަތޮޅުގެ ޗެމްޕިއަންކަން ކުޅުދުއްފުށި ހޯދައިފި އެވެ.
މިދިޔަ އަހަރުގެ ފައިނަލު މެޗުން ހަނިމާދޫ މޮޅުވީ، 9-0 ގެ ތަފާތު ބޮޑު ނަތީޖާ އަކުންނެވެ.
މިއަދު ކުޅުނު ހދ އަތޮޅުގެ ފައިނަލުގައި، ފުރަތަމަ ލީޑް ނެގީވެސް ހަނިމާދޫއިންނެވެ. މެޗުގެ 14 ވަނަ މިނެޓްގައި އެ ޓީމަށް ލަނޑު ޖަހައި ދިނީ އަހްމަދު އަޒުމީލް އެވެ.
ކުޅުދުއްފުށިން ނަތީޖާ ހަމަހަމަ ކުރީ ފުރަތަމަ ހާފުގެ އެންމެ ފަހު ވަގުތުގައި އެޓީމަށް ލިބުނު ޕެނަލްޓީ އަކުން، ފަރުހަތު މުހައްމަދެވެ.
ދެ ވަނަ ހާފުގައި ކުޅުއްދުއްފުށިން ވަނީ ލީޑް ނަގާފަ އެވެ. މެޗުގެ 62 ވަނަ މިނެޓްގައި އެޓީމަށް ލީޑް ނަގައިދިނީ، އަންވަރު އާދަމް އެވެ.
އޭގެ ފަސް މިނެޓް ފަހުން ފަތުހުﷲ އާދަމް ވަނީ ކުޅުދުފުއްޓަށް ނަތިޖާގެ ފަރަގު ބޮޑުކޮށް ދީފަ އެވެ.