އެސްޓީއޯ މާލޭ ލީގުގައި މިއަދު ހަވީރު ވިކްޓަރީ ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން ކުރިމަތިލާއިރު، ޓީމެއްގެ ގޮތުގައި މި ވަގުތު އެންމެ ވަރުގަދަ ޓީމެއްގެ ގޮތު އޮތީ މާޒިޔާ ކަމަށް ވިކްޓަރީގެ ކޯޗު އަލީ ސުޒޭން ބުނެފި އެވެ.
"ޓީމެއްގެ ގޮތުގައި މާޒިޔާ ތަފާތު ވަރުގަދަކޮށް ފެންނަނީ،" މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ސުޒޭން ބުންޏެވެ. "އޭއެފްސީ ކަޕްގައި މަޒިޔާގެ ޕާފޯމަންސަށް ބަލާއިރު ވަރަށް އޯގަނައިޒްކޮށް ފެންނަނީ. އަނެއްކާ [މާލޭ ލީގުގައި] މިހާތަނަށް މާޒިޔާ އަދި ބަލިނުވޭ. މިއީ ވިކްޓަރީން ވިސްނަންޖެހޭނެ ކަންތައްތައް."
އޭއެފްސީ ކަޕްގައި މާޒިޔާ އެންމެ ފަހުން ކުޅުނު މެޗުގައި އިންޑިއާގެ މޯހަން ބަގާން އަތުން ރަށުން ބޭރުގައި މޮޅުވުމަކީ އެ ޓީމަށް ލިބޭނެ ވަރަށް ބޮޑު ހިތްވަރެއް ކަމަށް ވެސް ސުޒޭން ބުންޏެވެ.
"މާޒިޔާ އެންމެ ފަހުން ކުޅުނު މެޗުގައި މޮޅުވީމަ އެ ޓީމުގެ މޯޓިވޭޝަން ވަރަށް ބޮޑަށް ރަނގަޅުވާނެ. މާޒިޔާ ބަލިކުރީ އާދައިގެ ޓީމެއް ނޫން. އިންޑިއާ ޓީމެއް އަތުން ގިނަ ޒަމާންތަކަކަށް ފަހު ރާއްޖޭގެ ޓީމެއް މި މޮޅުވީ. މިއީ އާދައިގެ ޓީމެއް އަތުން މޮޅުވުމާއި ނުވަތަ ބަންގްލަދޭޝްގައި އެ ގައުމުގެ އަބްހާނީ އަތުން މޮޅުވުމާ ވަރަށް ތަފާތު ކަމެއް. މިއީ ވިކްޓަރީން ވިސްނަންޖެހޭނެ ކަމެއް،" ސުޒޭން ބުންޏެވެ.
މިއީ މިދިޔަ ސީޒަނަށް ފަހު މާޒިޔާގެ ކޯޗުކަމުން ސުޒޭން އިސްތިއުފާ ދިން ފަހުން އެ ޓީމާ ދެކޮޅަށް ސުޒޭން ނުކުންނަ ފުރަތަމަ މެޗެވެ. މާޒިޔާގެ ކޯޗުކަމާ 2014 ވަނަ އަހަރު ހަވާލުވި ސުޒޭނަކީ މާޒިޔާގެ 20 އަހަރުގެ ތާރީހުގައި އެ ކްލަބުގެ އެންމެ ކާމިޔާބު ކޯޗެވެ. ސުޒޭންގެ އިރުޝާދުގެ ދަށުން މާޒިޔާ ވަނީ މިދިޔަ ސީޒަންގައި އުރީދޫ ދިވެހި ޕްރިމިއާ ލީގުގެ ޗެމްޕިއަންކަން ހޯދައިފަ އެވެ. އަދި 2014 ވަނަ އަހަރުގެ އެފްއޭ ކަޕާއި 2015 ވަނަ އަހަރުގެ ޕްރެޒިޑެންޓްސް ކަޕް އެ ކްލަބުން ހޯދި އެވެ.
ސުޒޭން ބުނީ މާޒިޔާއާ ދެކޮޅަށް ކުޅުނަސް ވަކި ހާއްސަ ގޮތެއް ނޯންނާނެ ކަމަށާއި މެޗުން އޭނާ ބޭނުންވަނީ މޮޅެއް ކަމަށެވެ.
"އަޅުގަނޑަކީ ވަރަށް އަމިއްލަ އެދުން ބޮޑު މީހެއް. އަޅުގަނޑު މަސައްކަތް ކުރާނީ މޮޅުވާން،" ސުޒޭން ބުންޏެވެ.
މާޒިޔާގެ ކޯޗު މަރުޖާން ސެކުލޮވްސްކީ ބުނީ ވިކްޓަރީ އަކީ ރަނގަޅު ޓީމެއް ކަމަށެވެ. އަދި މާޒިޔާ އަށް މެޗުން މޮޅުވުމަކީ ފަސޭހަ ކަމަކަށް ނުވާނެ ކަމަށެވެ.
"ވިކްޓަރީގައި އެބަތިބި ރަނގަޅު ކުޅުންތެރިން. އަދި ރަނގަޅު ކޯޗެއް ވިކްޓަރީގައި ހުރީ. ތާވަލްގައި އެ ޓީމު ކޮންމެ މަގާމެއްގައި އޮތަސް، އެ ޓީމުގެ އަސްލު ފެންވަރެއް ތާވަލަކުން ނުފެނޭ. އަހަރެމެންނަށް މި މެޗު ފަސޭހައެއް ނުވާނެ،" މަރުޖާން ބުންޏެވެ.
މި މެޗަށް ނުކުންނައިރު މާޒިޔާ އޮތީ ނުވަ ޕޮއިންޓާއެކު ތާވަލްގެ ތިން ވަނައިގަ އެވެ. މިއަދުގެ މެޗުން މާޒިޔާ މޮޅުވެއްޖެ ނަމަ، ތާވަލްގެ އެއްވަނައިގައި އޮތް ނިއު ރޭޑިއަންޓާ ޕޮއިންޓްގެ ގޮތުން އެއްވަރުވާނެ އެވެ. ވިކްޓަރީ އޮތީ ދެ ޕޮއިންޓާއެކު ތާވަލްގެ ހަތް ވަނައިގަ އެވެ.
