ފެނަކަ ކޯޕަރޭޝަންގެ މެނޭޖިން ޑިރެކްޓަރު، އަހުމަދު ނިމާލްގެ މައްޗަށް ކޮރަޕްޝަންގެ ބޮޑެތި ތުހުމަތުތަކެއްކޮށް އެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅައިފި އެވެ.
މިދިޔަ ބުދަ ދުވަހު މީހަކު އޭސީސީއަށް ހުށަހެޅި ޝަކުވާތަކުގައި ވާގޮތުން ކުންފުނީގައި ތިބި ޓެކްނިކަލް މީހުންގެ ލަފައެއް ނެތި ނިމާލް ބޭނުން ގޮތަކަށް ކަންކަން ކުރައްވަމުން ގެންދިޔުމުގެ ސަބަބުން ކުންފުނީގެ އިދާރީ އެތައް ކަމެއް ވަނީ ބޮއްސުންލައިގެން ގޮސްފަ އެވެ. އަދި ކުންފުންޏަށް ބޮޑު އަގުގައި ބައެއް ތަކެތި ހޯދާފައި ވަނީ ވެސް، ދައުލަތަށް ބޮޑެތި ގެއްލުންތަކެއް ވާގޮތަށް އުސޫލެއް ނެތި އެވެ.
ހަ ނުކުތާއެއް ފާހަގަކޮށް އެ ސިޓީގައި ނިމާލްގެ ބޮލުގައި އަޅުވާފައި އޮތް އެންމެ ބޮޑު ތުހުމަތަކީ، 400 އަށް ވުރެ ގިނަ ޖަނަރޭޓަރު ފެނަކައިގެ ސްޓޮކްގައި ހުއްޓާ އިތުރު 77 ޖަނަރޭޓަރު ބަޔަކާ ހަވާލުކޮށްގެން އެ ކުންފުންޏަށް ހޯދުމެވެ. ސިޓީގައިވާ ގޮތުގައި އެ އަދަދަށް ޖަނަރޭޓަރު ނުގަނެ، ކަރަންޓްގެ މައްސަލަ ހައްލު ކުރެވެން އޮއްވާ އަދި އިއާދަ ކުރަނިވި ހަކަތައިގެ މަޝްރޫއުތަކެއް ހިންގުމަށް ރާވާފައި ވަނިކޮށް އެ އަދަދަށް ޖަނަރޭޓަރު ގަތުމަކީ ބޭކާރު އަދި ދިގު މުއްދަތަކަށް ކުރެވޭނެ އިންވެސްޓްމަންޓެއް ނޫނެވެ. އަދި އިތުރު ރަށްރަށަށް ޖަނަރޭޓަރު ބޭނުން ނުވަނީސް އެހާ ގިނަ އަދަދެއްގެ ޖަނަރޭޓަރު ގަތުމަކީ ވިޔަފާރީގެ ވިސްނުމަކުން ބޭކާރު ކަމެއް ކަމަށް ވެސް ސިޓީގައިވެ އެވެ.
ޖަނަރޭޓަރުތައް ރާއްޖެ ގެނައުމާއި އެއާ ގުޅޭ ކޭބަލްތައް ގެނެސްފައި ވަނީ ރަނގަޅަށް ނުބަލަ އެވެ. އެހެން ވުމުގެ ސަބަބުން ކޭބަލްތައް ހަލާކުވެފައި ހުރުމުން ޖޫރިމަނާގެ ގޮތުގައި ހަތަރު ލައްކައަށް ވުރެ ގިނަ ރުފިޔާ ކުންފުނިން ކަސްޓަމްސްއަށް ދައްކަން ޖެހުނު ކަމަށް ވެސް ސިޓީގައިވެ އެވެ. މީގެ އިތުރުން އެއާ އެކު ބޭނުން ކުރުމަށް ގެނައި ބޯލްޓް ފަދަ ތަކެތި ގެނައުމުގައި ރަނގަޅަށް ނުބެލުމުގެ ސަބަބުން އެތަކެތި ރަށްރަށް ފޮނުވައި އިންޖީނުގެ ތަކަށް ތަކެތި ދޫކުރުމުގައި ބައެއް އެއްޗިހި މަދުވުން ފަދަ ބޮޑެތި މައްސަލަތައް ކުރިމަތިވި އެވެ. ނަތީޖާއަކަށް ވީ އެފަދަ ތަކެތި ދޫކުރުމުގައި ހަރުދަނާ ނިޒާމެއް ނެތި އެކަން ކުރަންޖެހުން ކަމަށް ވެސް ސިޓީގައިވެ އެވެ.
އިތުރަށް ފާހަގަކޮށްފައި ހުރި މައްސަލަތަކުގެ ތެރޭގައި، ވަޒީފާގެ ބަޔާނެއް ނެތި މުވައްޒަފުން ވަޒީފާއަށް ވެއްދުމާއި، ރަށްރަށުގެ ފެނަކައިގެ ގޮފިތަކުން ކުރަން ޖެހޭ ކަންތައްތައް ކަމަށްވާ މުވައްޒަފުން ސަލާމް ބުނުން ފަދަ ކުދިކުދި އިދާރީ ކަންކަން ވެސް ހެޑް އޮފީހުގެ ދަށަށް ބަދަލު ކުރުން ހިމެނެ އެވެ. އަދި ޓެކްނިކަލް ބޭފުޅުންނާ މަޝްވަރާ ނުކުރުމާއި އެޗްއޯޑީންގެ މެދުގައި ބައްދަލުވުންތައް ނުބާއްވައި ނިމާލު ބޭނުންވާ ގޮތަށް ކަންތައްތައް ކުރާ ކަމަށް ވެސް ސިޓީގައި ތުހުމަތުކޮށްފައިވެ އެވެ.
"މުހައްމަދު ނިމާލް އޭނާގެ މަގާމުގެ ނުފޫޒު ބޭނުންކޮށްގެން ކޮށްފައިވާ ކޮރަޕްޝަންގެ އަމަލުތައް ބައްލަވައި ފިޔަވަޅު އަޅުއްވައިދެއްވުމަށް އެދި ދެންނެވީމެވެ،" ސިޓީގައިވެ އެވެ.
އެ ތުހުމަތުތަކާ ގުޅިގެން ނިމާލްގެ ބަހެއް ހޯދުމަށް ގުޅި ނަމަވެސް އޭނާ ފޯނަށް ޖަވާބެއް ނުދެއްވަ އެވެ.