މާޒިޔާ އަތުން 1-0 ގެ ނަތީޖާ އަކުން ބަލިވެ ގަދަ ހަތަރެއްގެ ތެރެއަށް ވަނުމުގެ އުންމީދު ވިކްޓަރީއަށް ފަނޑުވެއްޖެ އެވެ.
މެޗަށް ފަހު ވާހަކަ ދައްކަމުން ވިކްޓަރީގެ ކޯޗް އަލީ ސުޒޭން ބުނީ، ގަދަ ހަތަރެއްގެ ތެރެއަށް ވަނުމަށް ކުރަންޖެހޭ މަސައްކަތް އިތުރު ވުމުން، ވިކްޓަރީގެ ކުޅުންތެރިން ކުޅުނީ ޕްރެޝަރުގައި ކަމަށާއި މެޗުން ބަލިވުމުން ގަދަ ހަތަރެއްގެ ފުރުސަތު ބަންދުވުމާ ގާތަށް ހިނގައްޖެ ކަމަށެވެ.
ކުރިން ކުޅުނު ހަތަރު މެޗާ ހިލާފަށް، މި މެޗުގައި ވިކްޓަރީގެ ފަރާތުން ވަނީ ރަނގަޅު ކުޅުމެއް ފެނިގެން ގޮސްފަ އެވެ.
"ގޯލެއް ނުޖެހި މިދިޔައީ، އެހެން ނޫނީ ހުރިހާ ކަމެއްވެސް ރަނގަޅަށް ދިޔައީ، ހުރިހާ ކުޅުންތެރިން ވެސް ވަރަށް ރަނަގަޅަށް ކުޅުނު، މާޒިޔާ ހަމަ ވަރަށް ވަރުގަދަ ޓީމެއް، އަނެއްކާ [ގަދަ] ހަތަރު ޓީމުގެ ތެރެއަށް އަރާ ކަމަށްވަންޏާ ވަރަށް ޕްރެޝާގައި ވިކްޓަރީ ކުޅުނީ، ދެން ހަމަ ގާތްގަނޑަކަށް އެފުރުސަތު ބަންދުވާން މިދަނީ، އެއަށް ބަލާއިރު މި މެޗުން ބަލިވުމަކީ ވަރަށް ބޮޑު ގެއްލުމެއް،"
މެޗުގައި ވިކްޓަރީގެ ކުޅުންތެރިން ވަނީ ގިނަ ހަމަލާތަކެއް އުފައްދަން މަސައްކަތް ކޮށްފަ އެވެ. ހަމަލާ އުފައްދަން ކުރަންޖެހޭ ހުރިހާ ކަމެއް ކުރި ނަމަވެސް، ގޯލަށް ބޯޅަ ފޮނުވާލުމުގައި ވިކްޓަރީއަށް ކާމިޔާބުވާ ގޮތެއް ނުވި އެވެ.
މެޗުގައި ވިކްޓަރީން އެންމެ މޮޅު ކުޅުމެއް ދެއްކީ، މިސްރުގެ މިޑްފީލްޑާ މުސްތޮފާ މުހައްމަދު ސެޑިކް އެވެ. އޭނާ ވަނީ ހަމަލާ އުފެއްދުމަށް ގިނަ ފުރުސަތު ތަކެއް ތަނަވަސް ކޮށްފަ އެވެ.
މެޗުގެ 16 ވަނަ މިނެޓްގައި އޭނާ އަށް ލިބުނު ފުރުސަތެއް ގައި، ޕެނަލްޓީ އޭރިއާ ބޭރުން އޭނާ ފޮނުވާލި ބޯޅަ ދިޔައީ ގޯލްގެ މަތީ ކަނާ ދިމާލުން ގޯލް ދަނޑި ކައިރިން ބޭރަށެވެ.
ސުޒޭން ބުނީ މާޒިޔާގެ ޑިފެންސު ވެސް ވަރަށް ހުޝިޔާރު ކަމަށާއި، އަދި އެޓީމުގެ ކީޕަރު ޕަވެލް މެޓިއަޝް ވެސް ކުޅުނީ ވަރަށް އިތުބާރާއެކު ކަމަށެވެ.
މެޗުގައި ލަނޑު ޖަހާނެ އެންމެ ރަނގަޅު ފުރުސަތެއް ލިބިގެން ދިޔައީ މާޒިޔާގެ ކެޕްޓަން އަސަދުﷲ އަބްދުﷲ އަށެވެ. ވިކްޓަރީގެ ކީޕަރު މަހްމޫދު އަލް ޔޫސުފްގެ ކައިރިން ނައްޓާލައި، އޭނާއަށް ވަނީ އިތުބާރާއެކު ހުހަށް އޮތް ގޯލްގެ ތެރެއަށް ބޯޅަ ޖަހަން ފުރުސަތު ލިބިފަ އެވެ. ނަމަވެސް އޭނާ ފޮނުވާލި ބޯޅަ ދިޔައީ ވިކްޓަރީގެ ގޯލް ދަނޑި ކައިރިން ބޭރަށެވެ.
އަސަދުﷲ އަށް އެ ފުރުސަތުގައި ދިމާވީ ކޮންފިޑެންސްގެ މައްސަލައެއްތޯ ސުވާލު ކުރުމުން، މާޒިޔާގެ ކޯޗް މަރުޔަން ސެކްލޮސްކީ ބުނީ ކޮންމެ ސްޓައިކަރަކަށް ވެސް އެފަދަ ހާލަތެއް ދިމާވެދާނެ ކަމަށާއި އެއީ ކޮންފިޑެންސްގެ މައްސަލައެއް ނޫން ކަމަށެވެ.
