މާރާމާރީތައް އިތުރުވެފައި ވާތީ މަގުތައް އަމާން ކުރުމަށް ފުލުހުންނާއި ގުޅިގެން ސިފައިން ހާއްސަ އޮޕަރޭޝަނެއް ފަށައިފި އެވެ.
އެ އޮޕަރޭޝަންގައި އެއްގަމު އުޅަނދު ޗެކް ކުރުމާއި، ކަނޑުގެ އުޅަނދު ފަހަރުތައް ޗެކް ކުރަމުގެ އިތުރުން މީހުން ބަލާ ފާސްކުރާނެ ކަމަށް ވެސް ސިފައިން ބުންޏެވެ. އެމްއެންޑީއެފްގެ މީޑިއާ އޮފިޝަލް ވިދާޅުވީ އަމަން ގާއިމް ކުރެވެންދެން އެ އޮޕަރޭޝަން ހުއްޓާނުލާ ކުރިއަށް ގެންދާނެ ކަމަށެވެ. އަދި އެ އޮޕަރޭޝަނަށް އާންމުންގެ އެއްބާރުލުމާއި އެހީތެރިކަން ދެއްވުމަށް އޭނާ އެދިވަޑައިގެންނެވި އެވެ. ސިފައިން ބުނި ގޮތުގައި އެ އޮޕަރޭޝަންގައި ސިފައިން ވެސް ހަރަކާތްތެރިވާނީ ފުލުހުންގެ ފުރިހަމަ އެއްބާރުލުމާ އެކުގަ އެވެ.
"އޮޕަރޭޝަން ހުއްޓާލާނެ ދުވަހެއް ނޭނގޭ. އޮޕަރޭޝަން އަޅުގަނޑުމެން ކުރިއަށް ގެންދާނަން މުޖުތަމައުގައި އަމަންއަމާންކަން ގާއިމް ކުރެވެންދެން،" އޮފިޝަލް ވިދާޅުވި އެވެ.
މިފަހަކަށް އައިސް މާލޭގައި މާރާމާރީތައް ގިނަވެ، ހަފްތާއެއްހާ ދުވަހުގެ ތެރޭގައި ދެ މީހެއްގެ ފުރާމަ ވަނީ ދުއްވާލައިފަ އެވެ. އެގޮތުން ޒުވާނެއްގެ ކަރަށް ވަޅިހަރައި ރޭ ވެސް މަރާލާފައި ވާއިރު މިދިޔަ ހަފްތާގެ ތެރޭގައި ކެފޭއެއްގެ ތެރެއަށް ގްރޫޕަކުން ވަދެ، ބަގްލަދޭޝް މީހެއްގެ މެޔަށް ވަޅި ހަރައި ވަނީ މަރާލައިފަ އެވެ.
މަރާމާރީތައް ގިނަވެ، މުޖުތަމައުގެ ސުލްހަ މަސަލަސްކަން ގެއްލޭ ހިސާބަށް ދިޔުމުން މީގެ ކުރިން ވެސް ސިފައިން މަގުތަކަށް ނިކުމެ އޮޕަރޭޝަންތައް ހިންގާފައިވެ އެވެ.