ޓީސީ ސްޕޯޓްސް ކުލަބުގެ މައްޗަށް 2-1 ގެ ނަތީޖާއަކުން ކާމިޔާބު ހޯދައި، މާލޭ ލީގްގެ ތާވަލުގެ އެއް ވަނަ އަށް ނިއުރޭޑިއަންޓް އަލުން ޖެހި ލައިފި އެވެ.
މެޗުގައި ފުރަތަމަ ލީޑް ނެގީވެސް ނިއުއިން ނެވެ. މެޗުގެ 17 ވަނަ މިނެޓްގައި ނިއު އަށް ލީޑް ނަގައިދިނީ ސްޕެއިންގެ އެޑްރިއަން ގަލާޑޯ އެވެ. ނަމަވެސް ފުރަތަމަ ހާފުގެ 26 ވަނަ މިނެޓްގައި، ގަލާޑޯ އަށް ލިބުނު އަނިޔާއެއްގެ ސަބަބުން އޭނާ ޖެހުނީ ބަދަލު ކުރާށެވެ، އޭނާގެ ބަދަލުގައި ކުޅެން އެރީ މިދުހަތު ފަހްމީ އެވެ.
ދެވަނަ ހާފު ފެށިގެން 13 ވަނަ މިނެޓްގައި ނިއު އަށް ލިޑް ފުޅާ ކޮށްދިނީ ވެސް މިދުހަތު ކާމިޔާބު ކުރި ލަނޑުން ނެވެ. ނަމަވެސް ދެވަނަ ހާފުގައި ނިއުއަށް ވުރެ ރަނގަޅަށް ކުޅުނީ ޓީސީއިން ނެވެ. ނަތީޖާ ދިފާއު ކުރުމަށް ނިއުގެ މުޅި ޓީމު ކުޅުނީ ފަހަތައް ފައިބައިގެން ނެވެ.
ޓީސީގެ ލަނޑު 68 ވަނަ މިނެޓްގައި ކާމިޔާބު ކުރީ އިބްރާހިމް ވަހީދު ހަސަން (ހަބޭސް އިއްބެ) އެވެ. ލަނޑަށްފަހު ޓީސީގެ ކުޅުންތެރިން އިތުރަށް ހިތްވަރު ލައިގެން ކުޅުނު ނަމަވެސް، އެޓީމަށް ކުރިމަތިވީ އެހެން މައްސަލަ އެކެވެ. ތިން ބަދަލު ހަމަވެފައި ވަނިކޮށް، އައްޒާމް އަބްދުﷲ އަށް އަނިޔާ ވުމުން، ޓީސީ ކުޅުނީ އެއް ކުޅުންތެރިޔަކު މަދު ކޮށެވެ.
އެވަގުތުގައި ނިއު އިން ވަނީ ދެ ހަމަލާ އެއް އުފައްދާފަ އެވެ. ނަމަވެސް އެއިން ކޮންމެ ފަހަރަކުވެސް ބޯޅަ އަށް ހުރަސް އެޅީ ޓީސީގެ ކީޕަރު ނޭޕާލްގެ ލިމްބޫ ކިރަން ކުމާރެވެ.
ލީގްގައި މިއަދު ހަވީރު ކުޅޭ މެޗުގައި ބައްދަލު ކުރާނީ މާޒިޔާ އާއި ވިކްޓާރީ އެވެ.