ކޯޗެއްގެ ގޮތުގައި މިހާތަނަށް، އޭނާ އަށް ލިބޭނެ އެންމެ ބޮޑު ކާމިޔާބީއަކަށް ވާނީ މިސީޒަންގެ ޕްރިމިއާ ލީގް ޗެލްސީއަށް ހޯދައިދެވުން ކަމަށް، އެޓީމުގެ ކޯޗް އިޓަލީގެ އެންޓޯނިއޯ ކޮންޓޭ ބުނެފި އެވެ.
މެންޗެސްޓާގެ ދެ ކުލަބު ކަމަށްވާ ޔުނައިިޓަޑާއި ސިޓީ، ބުރާސްފަތި ދުވަހު ވާދަ ކުރާނީ، އަންނަ ސީޒަންގެ ޗެމްޕިއަންސް ލީގް ޖާގަ ކަށަވަރު ކުރުމަށެވެ. އެޔާއެކު ޗެލްސީ މިރޭ ސައުތު ހެމްޓަންއާ ދެކޮޅަށް ނިކުންނާނީ، އެޓީމު އަތުން މޮޅުވެ ތާވަލުގެ އެއް ވަނއިގައި ހަތް ޕޮއިންޓްގެ ލީޑެއް ނެގުމަށެވެ. ހަތް ޕޮއިންޓްގެ ލީޑެއް، ޗެލްސީ ނަގައިފިނަމަ، ދެ ވަނައިގައި އޮތް ޓޮޓެންހަމްއަށް އެކަމުން ނަފުސާނީ ގޮތުން އުނދަގޫ ވާނެ އެވެ. ޗެލްސީ ވަނީ، 26 އަހަަރު ފަހުން، އެފްއޭކަޕް ފައިނަލަށް ދާން ޓޮޓެންހަމް ކުރި އުންމީދު ވެސް ފެނަށް ދުވާލަފަ އެވެ.
"ހަމަ ޔަގީން [މިފަހަރުގެ ލީގް އަހަރެމެންނަށް ލިބިއްޖެނަމަ] އެކަން އެވެގެންދާނީ އަހަރެންގެ ކޯޗުކަމުގެ ހަޔާތުގައި މިހާތަނަށް ލިބޭނެ އެންމެ ބޮޑު ކާމިޔާބީ އަށް،" ކޯޗެއްގެ ގޮތުގައި އިޓަލީގެ ޔުވެންޓަސްއާއެކު ތިން ފަހަރަށް، އިޓަލީގެ ލީގް ކާމިޔާބު ކުރި ކޮންޓޭ ބުންޏެވެ. "މިހާރު، އިނގިރޭސި ލީގް ހޯދުމަކީ، ކޯޗަކަށް ލިބޭނެ އެންމެ ބޮޑު ކާމިޔާބު ކުޅުންތެރިން އަދި ކުލަބަށް ވެސް ލިބޭނެ އެންމެ ބޮޑު ކާމިޔާބު،"
އޭނާ ބުނީ ޕްރިމިއާ ލީގު ހޯދުމަކީ އުނދަގޫ ކަމެއް ކަމަށާއި އެ ލީގް ހޯދިއްޖެނަމަ އެ މަސައްކަތާ މެދު ފަހްރުވެރިވާން ޖެހޭނެ ކަމަށެވެ. ޗެލްސީއަށް މިސީޒަނަކީ ރަނގަޅު ސީޒަނެއް ކަމަށާއި ނަމަވެސް ކާމިޔާބު ސީޒަނަކަށް ހެދުމަކީ އުނދަގޫ، ބުރަ މަސައްކަތެއް ކަމަށް ކޮންޓޭ ބުންޏެވެ. އެންމެ ކާމިޔާބު ސީޒަނަކަށް ހެދެން އޮތީ ލީގް ހޯދައިގެންކަން ވެސް ކޮންޓޭ ފާހަގަ ކުރި އެވެ.
ޗެލްސީގެ އޯނަރު ރަޝިޔާގެ ބިލިއަނަރު ރޯމަން އަބްރަހިމޮވިޮޗްގެ ދަށުން، މިހާތަނަށް ޗެލްސީއަށް ކުރިމަތިވި އެންމެ ނާކާމިޔާބު ސީޒަނަކީ، މިދިޔަ ސީޒަނެވެ. ލީގްގެ 10 ވަނައިގައި ނިންމާލި ޓީމު، ކޮޅަށް ނެގުމަށް ކޮންޓޭ ގެނައީ، ލެސްޓާ ސިޓީގެ އެންގޯލާ ކަންޓެ އާއި ޕީއެސްޖީއަށް ކުޅެމުން ދިޔަ ޗެލްސީގެ ކުރީގެ ޑިފެންޑަރު ޑޭވިޑް ލުއިޒް އާއި މާކޯސް އެލަންސޯ އެވެ.
ކަންޓޭއާ މެދު ކޮންޓޭ ސިފަ ކުރީ، ޓީމުގެ ޑްރެސިން ރޫމުގެ "ހިމޭން ލީޑަރު" ގެ ގޮތުގަ އެވެ.
މިދިޔަ އަހަރު ޗެލްސީއާ އެކު ނާކާމިޔާބު ކުރިމަތިވި ކޯޗް ހޯސޭ މޮރީނިއޯ މިއަހަރު ހަވާލުވީ މެންޗެސްޓާ ޔުނައީޓަޑާ އެވެ. އޭނާ ވަނީ ޔުނައިޓަޑްގައި 150 މިލިއަން ޕައުންޑް ހޭދަ ކޮށްފަ އެވެ. ޕެޕް ގާޑިއޯލާއާއެކު މެންޗެސްޓާ ސިޓީވެސް ވަނީ 165 މިލިއަން ޕައުންޑް ހޭދަކޯށްފަ އެވެ.
ކޮންޓޭ ބުނީ، ލީގް ހޯދޭނީ ގިނަ ފައިސާ ހޭދަކޮށްގެން ނޫން ކަން މިފަހަރު އެނގިގެންދާނެ ކަމަށެވެ.
"އެހެން ނަމަ މިސީޒަންގައި ލީގް ހޯދާނެ ކަމުގެ ލިސްޓްގައި ހިމެނޭނީ ޗެލްސީ އާއި ޓޮޓެންހަމް އާއި ލިވަޕޫލް އަދި އާސެނަލްއެއް ނޫން، އަހަރެން މިބުނި އެއްޗެއް ކަލޭމެންނަށް އެނގެނޭ،" ގާޑިއޯލާ އާއި މޮރީނިއޯ އަށް ނިސްބަތްކޮށް ކޮންޓޭ ބުންޏެވެ.