މި ސީޒަނަށް އެންމެ ވަރުގަދައަށް ތައްޔާރުވި، މާޒިޔާ އާއި ނިއުރޭޑިއަންޓްގެ ކުރިމަތިލުން 2-1 ނަތީޖާ އަކުން ކާމިޔާބުކޮށް މާޒިޔާ ކުރި ހޯދައިފި އެވެ.
މިއީ، މިއަހަރު ފުޓްބޯޅަ ސީޒަންގައި ފެނިގެން ދިޔަ އެންމެ ފޯރިގަދަ ކުރިމަތި ލުމެވެ. މެޗުގައި ގިނަ ހަމަލާ އުފެއްދީ މާޒިޔާއިން ނެވެ. ނަމަވެސް. މެޗުގެ ފުރތަމަ ލީޑް ނެގީ ނިއު އިން ނެވެ.
ގައުމީ ފުޓްބޯޅަ ދަނޑުގައި މިއަދު ކުޅުނު މެޗުގެ ފުރަތަމަ ހާފުގެ އެންމެ ފަހު ވަގުތު ނިއުގެ އަކްރަމް އަބްދުލް ގަނީ ކާމިޔާބު ކުރި ލަނޑަކީ، މި ސީޒަންގައި ދިވެހި ކުޅުންތެރިޔަކު މާޒިޔާ ކޮޅަށް ޖެހި ފުރަތަމަ ލަނޑެވެ. އަދި މި ސީޒަންގައި ދިވެހި ކުލަބަކުން މާޒިޔާ ކޮޅާށް ޖެހި ފުރަތަމަ ލަނޑުވެސް މެއެވެ.
އަނިޔާއާއި ސަސްޕެންޝަންގެ ސަބަބުން، މުހިންމު ދެކުޅުންތެރިން ކަމަށްވާ އަހްމަދު އިމާޒު (އާއްކޮ) އާއި މިލޯސް ކޮވެސެވިޗް ނުލައި ކުޅުނު މާޒިޔާ އަށް ދެ ވަނަ ހާފު ފެށިގެން ހަތް ވަނަ މިނެޓްގައި ނަތީޖާ ހަމަހަމަ ކޮށްދިނީ އެލެގްޒެންޑާ ރެކިސިޗް އެވެ. އޭނާ ލަނޑު ޖެހީ ކެޕްޓަން އަސަދުﷲ އަބްދުﷲ (އަސައްކޮ) ތަނަވަސް ކޮށްދިން ފުރުސަތަކުން ނެވެ.
ދެވަނަ ހާފުގައި ވެސް ގިނަ ހަމަލާ އުފެއްދީ މާޒިޔާއިން ނެވެ. ނަމަވެސް އެދެވޭ ގޮތަށް އެޓީމަށް ގޯލާ އަމާޒުކޮށް ފޮނުވާ ލެވުނީ ތިން ހަމަލާ އެވެ.
ދެވަނަ ހާފުގައި ނިއުގެ ޑިފެންޑަރު އަހްމަދު އަބްދުﷲ (ލިލީ) އަށް ހެދުނު މިސްޓޭކެއްގެ ފައިދާ ނަގައި، އަސައްކޮ ނިއުގެ ޕެނަލްޓީ އޭރިއާ ތެރެއިން ފޮނުވާލި ހަމަލާ އަމާޒުވީ ގޯލްގެ މަތީ ދަނޑިއަށެވެ.
މެޗުގެ 73 ވަނަ މިނެޓްގައި މާޒިޔާ އަށް ލީޑް ނަގައިދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ހަސަން ޝިފާޒު (ޑުންގާ) އެވެ. އޭނާ ލަނޑު ޖެހީ ނިއުގެ ހާފުގެ ތެރެއިން އަސައްކޮއަށް ލިބުނު ބޯޅަ ހިފައިގެން ނިއުގެ ޕެނަލްޓީ އޭރިއާގެ ކަނާ ދިމާލުން ހުޅަނގު ފަރާތުން ޕެނަލްޓީ އޭރިއާ ތެރެއަށް ވަދެ އަސައްކޮށް ދިން ބޯޅަ އިން ނެވެ. އޭރު ޑުންގާ ހުރީ ގޯލް އޭރިއާ ތެރޭގައި ހުހަށެވެ.
ބަދަލު ކުޅުންތެރިޔެއްގެ ގޮތުގައި އަރައި ޑުންގާ މެޗު ބަދަލު ކޮށްލުމުން، މާޒިޔާގެ ކޯޗް މަރުޔަން ސްކޮލަސްކީ ބުނީ އޭނާ މެޗަށް އެރުވީ ނަތީޖާ ބަދަލު ކުރުވަން ކަމަށެވެ.
