އާސެނަލްގެ ޗިލީ ވިންގާ އެެލެކްސިސް ސަންޗޭޒް ޕްރިމިއާ ލީގުގެ ވާދަވެރި ކްލަބަކަށް ދޫނުކުރާނެ ކަމަށް އާސެނަލްގެ ކޯޗު އާސެން ވެންގާ ބުނެފި އެވެ.
އާސެނަލްއާއެކު ސަންޗޭޒް ހަދާފައިވާ ކޮންޓުރެކްޓްގައި ބާކީ އެއް އަހަރު އޮތްއިރު، ސަންޗޭޒް އަދި މިހާތަނާށް ކޮންޓުރެކްޓް އަލެއް ނުކުރެ އެވެ. އަދި މި ސީޒަނަށް ފަހު ސަންޗޭޒް އެހެން ޓީމަކަށް ބަދަލުވާނެ ކަމަށް މީޑިއާ ރިޕޯޓްތަކުން ބުނެ އެވެ. ޗެލްސީ އާއި މެންޗެސްޓާ ސިޓީން ސަންޗޭޒަށް ޝައުގުވެރިވާ ކަމަށްވެ އެވެ.
އެކަމަކު ވެންގާ ބުނީ ޕްރިމިއާ ލީގުގެ ވާދަވެރި ކްލަބަކަށް ސަންޗޭޒް ނުވިއްކާނެ ކަމަށެވެ.
"ޕްރިމިއާ ލީގުގެ ވާދަވެރި ކްލަބަކަށް ސަންޗޭޒް ދޫކުރުމުގެ ވިސްނުމެއް ނެތް،" ވެންގާ ބުންޏެވެ. "ދެން އަހަރެން ކުރިންސުރެ ބުނަމުން އަންނަ ވާހަކައެއް މިއީ. އަހަންނަށް ހީވާ ގޮތުގައި ސަންޗޭޒް މި ކްލަބުގައި މަޑުކުރާނެ."
މި ސީޒަންގެ ނިޔަލަށް ވެންގާގެ ކޮންޓުރެކްޓް ހަމަވާއިރު، އޭނާގެ މުސްތަގްބަލާމެދު ވެސް ވަނީ ސުވާލު އުފެދިފަ އެވެ. ވެންގާގެ ކޮންޓުރެކްޓް މި މަހުގެ ނިޔަލަށް ހަމަވާއިރު، އޭނާ އަދި އާ ކޮންޓުރެކްޓެއްގައި ސޮއެއް ނުކުރެ އެވެ. އެކަމަކު ދެ އަހަރު ދުވަހުގެ އާ އެއްބަސްވުމެއް މިހާރު ވެންގާ އަށް ވަނީ ހުށަހަޅައިފަ އެވެ.