ބްލޮގަރު ޔާމީން ރަޝީދު މަރާލި މައްސަލަ ވީހާ އަވަހަކަށް ތަހުގީގުކުރަން އދ. އިން ގޮވާލައިފި އެވެ. އދ. ގެ އިންސާނީ ހައްގުތަކާބެހޭ ހައިކޮމިޝަނަރު ޒައިދު ރާއިދު ހުސައިން އިއްޔެ ވިދާޅުވީ އެ މައްސަަލަ ތަހުގީގު ކުރަންވާނީ ބައިނަލް އަގުވާމީ މިންގަނޑުތަކާ އެއްގޮތަށް ކަމަށެވެ.
ރާއިދު ހުސައިންގެ ތަރުޖަމާނު ރަވީނާ ޝަމްދާ ސަނީ ވިދާޅުވި ކަމަށް އަލްޖަޒީރާއިން ބުނީ ޔާމީން މަރައިލި ހާދިސާ ހިނގާފައި މިވަނީ ރާއްޖޭގެ ސިޔާސީ އިދިކޮޅު ފަރާތްތައް ހައްޔަރުކޮށް ދައުވާ ކުރުން އިތުރުވެފައިވާ ދުވަސްވަރެއްގައިކަން ފާހަގަކުރާ ކަމަށެވެ.
ޔާމީން މަރާލާފައިވަނީ ގައިގެ 14 ތަނަކަށް ވަޅި ހަރައިގެންނެވެ. ޔާމީންގެ ގައިގެ އެކި ތަންތަނަށް ތޫނު އެއްޗަކުން ހަމަލާދީ ޒަހަމްކޮށްލާފައި އޮއްވާ ފެނުނީ، އޭނާ ދިރިއުޅޭ ގޭގެ ސިޑި ގޮޅި ކައިރިން މިދިއަ ހޮނިހިރު ދުވަހުގެ ރޭ ދަންވަރު 2:59 އެހާކަން ހާއިރު އެވެ. އޭނާ އައިޖީއެމްއެޗަށް ގެންގޮސް ފަރުވާދެމުން ދަނިކޮށް މާގިނައިރުތަކެއް ނުވެ ވަނީ މަރުވެފަ އެވެ.
އެހާދިސާ ތަހުގީގުކުރުމުގައި ބައިނަލް އަގުވާމީ ފަރާތްތައް ބައިވެރިކުރަން އޭނާގެ އާއިލާއިން ވެސް ވަނީ އެދިފަ އެވެ.
ޔާމީންގެ ބައްޕަ ހުސައިން ރަޝީދާއި މަންމަ މަރިޔަމް ޝަފީގާ، ނޫސްބަޔާނެއް މެދުވެރިކޮށް ބުނީ އެފަދަ ފަރާތެއް ތަހުގީގުގައި ބައިވެރި ކޮށްދިނުމަށް ފުލުހުންނާއި ރައީސުލްޖުމްހޫރިއްޔާގެ އަރިހުން އެދޭ ކަމަށާއި ޔާމީންގެ ގާތިލުން އިންސާފުގެ ކުރިމައްޗަށް ގެންދަން ދައުލަތުގެ އެންމެހައި ވަސީލަތްތައް ބޭނުން ކުރައްވާނެކަމުގެ ޔަގީންކަން ރައީސުލްޖުމްހޫރިއްޔާ އަބްދުﷲ ޔާމީން ދެއްވާފައިވާތީ އެކަމަށް މަރުހަބާކިޔާ ކަމަށެވެ.
އެ ބަޔާނުގައި ބުނަނީ ޔާމީނަކީ ނާއިންސާފާއި އަނިޔާ އާއި ފިއްތުންތަކާ ދެކޮޅަށް ތޫނުފިލި ކަމާއެކު ތެދުވި އޯގާތެރި ހިތްވަރުހުރި ޒުވާނެއް ކަމަށާއި އަނިޔާވެރި، ރަހުމްކުޑަ ގަތުލު އެންމެ ހަރުކަށި އިބާރާތުން ކުށްވެރިކުރާ ކަމަށެވެ.
"... ޔާމިންގެ ޤަތުލަށް 48 ގަޑިއިރު ހަމަވާން ގާތްވާއިރު، މައްސަލައިގައި ތުހުމަތުކުރެވޭ އެއްވެސް ފަރާތެއް އަދި ފުލުހުންގެ ބެލުމުގެ ދަށަށް ގެންދެވިފައި ނުވާއިރު، މި މައްސަލައިގައި އެކަށީގެންވާ އަވަސް މިނެއްގައި ކަމާބެހޭ ފަރާތްތަކުން ހަރަކާތްތެރިވާނެ ކަމުގައި އުއްމީދު ކުރަަމެވެ." ބަޔާނުގައި ވެއެވެ. "އަޅުގަނޑުމެންގެ ދަރިފުޅު ދިރިދުނިޔޭގައި ހުރިހިނދު، އޭނާއަށް ލިބެމުން އައި އިންޒާރުތައް ފުރިހަމަ ގޮތުގައި ތަހުގީގު ކުރެވިފައިނުވާކަން ފާހަގަ ކުރަމެވެ. އޮންލައިންކޮށް އަދި އޮފްލައިންކޮށް ޔާމިނަށް އިންޒާރެއް ލިބޭ ކޮންމެ ފަހަރަކު އެކަން އޭނާ ފުލުހުންނަށް ދިޔައީ އަންގަމުންނެވެ. 2016 ޑިސެމްބަރު 22 ވަނަ ދުވަހު މިދެންނެވި ބާވަތުގެ މައްސަލައެއް ރަސްމީގޮތުން ފުލުހުންނަށް އޭނާ ހުށަހެޅި އެވެ. އަޅުގަނޑުގެ ދަރިފުޅަށް މިބާވަތުގެ އިންޒާރު ދެމުން ދިޔައީ ނުހަނު ފާޅުކަން ބޮޑު ގޮތެއްގަަ އެވެ. ބައެއްފަހަރު އަމިއްލަ ނަމުގައިވެސް މެއެވެ."