އެސްޓީއޯ މާލޭ ލީގްގައި، މިއަދު ހަވީރު މާޒިޔާ އާއި ނިއުރޭޑިއަންޓް ކުޅޭ މެޗަކީ، ސިޒަންގެ އެންމެ ވަރުގަދަ މެޗެވެ. އެހެން ބުނުމުގެ ފުރުސަތު އޮތީ، މިހާތަނަށް މީސީޒަންގައި އެންމެ އިތުބާރާއެކު ކުޅެމުންދާ ދެ ޓީމަކީ މި ދެޓީމު ކަމަށް ވުމުން ނެވެ. ޑޮމެސްޓިކް ލީގްގައި ކުޅުނު ހުރިހާ މެޗަކުން މޮޅުވެފައި އޮތީވެސް މި ދެޓީމު އެކަންޏެވެ.
މާޒިޔާއަށް ބަލާއިރު، މިއަހަރު ހުރިހާ ގޮތަކުން ވެސް އެޓީމު ތަފާތެވެ. އޭއެފްސީ ކަޕްގެ ރަނަރަފު އިންޑިއާގެ ބެންގަލޫރު އެފްސީއާ ދެކޮޅަށް މާޒިޔާއިން ވަރުގަދަ ފައިޓެއް ދިން އިރު، އެޓީމު ބަލިވީ މެޗުގެ އެންމެ ފަހު ސިކުންތު ކޮޅުގެ ތެރޭގަ އެވެ. މާޒިޔާގެ ކޯޗް މެސަޑޯނިއާގެ މަރުޔަސް ސްކޮލަސްކީ ބުނީ ބެންގަލޫރު ކަހަލަ ޓީމަކާ ދެކޮޅަށް ކުޅުމަށްފަހު، ނިއުއާ ދެކޮޅަށް ކުޅެން ޖެހުމަކީ ޓީމަށް ލިބޭ ބޮޑު ހިތްވަރަކަށް ވެެގެންދާނެ ކަމަށެވެ.
ނަމަވެސް ސްކޮލަސްކީ ގަބޫލު ކުރާ ގޮތުގައި މިއަދުގެ މެޗުން ސީޒަންގެ ފޭވަރިޓަކީ ކޮބައިކަން ކަނޑައެޅިގެން ނުދާނެ ކަމަށެވެ.
"މި މެޗަކުން އެއްވެސް ކަމެއް ކަނޑައެޅިގެން ނުދާނެ، މާލޭ ލީގްގައި އަހަރެމެން ޖެހޭ 14 މެޗު ކުޅެން މިދިޔަ ތިން އަހަރުން ފެށިގެން މިއީ ސީޒަންގެ އެންމެ ވަރުގަދަ މެޗު،" ސްކޮލަސްކީ ބުންޏެވެ.
"ބެންގަލޫރުގެ މެޗުގެ ހިތްދަތިކަން ފިލައިގެން ހިނގައްޖެ، އަހަންނަށް ފެންނަނީ ކުޅުންތެރިން މާ ބޮޑު ހިތްވަރު ލިބިފައިވާ ތަން، އެހެންވެ ކުޅުންތެރިން ވަރަށް ރަނގަޅަށް ކުޅޭނެ އަހަރެމެންގެ ޑިފެންސުން ބެންގަލޫރަށް މާބޮޑު ފުރުސަތެއް ނުދޭ، ސުނިލް ޗެތުރީ ފުރަތަމަ ހަމަލާ އުފެއްދިއިރު އަހަރެމެން ވަނީ ދެތިން ހަމަލާ އުފައްދާފަ، މެޗު އެނަލައިސް ކުރުމަށް ފަހު އަހަރުމެންނަށް ފެނުނީ ވަރަށް ބޮޑުތަން ރަނގަޅު ވެފައިވާ ކަމަށް، އެހެންވެ އެއީ ވަރަށް ބޮޑު ހިތްވަރެއް އެކަހަލަ ޓީމަކާ ދެކޮޅަށް ރަނގަޅަށް ކުޅެވުމަކީ، އެހެން ހުރިހާ ޓީމަކާ ދެކޮޅަށް ވެސް ރަނގަޅަށް ކުޅެވޭނެ ސަބަބެއް" ސްކޮލަސްކީ ބުންނެވެ.
މާޒިޔާއާ ދެކޮޅަށް ކުޅޭއިރު ނިއުގެ ކޯޗް ޕޯޗްގަލްގެ ބެނާޑޯ ޓެވަރޭސް އެންމެ ބޮޑަށް ހަނދާން ކުރަން ބޭނުންވާ ކަމަކީ، ޑޮމެސްޓިކް ސީޒަންގައި މާޒިޔާގެ ކޮޅަށް ގޯލެއް ވަދެފައި ނުވާކަމެވެ. އެހެންވެ އޭނާ ހުރީ އޭނާގެ ފޯވަޑުން އެކަމަށް ވަރަށް ރަނގަޅަށް ތައްޔާރު ކޮށްފަ އެވެ.
ނިއުގެ އެންމެ އިތުބާރު ފޯވަޑަކީ އެޑްރިއަން ގެލާޑޯއެވެ. އެވެ. މިހާތަނަށް ކުޅުނު ހުރިހާ މެޗެއްގައިވެސް ލަނޑު ޖަހާފައި ފޯވަޑަކީ ވިސްނުން ތޫނު ފިނިޝިން ރަނގަޅު ސްޓްރައިކަރެކެވެ.
"އަހަރެން ބޭނުން އަހަރެންގެ ޓީމަކީ މޮޅު ޓީމެއްކަން އެ ޓީމަށް ދައްކަން، ހަގީގަތުގައި އެޓީމު (މާޒިޔާ) ގައި އެބައޮތް ވަރަށް ވަރަށް ރަނގަޅު ޑިފެންސެއް، އަދި ވަރަށް ރަނގަޅު ބިދޭސީ ކުޅުންތެރިން އެބަތިބި،" ޓެވަރޭސް ބުންޏެވެ.
މިހާތަނަށް ޑޮމެސްޓިކް މުބާރާތުގައި މާޒިޔާގެ ކޮޅަށް ގޯލެއް ވަދެފައެއް ނުވެ އެވެ. މާޒިޔާގެ ކޯޗް ސްކޮލަސްކީ ބުނީ އެ ރެކޯޑް ދެމެހެއްޓުމަށް މިއަދުގެ މެޗުގައިވެސް ސަމާލުކަން ދޭނެ ކަމަށެވެ. އެއަށް ނިއުގެ ކޯޗްގެ ޖަވާބެއްވެސް އެބައޮތެވެ.
"އަހަރެމެންގެ މެޗާ ހަމަޔަށް އައިރު ޑޮމެސްޓިކްގައި މާޒިޔާ ކޮޅަށް ގޯލެއް ވަދެފައި ނެތުމަކީ އަހަރެމެންނަށް އޮތް ބޮޑު މޯޓިވޭޝަނެއް، އަހަންނަށް އެނގޭ ގޯލެއް ނުވަދެ މެޗު ފުރިހަމަ ކުރުމަށް އެޓީމު ކިހާވަރަކަށް ބޭނުންވާނެ ކަން، އެހެންވެ އަހަރެމެން ބޭނުން އެޓީމުގެ ގޯލް ހުޅުވާ ފުރަތަމަ ޓީމަކީ އަހަރެމެން ކަމުގައިވާން، އަހަރެމެންގެ ފޯވަޑުންވެސް ތިބީ އެކަމަށް ތައްޔާރަށް،" ޓެވަރޭސް ބުންޏެވެ.