ވިހިވިއްސަށް ނުވަތަ 2020 ވަނަ އަހަރުގެ ނިޔަލަށް ނިއުރޭޑިއަންޓްގައި މަޑު ކުރަން ނިންމައި އަލީ ފާސިރު (ސެންޓޭ) ނިއުއާ އެކު އެއްބަސްވުމުގައި ސޮއި ކޮށްފި އެވެ.
ޗަމްޕާ ސެންޓާރަލް ހޮޓެލްގައި މިރޭ ބޭއްވި ރަސްމިއްޔާތުގައި ވާހަކަ ދައްކަމުން ސެންޓޭ ބުނީ، އިތުރު ތިން އަހަރަށް ނިއުގައި ސޮއި ކުރަން ނިންމީ، ނިއުގެ މިހާރުގެ މެނޭޖްމެންޓުން ކުޅުންތެރިންގެ ކަންކަމުގައި އަމަލު ކުރާ ހަރުދަނާ އުސޫލުގެ ސަބަބުން ކަމަށެވެ.
މިއަހަރު ކުރީ ކޮޅު ސެންޓޭ ނިއު އަށް ސޮއި ކުރީ އެއް އަހަރު ދުވަހުގެ މުއްދަތަށެވެ.
އޭނާ ބުނީ އާ ކޮންޓްރެކްޓާ އެކު އިތުރު ހިތްވަރެއް ލިބިގެން ދާނެ ކަމަށާއި ނިއު އަށް ކާމިޔާބު ހޯދައިދިނުމަށް އޭނާ އަށް ކުރެވެން ހުރި ހުރިހާ ކަމެއް ކުރާނެ ކަމަށެވެ.
ނިއުގެ ޗެއާމަން މުހައްމަދު ޒިޔާޒު ވިދާޅުވީ ތިން އަހަރަށް ސެންޓޭ ނިއު އަށް ސޮއި ކުރަން އެއްބަސްވުން އެއީ ނއިު އަށް ލިބުނު ވަރަށް ބޮޑު ކުރިއެރުމެއް ކަމަށެވެ.
އަދި ވިދާލުވީ ކުޅުންތެރިން ދިގު މައްދަތަކަށް ޓީމަށް ސޮއި ކުރުމަކީ ޓީމު ތަކަށް ލިބޭނެ ވަރަށް ބޮޑު ފަސޭހައަކަށް ވެގެންދާނެ ކަމަށެވެ.
އޭނާ ވިދާޅުވީ ކުރިއަށް އޮތްތަނުގައި ނިއުގެ ހިމެނޭ އެހެން ކީ ކުޅުންތެރިންވެސް ނިއުގެ ކޮންޓްރެކްޓް އިތުރު އަހަރުތަކަކަށް އާ ކުރާނެ ކަމަށެވެ.
އަދި އެހެން ޓީމު ތަކުގައި ތިބި ބައެއް ކުޅުންތެރިންވެސް ނިއު އަށް އައުމަށް ޝައުގުވެރިކަން ފާޅު ކޮށްފައިވާ ކަމަށް ޒިޔާޒު ވިދާޅުވި އެވެ.