"ކީއްވެ ކޮންފިޑެންސް މައްސަލައަކަށް ވާންވީ، މިކަހަލަ ހާލަތްތައް އަންނާނެ، އޭނާ ފޮނުވާލުމުގެ ކުރިން ބޯޅަ ބައުންސް ވެގެން ދިޔަ، އޭނަ އަކީ ސްޓައިކަރެއް އޭނާއަށް އެނގޭނެ ކިހިނެއްކަން ގޯލް ޖަހަންވީ، ހަމަ ޔަގީން އެ ފުރުސަތު ގެއްލުނީ ބޯޅަ ބައުންސް ވެގެން، ކަންބޮޑު ނުވޭ އޭނާ ހުރީ ކޮންފިޑެންސްގައި،"
މާޒިޔާގެ ލަނޑު ދެ ވަނަ ހާފު ފެށިގެން ހަތަރު ވަނަ މިނެޓް ތެރޭގައި ލިބުނު ހިލޭ ޖެހުމަކުން ކާމިޔާބު ކުރީ އެލެގްޒެންޑާ ރެކިޗް އެވެ. ޕެނަލްޓީ އޭރިއާގެ ރޮނގު މަތިން ލިބުނު ހިލޭ ޖެހުމަކީ، މާޒިޔާގެ މުހައްމަދު އުމޭރަށް، ވިކްޓަރީ ކުޅުންތެރިޔަކު ކުރި ފައުލަކާ ގުޅިގެން ލިބުނު ހިލޭ ޖެހުމެކެވެ. އެފައުލާ ގުޅިގެން އުމޭރު ވެއްޓުނީ ވިކްޓާރީގެ އޭރިއާގެ ތެރެއަށެވެ. މާޒިޔާގެ ބެންޗުން ވަނީ ޕެނަލްޓީއެއް ކަމަށް ބުނެ އެކަމަށް އެޕީލްވެސް ކޮށްފަ އެވެ.
ނަމަވެސް ރެފްރީ ނިންމީ ހިލޭ ޖެހުމެއް ކަމަށެވެ. ހިލޭ ޖެހުން ރެކިޗް ފޮނުވާލީ ބޯޅައަށް ހުރަސް އަޅަން ވިކްޓަރީގެ ޕެނަލްޓީ އޭރިއާގެ ތެރޭގައި ފާރެއްހެން އެތުރިގެން ތިބި ވިކްޓަރީގެ ކުޅުންތެރިންގެ ތެރެއިން ގޮސް ސީދާ ގޯލްގެ މެދަ ށެވެ.
އެ ލަނޑަށްފަހު ވެސް މާޒިޔާއަށް ވަނީ ލަނޑު ޖަހާނެ ރަނގަޅު ފުރުސަތެއް ލިބިގެން ގޮސްފަ އެވެ. މެޗުގެ 52 ވަނަ މިނެޓްގައި، އަސަދުﷲ ހުރަސްކޮށްދިން ފުރުސަތުގައި އުމޭރު ބޮލުން ފޮނުވާލި ބޯޅަ ދިޔައީ ގޯލް ދަނޑި މަތިން ބޭރަށެވެ.
ދެ ވަނަ ހާފުގައި ވިކްޓަރީން ވަނީ ލަނޑު ޖަހާނެ، ރަނގަޅު ފުރުސަތުތައް ތަނަވަސް ކޮށްފަ އެވެ. ދެ ވަނަ ހާފުގައި އެޓީމުން އެންމެ ރަނގަޅު ފުރުސަތެއް ލިބުނީ ހަސަން އަދުހަމް (ސަޑޭ) އަށެވެ. ޕެނަލްޓީ އޭރިއާ ބޭރުން އޭނާ ފޮނުވާލި ބާރު ބޯޅަ އަމާޒުވީ ގޯލް ދަނޑިއަށެވެ.
އެގެ ފަހުން ކެޕްޓަން އިސްމާއީލް އީސާ ވެސް ވަނީ މާޒިޔާގެ ޕެނަލްޓީ އޭރިއާ ތެރެއަށް ރީތި ބޯޅައެއް ހުރަސް ކޮށްދީފަ އެވެ. ނަމަވެސް އެބޯޅަ ދިޔައީ ވިކްޓަރީގެ ކުޅުންތެރިންނަށް ބޭނުން ނުކުރެވި އެވެ.
އެއް މެޗު މަދުން ކުޅެފައިވާ މާޒިޔާ ވަނީ މި މެޗުން މޮޅުވުމުން ތާވަލުގެ ދެ ވަނަ އަށް ޖެހިލާފަ އެވެ. އެޓީމަށް ލިބިފައި ވަނީ 12 ޕޮއިންޓެވެ. އެއް ވަނަ އިގައި އޮތް ނިއުރޭޑިއަންޓަށްވެސް ވަނީ އެއަދަށް ޕޮއިންޓް ލިބިފަ އެވެ. ނަމަވެސް ނިއު އަށް ކުރި ލިބެނީ ފައިދާ ގޯލުން ކުރި ލިބޭތީ އެވެ.
ލީގްގައި ދެން ކުޅޭ މެޗުގައި ބައްދަލު ކުރާނީ މާޒިޔާ އާއި ޔުނައިޓަޑް ވިކްޓަރީ އެވެ. މިހާރު އޮތް ގޮތުން އެމެޗު އޮތީ އަންނަ ހުކުރު ދުވަހު އެވެ.