ލަނޑަށްފަހު ނިއު އަށްވެސް ވަނީ ނަތީޖާ ހަމަހަމަ ކުރުމަށްޓަކައި، ދެ ފުރުސަތެއް ލިބިގެން ގޮސްފަ އެވެ. މެޗުގެ 78 ވަނަ މިނެޓްގައި އަލީ ފާސިރު ސެންޓޭ ވަނީ މާޒިޔާގެ ޑިފެންޑަރުން އަތުން ބޯޅަ ހޯދައި މާޒިޔާގެ ގޯލް ކުރިމައްޗަށް ހުސް ފުރުސަތެއް ހުރަސް ކޮށްދީފަ އެވެ. ނަމަވެސް އެބޯޅަ ޖަހާނެ ކުޅުންތެރިޔަކު ނެތުމުން ބޯޅަ ދިޔައީ ގޯލް ހުރަސް ކޮށް ބޭރަށެވެ.
އޭގެ ފަހުން 84 ވަނަ މިނެޓްގައި، ސެންޓޭ އަށް ވަނީ ރަނުގެ ފުރުސަތެއް ލިބިފަ އެވެ. މާޒިޔާގެ ޕެނަލްޓީ އޭރިއާ ތެރެއިން، އެޓީމުގެ ކީޕަރު ޕަވެލް މެޓިއަޝް ދިފާއު ކުރުމުން ރީބައުންސަށް ނިކުތް ބޯޅަ ސެންޓޭ ފޮނުވާލުމުން، ދިޔައީ ގޯލް ދަނޑިމަތިން ބޭރަށެވެ.
ނިއުގެ ކޯޗް ބެނާޑޯ ޓެވަރޭސް ބުނީ ދެ ވަނަ ހާފުގައި ނިއުގެ ކުޅުންތެރިންގެ ފަރާތުން ފެނުނު ޕާފޯމަންސާމެދު އޭނާ ވަރަށް ބޮޑަށް ހިތްހަމަ ޖެހޭ ކަމަށާއި މެޗުން ބަލިވުމަކީ އަދި ކަންބޮޑުވާން ޖެހޭ ކަމެއް ނޫން ކަމަށެވެ.
ޓެވަރޭސް ވަނީ ރެފްރީގެ ނިންމުންތަކާ މެދު ހިތްހަމަ ނުޖެހޭކަން ފާޅު ކޮށްފަ އެވެ. އޭނާ ބުނީ ރެފްރީ އަޅާނުލާ ދިޔަ ބައެއް ކަންކަމަކީ، އޭއެފްސީ މުބާރާތް ތަކުގައި ރެފްރީން ފާހަގަ ކުރާނެ ކަންކަން ކަމަށާއި، ލޯކަލް ރެފްރީން އެކަންކަމާ މެދު އަލާ ނުލާނަމަ އިންޓަނޭޝަނަލް މުބާރާތް ތަކުގައި ކުޅުންތެރިންނަށް އޭގެ ގެއްލުން ވާނެ ކަމަށެވެ.
މާޒިޔާގެ އަސްއަދު އަލީ (އަޑޭ) އަށް ރީނދޫ ކާޑް ދައްކާފައި ވަނިކޮށް، އޭގެ ފަހުން ތިން ފައުލު ކުރި ނަމަވެސް ރެފްރީ އަޅާ ނުލުމުން ޓެވަރޭސް ހުރީ ކަންބޮޑުވެފަ އެވެ. ނަމަވެސް ފަހުން މާޒިޔާއިން ވަނީ އަޑޭ ބަދަލު ކޮށްފަ އެވެ. ޓެވަރޭސް ބުނީ އަޑޭއަށް ރީނދޫ ކާޑެއް ދައްކާފައި ވަނިކޮށް ފަހުން ދެވަނަ ރީނދޫ ކާޑެއް ދައްކަން ޖެހޭ ހާލަތެއްވެސް އައި ކަމަށެވެ.
ދެ ވަނަ ރީނދޫ ކާޑާއެކު އަޑޭއަށް ރަތް ކާޑު ދައްކައި މާޒިޔާގެ 10 ކުޅުންތެރިންނަށް މަދުވިނަމަ ނިއު އަށް ނަތީޖާ ބަދަލު ކުރެވޭނެތޯ ސުވާލު ކުރުމުން ޓެވަރޭސް ބުނީ އެކަމަށް ފުރުސަތު ލިބުނިސް ކަމަށާއި އޭރުން އެޓީމުގެ މެދު ތެރެއިން އިތުރު ޖާގަ ނިއުގެ ކުޅުންތެރިންނަށް ލިބޭނެ ކަމަށެވެ.