ރަހުމު ކުޑަ ގޮތަކަށް ކަތިލައި މިދިއަ ހޮނިހިރު ދުވަހުގެ ރޭ ދަންވަރު ޔާމީން ރަޝީދު 29، މަރާލި އިރު އޭނާ ހުރީ އިތުރަށް ތައުލީމް ހާސިލް ކުރަން ރާއްޖެއިން ބޭރަށް ފުރަން ބޭނުންވެފައި ކަމަށް އާއިލާއިން ބުނެފި އެވެ.
މަރާލި އިރު ސްޓޮކް އެކްސްޗޭންޖުގައި ވަޒީފާ އަދާ ކުރަމުން އައި ޔާމީނަކީ އޭނާގެ އުމުރުން ދެ އަހަރު ވެސް ނުފުރެނީސް އާއިލާއާ އެކުގައި އިންޑިއާއަށް ބަދަލުވެ ފަހު ޕްރީސްކޫލް ތައުލީމުން ފެށިގެން ކޮމްޕިއުޓާ ސައިންސުން ޑިގްރީއެއް ހާސިލުކޮށްފައިވާ ޒުވާނެކެވެ.
ދެހާސް ދިހަވަނަ އަހަރު އޭނާ ރާއްޖެ އައީ ކިޔަވައި ނިމުމާއެކު ދިރާގުން ލިބުނު ވަޒީފާއަށް ނިކުތުމަށެވެ. ދިރާގުގައި މަސައްކަތް ކުރުމަށްފަހު މީގެ އަހަރެއްހާ ދުވަސް ކުރިން އެ ވަޒީފާ ދޫކޮށްލީ ސްޓޮކް އެސްޖޭންޖްގެ ވަޒީފާއަށް ދާން ބޭނުންވެގެނެވެ.
އަވަސް އަށް ދިން އިންޓަވިއުއެއްގައި ޔާމީންގެ މަންމަ އިއްޔެ ބުނީ ޔާމީން މި ދުނިޔެ ދޫކުރީ، އިތުރަށް ކިޔަވަން ބޭރަށް ދާން ވިސްނައި އެކަމަށް ވަރަށް ބޮޑަށް ތައްޔާރުވަމުން ދަނިކޮށް ކަމަށާއި ކިޔަވަން ބޭރަށް ފުރަން އޭނާ ނިންމީ ވެސް އާއިލާއިން އެކަމަށް އެދިގެން ކަމަށެވެ.
އަދި ބުނީ އެހެންވެ ސްޓޮކް އެކްސްޖޭންޖްގެ ވަޒީފާގެ ކޮންޓްރެކްޓް ވެސް ހަދާފައި ވަނީ އެއް އަހަރަށް ކަމަށާއި މަރާލި އިރު އެ ކޮންޓްރެކްޓްގެ މުއްދަތު ހަމަވާން ވެސް ގިނަ ދުވަހެއް ނެތް ކަމަށެވެ.
"އަޅުގަނޑު މިދިޔަ އަހަރު ވެސް ބުނިން ދެން ފުރަން އުޅޭށޭ ކޮންމެ ވެސް ގައުމަކަށް... ބޭރަށް އިތުރަށް ކިޔަވަން ދާށޭ، އޭނާއަށް ލިބުނު ކޮންމެވެސް އެމްބަސީއަކުން ވެސް ވަޒީފާ، މި ޖޮބަށް [ސްޓޮކް އެކްސްޖޭންޖްގެ ވަޒީފާ] ޖޮއިން ކުރަން އުޅެނިކޮށް، އެއީ މި ތްރެޓްސްތަކާ ހެދި އަޅުގަނޑު އެހެން ބުނީ، އެކަމަކު މިހެން ވާން ވެގެން ކަންނޭނގެ ނުގޮސް އެ ހުރީ،"