ރާއްޖޭގެ އޮލިމްޕިކް ކޮމިޓީގެ ރައީސް ކަމަށް ކުރިމަތި ލައްވާނެ ދެ ވަނަ ކެނޑިޑޭޓަކު ނުވުމުން، ރައީސް ކަމަށް ކުރިމަތި ލެއްވި މިހާރުގެ ވެސް ރައީސް މުހައްމަދު ޝަވީދު އަލުން އެ މަގާމަށް އިންތިހާބު ވެއްޖެ އެވެ.
ރައްޔިތުންގެ މަޖިލީހުގެ ދަނގެތީ ދާއިރާގެ މެންބަރު އިލްހާމް އަހްމަދު ވަނީ އޮލިމްޕިކް ކޮމީޓީގެ ރައީސް ކަމަށް ވާދަ ކުރައްވާނެ ކަމަށް ކުރިން އިއުލާން ކޮށްފަ އެވެ. ނަމަވެސް އަންނަ މަހުގެ ފަސް ވަނަ ދުވަހު ބޭއްވުމަށް ހަމަޖެހިފައިވާ އިންތިހާބުގައި ވާދަ ކުރުމުގެ މުއްދަތު ހަމަވިއިރު، ރައީސްކަމަށް ނަން ހުށަހެޅީ ޝަވީދު އެކަންޏެވެ. އެފްއޭއެމްގެ ރައީސް ކަމުގައި އިލްހާމް ހުންނެވި އިރު، ޝަވީދަކީ އޭނާގެ އެޑްވައިޒަރެވެ.
އިންތިހާބަށް ޝަވީދުގެ ނަން ނޮމިނޭޓް ކުރީވެސް އެފްއޭއެމުން ނެވެ. ޝަވީދު ވަނީ ފީފާއިން އެފްއޭއެމް އަށް ކަނޑައެޅި ނޯމަލައިޒޭޝަން ކޮމިޓީގެ ޗެއާމަންކަން ވެސް ކުރައްވާފަ އެވެ. އޭނާ ޗެއާމަން ކަމުގެ ދަށުން ޖެނަރަލް ސެކެޓްރީކަން ކުރެއްވި ބައްސާމް އަދީލް ޖަލީލަކީ އެފްއޭއެމްގެ މިހާރުގެ ރައީސް އެވެ.
މީގެ އިތުރުން ޝަވީދަކީ އޭޝިއާގެ ފުޓްބޯޅަ އިދާރާ އޭއެފްސީގެ އެކްސްކޯގައި ހިމެނިވަޑައިގަންނަވާ މެންބަރުވެސް މެއެވެ.
އެމްއޯސީގެ ނައިބު ރައީސް ކަމަށްވެސް މިފަހަރު ނަން ހުށަހެއްޅުވީ އެންމެ ފަރާތަކުން ނެވެ. ކުރިއަށް އޮތް ދައުރުގެ ނައިބު ރައީސް އަކީ ޓީޓީ އެސޯސިއޭޝަންގެ ކުރީގެ ރައީސް އަހްމަދު ލަތީފު (ޓީޓީ ލަތީފް) އެވެ. އޭނާ އަކީ ހިގަމުންދާ ދައުރުގައި ވެސް އޮލިމްޕިކް ކޮމިޓީގެ އެކްސްކޯ މެންބަރެކެވެ.
ޖެނަރަލް ސެކެޓްރީ ކަމަށް މިހާރުގެ ޖެނަރަލް ސެކެޓްރީ އަހްމަދު މަރުޒޫގް އެކަނި ކުރިމަތި ލެއްވުމުން އޭނާ ވެސް ވަނީ މަގާމަށް އިންތިހާބު ވެފަ އެވެ. މަރުޒޫގްގެ ނަން ނޮމިނޭޓް ކޮށްފައި ވަނީ ސާފިން އެސޯސިއޭޝަންގެ ފަރާތުން ނެވެ. މިއީ އޭނާ ޖެނަރަލް ސެކެޓްރީކަމަށް ހޮވުނު ތިން ވަނަ ފަހަރެވެ.
އަދި ހަޒާންދާރު ކަމަށްވެސް، މިދިޔަ ދެ ދައުރުގެ ވެސް ހަޒާންދާރު ހުސައިން ރަޝީދު ވެސް ވަނީ، ކުރިމަތި ލައްވާނެ އެހެން ބޭފުޅާކު ނުވުމުން މަގާމަށް އިންތިހާބުވެފަ އެވެ. ހުސައިންގެ ނަން ހުށަހަޅާފައި ވަނީ ޗެސް ފެޑްރޭޝަންގެ ފަރާތުން ނެވެ.
އޮލިމްޕިކް ޓީމް ކުޅިވަރުތަކުން، އޮލިމްޕިކް ކޮމިޓީގައި ތަމްސީލު ކުރައްވާނީ، ބާސްކެޓްބޯލް އެސޯސިއޭޝަނާއި ހޭންޑްބޯލް މޯލްޑިވްސް އެވެ. އިންޑަވިޖުއަލް ކުޅިވަރުތަކުގެ ތިން ޖާގަ އަށް ކުރިމަތިލީ ސްވިމިން އާއި ބެޑްމިންޓަން އަދި ޓެނިސް އެސޯސިއޭޝަނެވެ. އޮލިމްޕިކް ކެޓަގަރީގައި ނުހިމެނޭ ކުޅިވަރުތަކުގެ ދެ ޖާގައަށް ކުރިމަތި ލާފައި ވަނީ ބިލިއަޑް އެސޯސިއޭޝަނާއި ބޮޑީ ބިޔުލްޑް ފެޑްރޭޝަން އެވެ.
އަންނަ މަހު ފަހެއްގައި ބާއްވާ އިންތިހާބުގައި ވޯޓް ލައިގެން ހޮވަން ޖެހިފައިވަނީ އޮލިމްޕިކް ކޮމިޓީގައި ހިމެނޭ އަންހެން ދެ މެންބަރުގެ މަގާމެވެ. އެ ދެ މަގާމަށް ކުރިމަތިލާފައި ވަނީ ނެޓްބޯޅަ އެސޯސިއޭޝަނުން އާމިނަތު އަލީ އާއި ވީއޭއެމްއިން ޔާސްމީން އަބްދުﷲ އާއި ޝޫޓިން އެސޯސިއޭޝަނުން މުނާ އަހްމަދު އައްބާސް އެވެ.
އިންތިހާބު ވޯޓް ލުމުގެ ހައްގު ލިބިފައި ވަނީ 16 އެސޯސިއޭޝަނަކަށެވެ. ވޯޓް ލަުމަށް ރަޖިސްޓްރީ ކުރުމަށް ހުށަހަޅާން ޖެހޭ އެންމެ ފަހު މުއްދަތަކީ، އަންނަ މަހުގެ ތިން ވަނަ ދުވަހެވެ.