ސައިކަލުން ޑިއުޓީ ބޮޑު ނުކުރުމަށާއި ގާމެންޓްސުން ޑިއުޓީ ކަޑާލުމަށް ސަރުކާރުން މިއަދު މަޖިލީހަށް އިސްލާހު ހުށަހަޅައިފި އެވެ.
އެންމެ ފަހުން ގާނޫނަށް ގެނައި ބަދަލާ އެކު މާދަމާއިން ފެށިގެން ސައިކަލްގެ ޑިއުޓީ 150 ޕަސެންޓަށް ބޮޑުވާ އިރު، ގާމެންޓްސުން 25 ޕަސެންޓްގެ ޑިއުޓީއެއް ނަގާނެ އެވެ.
ސަރުކާރުގެ ފަރާތުން ގެމަނަފުށީ ދާއިރާގެ މެންބަރު ޖަމީލް އުސްމާން ވަނީ މިހާރު އޮތް ގޮތަށް ޑިއުޓީ ބޮޑުނުކުރުމުގެ އިސްލާހު މަޖިލީހަށް ވައްދައިފަ އެވެ. ނަމަވެސް މިއަދުވެސް މަޖިލީހުގެ ޖަލްސާއެއް ނުބާއްވާތީ އެ އިސްލާހާ މެދު އަދި ބަހުސްކޮށް ވޯޓަށް އެހޭނެ ދުވަހެއް ނޭނގެ އެވެ.
ޑިއުޓީ ބޮޑު ކުރުމުގެ އިސްލާހު ސަރުކާރުން ގެނައީ ބަޖެޓަށް އާމްދަނީ އިތުރު ކުރުމަށެވެ. ނަމަވެސް އެ އިސްލާހު އަނބުރާ ގެނައުމަށް ސަރުކާރުން ނިންމީ، ޑިއުޓީ ބޮޑުކޮށްފި ނަމަ އާންމުންނަށް އެކަމުގެ ސަބަބުް ދަތިތަކެއް ކުރިމަތިވެދާނެތީ އެވެ.